Fa Di Gyima Mekɛ Biala
1. Duzu a Nwu Nɔhalɛ Ne trate ne baboa yɛ yeamaa yɛayɛ a?
1 Bɛyɛ trate ne mɔɔ se Ɛkulo kɛ Ɛnwu Nɔhalɛ ne Ɔ? la kɛ ɔboa yɛ ɔmaa yɛbɔ Baebolo ɛzukoalɛ bo. Noko, eza ɔle debie mɔɔ yɛbahola yɛava yɛali gyima kpalɛ yɛava yɛalua nɔhalɛ ma ne a. (Nolo. 11:6) Nzuzulɛ mɔɔ baboa yɛ yeamaa yɛava yɛali gyima kpalɛ la bie mɔ a wɔ ɛke la.
2. Kɛzi yɛbahola yɛava trate ne yɛabɔ adwelielilɛ bo ɛ?
2 Kɛzi Bɛbɔ Adwelielilɛ Bo: Ɛbahola wɔava trate ne wɔamaa suamenle ne, wɔahile ye kpuyia nsia ne mɔɔ wɔ zolɛ la, na wɔabiza ye kɛ: “Kpuyia ɛhye mɔ boni a wɔzuzu nwolɛ a?” Ɔbua ɔwie a, suzu mualɛ mɔɔ Baebolo ne fa maa wɔ suamenle ne kpuyia ne ko anwo la na kenga ngɛlɛlera mɔɔ wɔ nu la ko. Kenga anzɛɛ ka edwɛkɛ mɔɔ wɔ ɔ nzi la sikalɛ, na fa Baebolo ne Kilehile buluku ne maa ye. Saa yeanlie buluku ne bɔbɔ a, ɔ sa ɛha trate ne mɔɔ baboa ye yeamaa nɔhalɛ ne azɔ ndinli wɔ ye ahonle nu la.—Mat. 13:23.
3. Saa suamenle bie ɛnlɛ alagye a, duzu a yɛbahola yɛayɛ a?
3 Saa Suamenle Ɛnlɛ Alagye A: Ɛbahola wɔaha kɛ: “Kɛmɔ ɛnlɛ alagye la ati, maa menva trate ɛhye memaa wɔ. Ɔkile kpuyia titile nsia mɔɔ yɛ nuhua dɔɔnwo ɛbiza la, na ɔfa nwolɛ mualɛ fɔɔnwo mɔɔ vi Baebolo ne anu la ɔmaa. Saa yɛyia bieko a, maa menwu mɔɔ ɛdwenle ye wɔ nwolɛ la.”
4. Duzu a yɛbahola yɛaha na yɛava trate ne yɛamaa wɔ mekɛ mɔɔ yɛlɛyɛ gyima wɔ gua zo la ɛ?
4 Mekɛ Mɔɔ Yɛlɛyɛ Gyima Wɔ Gua Zo La: Ɛbahola wɔaha kɛ: “Ahye o. Wɔbiza kpuyia ɛhye mɔ bie ɛlɛ ɔ? [Maa ɔbua.] Trate ɛhye maa yɛnwu Baebolo ne anu mualɛ mɔɔ nuhua la ɛkɛ wienyi na ɔyɛ ahunlundwolɛ la.” Saa ahenle ɛmkpondɛ ye ndɛndɛ a, ɛbahola ɛ nee ye azuzu mualɛ mɔɔ wɔ trate ne anu la ko anwo na bɔbɔ wɔava Baebolo ne Kilehile buluku ne wɔamaa ye.
5. Kɛzi yɛbahola yɛagyakyi trate ne bie yɛamaa menli mɔɔ bɛnle sua nu la ɛ?
5 Menli Mɔɔ Bɛnle Sua Nu: Wɔ Azɛlɛsinli bie mɔ anu, nolobɔlɛma ta gyakyi mbuluku maa menli mɔɔ bɛnle sua nu la. Saa bɛyɛ ye zɔ wɔ bɛ asafo ne anu a, ɛnee duzu ati a ɔyɛ a ɛngyakyi Nwu Nɔhalɛ Ne trate ne bie ɛmaa bɛ a? Saa ɛsia ɛkɔ ɛkɛ a ɛbahola wɔaha kɛ: “Mekɛ mɔɔ yɛrale ɛke la, ɛnee ɛnle sua nu, yemɔti yɛgyakyile trate ɛhye wɔ wɔ anlenkɛ ne anu. Kpuyia ɛhye mɔ boni a ɛkulo kɛ ɛnyia nwolɛ mualɛ a?”
6. Duzu a maa Nwu Nɔhalɛ Ne trate ne yɛ debie mɔɔ yɛbahola yɛava yɛali gyima kpalɛ wɔ daselɛlilɛ nu a?
6 Nwu Nɔhalɛ Ne trate ne kilehile nɔhalɛ ne sikalɛ maa nuhua da ɛkɛ wienyi. Menli mɔɔ wɔ ɛleka nee ɛzonlenlɛ ngakyile kɔsɔɔti anu la anye die nwolɛ. Ɔnyɛ se kɛ yɛbava yɛamaa; ngakula nee nolobɔlɛma mɔɔ bɛle fofolɛ bɔbɔ la bɛahola ava amaa. Ɛlɛfa wɔali gyima wɔ mekɛ biala mɔɔ fɛta la anu ɔ?