Wɔziezie Ɛ Nwo Wɔmaa Ayileyɛlɛ Nu Esiane Ɔ?

Ayileyɛlɛ nu esiane bahola azi arɛlevilɛ nu mɔɔ ɔmbɔ kɔkɔ a. (Gye. 4:14) Ɛhye ati, awie mɔɔ ze nrɛlɛbɛ la baziezie ɔ nwo kpalɛ. (Mrɛ. 22:3) Asoo wɔzi ayileyɛlɛ nee adenle mɔɔ bɛdua zo bɛyɛ ayile mɔɔ ɛdie ɛto nu la anwo kpɔkɛ, na wɔhɛlɛ wɔdo ɛkɛ? Amaa wɔanyia moalɛ na wɔahola wɔayɛ zɔ la, bɛyɛ video ne mɔɔ se, Transfusion-Alternative Health Care—Meeting Patient Needs and Rights la, ɛhye le video mɔɔ tɔ zo nwiɔ wɔ DVD ne mɔɔ ati se, Transfusion-Alternatives—Documentary Series, la azo. Ɛlɛnea video ne a, nea kɛ ɛbahola wɔabua kpuyia mɔɔ doɔdoa zo la. Kɛmɔ apelehyɛne wɔ video ne foa bie mɔ anu la ati, ɔwɔ kɛ awovolɛ fa adwenle to nwolɛ wɔ mekɛ mɔɔ bɛ nee ngakula ɛlɛnea la.

(1) Duzu ati a ayileyɛlɛma ɛlɛsia anleɛnlea kɛzi bɛfa mogya bɛdi gyima la anu ɛ? (2) Fa apelehyɛne mɔɔ yɛ se mɔɔ bɛyɛ mɔɔ bɛammaa mogya wɔ nu la anwo neazo nsa maa. (3) Duzu ati a dɔketama nee ayileyɛlɛma dɔɔnwo mɔɔ wɔ ewiade ye anu la kulo kɛ bɛyɛ wuleravolɛma ayile mɔɔ bɛmmaa bɛ mogya a? (4) Duzu a asopiti neɛnleanu mɔɔ bɛyɛ ye kenlensa ye la ɛmaa yela ali wɔ mogya mɔɔ bɛfa bɛmaa la anwo a? (5) Ayileyɛlɛ nwo esiane boni a wɔ mogya mɔɔ bɛfa bɛmaa la anu a? (6) Edwɛkɛ boni a dɔketama nee ayileyɛlɛma dɔɔnwo ɛha ɛva nvasoɛ mɔɔ wɔ ayile mɔɔ bɛfa bɛsie mogya gyakɛ anu la anwo a? (7) Duzu a maa awie mogya zo te a, na duzu a bɛbahola bɛayɛ na bɛanyia bie bɛazie ɔ gyakɛ anu ɛ? (8) Kɛzi bɛkola bɛmaa wuleravolɛ ngoane ngɛkɛba kɔkɔlɛ ne yɛ dɔɔnwo ɛ? (9) Adenle boni a bɛdua zo bɛnea kɛ bɛlɛyɛ awie apelehyɛne a mogya dɔɔnwo ɛnrɛvi ye nu a? (10) Asoo bɛkola bɛfa ayile mɔɔ bɛfa bɛsie mogya gyakɛ anu la bɛmaa ngakula anzɛɛ menli mɔɔ bɛ ewule ne anu yɛ se la? (11) Ayileyɛlɛ kpalɛ nwo ngyinlazo titile ko mɔɔ wɔ ɛkɛ ne la a le duzu?

Kɛmɔ ɔwɔ kɛ awie fa ye adwenle di gyima na yealie video ne anu ayileyɛlɛ bie mɔ yeado nu la ati, mmakendɛ toonwo edwɛkɛ bie si na wɔazuzu mɔɔ ɛbalie wɔado nu anzɛɛ ɛnrɛlie la anwo. “Nyamenle Ɛhulolɛ” buluku ne tile 7 nee ɛleka ngakyile mɔɔ bɛhile wɔ nu yɛɛ kɛlata ne mɔɔ vea December 2006 Our Kingdom Ministry ne anu la baboa wɔ yeamaa wɔazi kpɔkɛ kpalɛ. Akee saa bɛzɔne wɔ a, kɛlɛ mɔɔ ɛkulo la wɔ DPA kɛlata ne azo, na nea kɛ kɛlata ne wɔ ɛ nwo mekɛ biala.

[Edwɛkɛ mɔɔ bɛkpa wɔ mukelɛ 3]

Asoo wɔzi ayileyɛlɛ nee ndenle mɔɔ bɛdua zo bɛyɛ ayile mɔɔ ɛdie ɛto nu la anwo kpɔkɛ na wɔhɛlɛ wɔdo ɛkɛ?