Kpuya Ɛleka
◼ Asoo ɔwɔ kɛ nolobɔlɛma fa mekɛ tendenle dua Yintanɛte ne azo di nyɛvolɛ mɔɔ bɛwɔ maanle gyɛne nu la daselɛ anzɛɛ bɛ nee bɛ sukoa debie ɔ?
Nolobɔlɛma bie mɔ ɛlua Yintanɛte ne azo ɛnyia Baebolo sukoavoma wɔ maanle mɔɔ bɛva bɛ sa bɛdo yɛ gyima ne azo anzɛɛ nolobɔlɛma anzo wɔ ɛkɛ la. Debie kpalɛ ɛvi bie mɔ anu ɛra. Noko esiane wɔ e-mail adelɛse mɔɔ bɛfa bɛmaa awie mɔ anzɛɛ nyɛvolɛ mɔɔ bɛ nee bɛ di adwelie wɔ Yintanɛte zo la anu. (Nea July 2007 Yɛ Belemgbunlililɛ Gyima ne, m. 3.) Ɔwɔ nuhua kɛ adwenle ne a le kɛ yɛka Belemgbunlililɛ edwɛkpa ne yɛahile menli mɔɔ lɛ ahonle kpalɛ la, noko adwelielilɛ ɛhye bahola amaa adiema bie adila agɔnwolɛ ɛtane, mɔɔ kpɔkyevolɛma boka nwo la. (1 Kɔl. 1:19-25; Kɔl. 2:8) Eza wɔ maanle mɔɔ bɛva bɛ sa bɛdo yɛ gyima ne azo la anu, maanle ne anu mgbanyima bahola avedevede bɛ adwelielilɛ ne anu. Adwelielilɛ zɛhae bahola ava mediema ado esiane nu. Yemɔti ɔnle kɛ nolobɔlɛma kɔ Yintanɛte ne azo kɛ bɛkpondɛ menli wɔ maanle gyɛne zo bɛaha edwɛkpa ne bɛahile bɛ.
Saa Bɛtɛle mɔɔ wɔ yɛ maanle ne anu la ɛtɛkanle nwolɛ edwɛkɛ gyɛne na yɛdi awie mɔɔ vi maanle gyɛne zo la daselɛ na ahenle ne sia kɔ ye maanle nu a, ɔnle kɛ yɛtoa zo. Emomu, yɛbahola yɛahile ye kɛzi ɔbahola yɛanyia edwɛkɛ dɔɔnwo anzɛɛ ɔ nee ye maanle ne anu Bɛtɛle bali adwelie wɔ jw.org ne azo la. Eza yɛbahola yɛamaa ye anwosesebɛ kɛ ɔhɔ Belemgbunlililɛ Asalo mɔɔ bikye ye la. Noko tɛ maanle ne amuala a Belemgbunlililɛ Asalo wɔ zo a. Saa ɔkpondɛ kɛ Alasevolɛ mɔɔ bɛwɔ ɛleka mɔɔ ɔwɔ la kpɔla ye a, ɔwɔ kɛ yɛhyehyɛ Please Follow Up (S-43) kɛlata ne na yɛfa yɛmaa kɛlɛhɛlɛvolɛ ne na ɔbalua jw.org ne azo yeali nwolɛ gyima. Bɛtɛle ne mɔɔ nea maanle ne mɔɔ ahenle wɔ nu gyima ne azo la ze tɛnlabelɛ titili mɔɔ wɔ maanle ne anu a, yemɔti bɛdabɛ a bɛbahola bɛava sunsum nu moalɛ mɔɔ ahenle ne hyia la bɛamaa ye a.—Nea June 2014 Yɛ Belemgbunlililɛ Gyima ne m. 7, yɛɛ November 2011 ɛdeɛ ne m. 2.
Saa ahenle mɔɔ yɛkɔ ye ɛkɛ ne kɛkala la tu kɔ maanle gyɛne zo anzɛɛ saa yɛ nee awie mɔɔ vi maanle gyɛne zo la sukoa debie kɛkala mɔɔ Yintanɛte ne azo ala a yɛze ye a, ɔwɔ kɛ yɛfa adehilelɛ mɔɔ wɔ anwuma ɛkɛ la yɛdi gyima. Noko ɔnle kɛ yɛgyakyi ye ɛkɛ ne ala, yɛbahola yɛadoa zo yɛ nee ye ali adwelie kɔkpula kɛ mediema mɔɔ wɔ ɛleka mɔɔ ɔwɔ la bahɔkpɔla ye la. Noko saa ahenle ne wɔ maanle mɔɔ bɛva bɛ sa bɛdo yɛ gyima ne azo la anu a, ɔwɔ kɛ bɛnea boɛ kpalɛ wɔ Baebolo nu edwɛkɛ adile mɔɔ bɛdua ngɛlata, telefuu anzɛɛ ɛlɛtɔlɔneke ninyɛne zo bɛ nee bɛ ka nwolɛ edwɛkɛ la anwo.—Mat. 10:16.