Kɛzi Bɛfa Please Follow Up (S-43) Kɛlata Ne Bɛdi Gyima La
Saa ɛyia awie mɔɔ anye die edwɛkɛ ne anwo noko ɔnde bɛ azɛlɛsinli ne anu anzɛɛ ɔka aneɛ gyɛne a, ɔwɔ kɛ ɛhyehyɛ kɛlata ɛhye. Ɔwɔ nuhua kɛ mekɛ bie mɔɔ ɛze ɛhɔ la ɛnee saa yɛyia awie mɔɔ ka aneɛ gyɛne la ala a, sa ɔ nye die nwo anzɛɛ ɔ nye ɛnlie nwo bɔbɔ ɛnee yɛhyehyɛ bie yɛmaa ye, kɛkala yɛfa yɛdi gyima wɔ mekɛ mɔɔ ahenle kɛla ye ali kɛ ɔ nye die nwolɛ la. Ngakyile mɔɔ wɔ nu la a le mekɛ mɔɔ ahenle le mumule la. Saa yɛyia awie mɔɔ le mumule la na yeangile edwɛkɛ ne anwo anyelielɛ bɔbɔ a, ɔwɔ kɛ yɛdi S-43 kɛlata ne anwo gyima yɛmaa ye.
Saa yɛdi kɛlata ne anwo gyima yɛwie a, kɛzi ɔwɔ kɛ yɛyɛ ye ɛ? Ɔwɔ kɛ yɛfa yɛmaa asafo ne kɛlɛhɛlɛvolɛ ne. Saa ɔze asafo mɔɔ ɔwɔ kɛ ɔfa kɛlata ne ɔkɔmaa bɛ a, ɔbava yeanwa asafo zɔhane anu mgbanyima ne mɔ na bɛayɛ ngyehyɛleɛ bɛakpondɛ anyelielɛnli ne na bɛaboa ye. Saa ɔnnwu asafo mɔɔ ɔwɔ kɛ ɔfa kɛlata ne ɔnwa bɛ la a, ɔbava yeanwa ɔfese ne.
Saa anyelielɛnli ne ka aneɛ gyɛne na ɔde bɛ azɛlɛsinli ne anu a, ɛbahola wɔahɔ zo ɛ nee ye abɔ adawu kɔkpula kɛ bɛbanyia nolobɔlɛnli mɔɔ wɔ asafo mɔɔ ka ye aneɛ ne bie anu na ɔbahɔ ye ɛkɛ la.—Nea April 2010 Yɛ Belemgbunlililɛ Gyima ne, mukelɛ 6.