Bɛziezie Bɛ Nwo Kɛ Bɛkɔ Sukulu Ɔ?
1. Adenle boni a wɔ ɛkɛ ne maa bɛ wɔ mekɛ mɔɔ bɛlɛkɔ sukulu la ɛ?
1 Saa ɛhye a le mekɛ mɔɔ lumua mɔɔ bɛlɛkɔ sukulu anzɛɛ bɛlɛtoa zo a, Keleseɛne ngakula bɛayia ngyegyelɛ ngakyile dɔɔnwo. Noko eza bɛlɛ adenle kɛnlɛma bɛdi “nɔhalɛ ne anwo daselɛ.” (Dwɔn 18:37) Asoo bɛziezie bɛ nwo kɛ bɛbali daselɛ ɔ?
2. Ndenle boni azo a bɛziezie bɛ kɛ bɛhɔ sukulu a?
2 Amaa bɛanyia moalɛ na bɛ ɛbɛlabɔlɛ afoa biala ali munli la, bɛnyia ndetelɛ bɛvi Gyihova, bɛ awovolɛ nee akɛlɛ nɔhavo nee nrɛlɛbɛvolɛ eku ne ɛkɛ. (Mrɛ. 1:8; 6:20; 23:23-25; Ɛfɛ. 6:1-4; 2 Tem. 3:16, 17) Kɛkala ɔda ali wienyi kɛ bɛze ngyegyelɛ mɔɔ wɔ bɛ sukulu ɛkɛ ne la. Kɛmɔ bɛnyia ndetelɛ mɔɔ Nyamenle kpondɛ nee ninyɛne mɔɔ bɛyɛ wɔ sukulu ɛkɛ ne anwo adwenle la ati, bɛziezie bɛ nwo kɛ bɛbali daselɛ. (Mrɛ. 22:3) Bɛzuzu adehilelɛ nee Ngɛlɛlera ne anu nzuzulɛ mɔɔ boa mɔɔ wɔ Young People Ask mbuluku nwiɔ ne anu nee nwolɛ edwɛkɛ mɔɔ ba Awake! nu dahuu la anwo boɛ.
3. Ndenle boni azo a bɛbahola bɛali daselɛ a?
3 Bɛ azɛlɛsinli titile ɛhye bamaa bɛanyia adenle bɛali daselɛ wɔ ndenle dɔɔnwo anu. Saa awie mɔ nwu bɛ neazo kɛnlɛma mɔɔ bɛyɛ wɔ tɛladeɛ nee bɛ nwo ɛziezielɛ nu, bɛ nyɛleɛ nee bɛ ɛdendɛlɛ, kɛzi bɛbu bɛ gɔnwo mɔ sukuluma nee bɛ kilehilevolɛma nee kɛzi bɛbɔ mɔdenle wɔ sukulu la na bɛnwu kɛ bɛlɛ anyelazo kpalɛ wɔ ɛbɛlabɔlɛ nu a, ɔmaa menli bie mɔ biza kɛ, “Duzu ati a bɛle ngakyile a?” (Mal. 3:18; Dwɔn 15:19) Bɛbahola bɛanyia adenle bɛali daselɛ na bɛahilehile bɛ diedi ne anu. (1 Tem. 2:9, 10) Wɔ ɛvolɛ ne anu, bɛbahola bɛayia ngyegyelɛ mɔɔ le kɛ maanle ɛvoyialilɛ nee ɛnwomenlelielɛ kenle la. Saa bɛbiza bɛ kɛ, duzu ati a bɛnyɛ ninyɛne ɛhye mɔ bie ɛ, bɛha kɛ, “Me ɛzonlenlɛ ne tua; Mele Gyihova Dasevolɛ” anzɛɛ asoo bɛbahola bɛava nwolɛ adenle ne bɛali Gyihova bɛ Selɛ ne mɔɔ lɛ ɛlɔlɛ la anwo daselɛ ɔ? Saa bɛdua Gyihova adehilelɛ zo bɛsiezie bɛ nwo kpalɛ a, ɔbamaa bɛali kilehilevolɛma, bɛ gɔnwo mɔ sukuluma, nee awie mɔ daselɛ kɛnlɛma.—1 Pita 3:15.
4. Duzu ati a bɛdie bɛdi kɛ ɛvolɛ ɛhye sukulu ne bahɔ zo kɛnlɛma ɛ?
4 Ɔwɔ nuhua kɛ bie a ɛzulolɛ baha bɛ kɛ bɛlɛkɔ sukulu ɛdeɛ, noko bɛnwu ye kɛ menli dɔɔnwo gyi bɛ nzi na bɛkulo kɛ bɛkɔ na bɛwie ye kɛnlɛma. Bieko, yɛ nye die kɛ bɛbanyia adenle bɛali awie mɔ daselɛ wɔ bɛ azɛlɛsinli kɛnlɛma ɛhye anu la. Ɛhye ati, bɛnyia akɛnrazilɛ na bɛziezie bɛ nwo kɛ bɛkɔ sukulu!