Kpuyia Ɛleka

◼ Nwane a ɔwɔ kɛ ɔkɛlɛ kɛ ɔkpondɛ ɛkpɔlalɛ anzɛɛ buluku a?

Yɛ mbuluku ne mɔ lɛ ɛleka mɔɔ bɛta bɛgyakyi bɛmaa menli dua zo kɛlɛ ɔfese ne na bɛbiza buluku anzɛɛ bɛsɛlɛ kɛ Gyihova Alasevolɛ ɛrakpɔla bɛ a. Bieko, bɛkola bɛdua yɛ Intanɛte address www.watchtower.org azo bɛsɛlɛ Baebolo ɛzukoalɛ nwo adenle. Ngyehyɛleɛ ɛhye mɔ ɛlɛboa menli dɔɔnwo yeamaa bɛanwu nɔhalɛ ne. Noko akee, saa nolobɔlɛma dua ninyɛne ɛhye mɔ azo yɛ sunsum nu moalɛ nwo ngyehyɛleɛ maa bɛ nwo amra anzɛɛ awie mɔ a ɔfa ngyegyelɛ ɔba.

Bie mɔ mɔɔ ɔfese ne ɛva mbuluku ɛhɔmaa bɛ na tɛ bɛdabɛ a bɛbizale la ɛdendɛ nwolɛ, na bɛde nganeɛ kɛ yɛ ahyehyɛdeɛ ne ɛlɛgyegye bɛ na yehɛlɛ bɛ aluma yɛɛ ɔfa debie ɔnwa bɛ a. Nolobɔlɛma mɔɔ bɛha bɛhile bɛ kɛ bɛhɔkpɔla awie mɔɔ tɛ ɔdaye mumua ne a ɔse bɛrɛla la ɛnwu kɛ menli ɛhye mɔ ɛva bɛ nwo ɛya. Ɛhye ati, menli mɔɔ kpondɛ mbuluku la a ɔwɔ kɛ kɛlɛ anzɛɛ dua Intanɛte ne azo biza die bie a na ɔnle kɛ nolobɔlɛma yɛ maa bɛ. Saa bɛnwu kɛ nolobɔlɛnli bie a ɛyɛ bie ɛmaa awie a, bɛnli nwolɛ gyima.

Ɛnee kɛ ɔkɛyɛ na yɛaboa yɛ nwo sonla anzɛɛ yɛ gɔnwo bie na yeanyia sunsum nu moalɛ ɛ? Saa ɛkulo kɛ ɔ sa ka buluku a, duzu ati a ɛnva bie ɛngɔmaa ye kɛ ahyɛlɛdeɛ a? Saa ɔ nye die edwɛkɛ ne anwo na ɔkulo kɛ Mediema bakpɔla ye, na ɛnnwu kɛzi ɛbahola ɛ nee mgbanyima mɔɔ wɔ ɛkɛ ne asafo ne anu la ali ngitanwo a, ɔwɔ kɛ ɛkɛlɛ ye wɔ Please Follow Up (S-43) kɛlata ne azo na ɛfa ɛmaa wɔ asafo nu kɛlɛhɛlɛvolɛ ne, ɔbali nwolɛ gyima na yeava yeanwa ɔfese ne. Noko, saa ahenle ne la efiade, ɛleka mɔɔ menli mɔɔ no nyile ɛtane la wɔ anzɛɛ arane asopiti nu a, ɔnle kɛ ɛbiza debie ɛfi ɔfese ne ɛkɛ ɛmaa ye. Emomu, ɛbahola wɔaha wɔahile ye kɛ ɔnwu mediema mɔɔ ba ɛleka mɔɔ ɔwɔ la anzɛɛ ɔdaye mumua ne ɔhɛlɛ ɔfese ne.