Ɛ Mra Ne Mɔ Ɛziezie Bɛ Nwo Ɔ?
1. Duzu ati a ɔhyia kɛ sukulu ngakula siezie bɛ nwo ɛ?
1 Ɔnrɛhyɛ na bɛabɔ ɛvolɛ bieko sukulu ne abo. Kpolerazulɛ biala ɛnle nwolɛ kɛ, ɛ mra ne mɔ bayia ngyegyelɛ ngakyile. Eza bɛbanyia nwolɛ adenle fofolɛ bɛali “nɔhalɛ ne anwo daselɛ.” (Dwɔn 18:37) Asoo bɛziezie bɛ nwo ɔ?
2. Amaa ɛ mra ne mɔ aziezie bɛ nwo la, duzu a ɔwɔ kɛ bɛnwu ye a?
2 Asoo ɛ mra ne mɔ te debie mɔɔ kile kɛ bɛlɛfa bɛ nwo bɛawula maanyɛlɛ nee ɛnwomenlelielɛ ɛvoyialilɛ nu nee deɛmɔti ɔle nvonleɛ la abo kpalɛ ɔ? Asoo bɛziezie bɛ nwo bɛmaa ngyegyelɛ mɔɔ le kɛ bɛkɛzukoa nwoma kpole, bɛ nee mraalɛ anzɛɛ mrenya kɛdu, na bɛkɛnlo nza anzɛɛ nyile ɛtane la ɔ? Asoo bɛbaha ye sikalɛ kɛ debie mɔɔ bɛnva bɛ nwo bɛnwula nuhua la tia bɛ ɛzonlenlɛ ne ala anzɛɛ bɛze kɛzi bɛbahilehile bɛ diedi ne anu la ɔ?—1 Pita 3:15.
3. Kɛzi awovolɛ bahola ava bɛ nɔsolɛ Abusua Ɛzonlenlɛ ne aziezie bɛ mra ne mɔ ɛ?
3 Fa Nɔsolɛ Abusua Ɛzonlenlɛ Ne Di Gyima: Nɔhalɛ nu, bie a bɛbazuzu ninyɛne dɔɔnwo anwo wɔ mekɛ mɔɔ ɛ mra ne mɔ ɛlɛyia ngyegyelɛ ngakyile wɔ sukulu ɛvolɛ ne anu la. Noko saa ɛbɔ mɔdenle kpalɛ ɛ nee bɛ sukoa ninyɛne mɔɔ bahola agyegye bɛ la kolaa na bɛabuke sukulu a, ɔbamaa bɛanyia anwodozo. Duzu ati a ɛnva nɔsolɛ Abusua Ɛzonlenlɛ ne ko anzɛɛ mɔɔ bo zɔ la ɛnli ɛhye anwo gyima ɛ? Amaa wɔanwu mɔɔ ɔwɔ kɛ bɛsuzu nwolɛ la, ɛbahola wɔabiza ɛ mra ne mɔ debie mɔɔ bagyegye bɛ kpalɛ wɔ sukulu mɔɔ bɛlɛsia bɛahɔ la anwo. Kɛkala mɔɔ bɛnyi na bɛte edwɛkɛ bo kpalɛ la, bɛbahola bɛazuzu edwɛkɛ mɔɔ bɛzukoale ye wɔ ɛvolɛ dɔɔnwo mɔɔ ɛze ɛhɔ anu la anwo bieko. (Edw. 119:95) Ɛbahola wɔayɛ ɛ nwo kilehilevolɛ, sukulu nu folɛtuvolɛ anzɛɛ sukulu kakula na bɛava bɛayɛ kɛzi bɛbali ngyegyelɛ bie anwo gyima la bɛanlea. Kile ɛ mra ne mɔ kɛzi bɛfa Baebolo ne bɛbua edwɛkɛ yɛɛ kɛzi bɛfa mbuluku mɔɔ le kɛ Reasoning yɛɛ Young People Ask bɛdi gyima la. Awovolɛ ko zieziele ɔ mra wɔ kɛzi bɛbabikye bɛ kilehilevolɛma fofolɛ mɔɔ kɛra sukulu ɛkɛ wɔ sukulu ɛvolɛ biala mɔlebɛbo la amaa bɛaha bɛahile bɛ kɛ bɛle Gyihova Alasevolɛ, na bɛyɛle bɛnleanle. —Nea The Watchtower, December 15, 2010, mukelɛ 3-5.
4. Duzu a awovolɛ mɔɔ bɛze nrɛlɛbɛ la bɛayɛ a?
4 Ngakula mɔɔ bɛle Keleseɛnema la ɔwɔ kɛ yia “anwongyelelɛ dɔɔnwo” mɔɔ anu yɛ se la wɔ awieleɛ mekɛ ɛhye anu. (2 Tem. 3:1) Awovolɛ mɔɔ bɛze nrɛlɛbɛ la bɔ mɔdenle kɛ bɛkɛlumua bɛkɛnwu ngyegyelɛ bie na bɛkɛli nwolɛ gyima. (Mrɛ. 22:3) Kolaa na sukulu ɛvolɛ fofolɛ ne abɔ ɔ bo la, yɛ biala mɔɔ ɛbahola la fa boa ɛ mra ne mɔ maa bɛziezie bɛ nwo.