Kpuyia Ɛleka
◼ Asoo ɔwɔ kɛ Gyihova Alasevolɛ fa ɛdendɛlɛ mɔɔ bɛhɛlɛ anzɛɛ bɛhye la maa?
Ɛdendɛlɛ mɔɔ gyi Baebolo ne azo mɔɔ bɛmaa la maa yɛ anwosesebɛ na ɔmaa yɛgyinla kpundii. (Gyi. 15:32) Ɛhye ati, yɛte nganeɛ kɛ ɔwɔ kɛ yɛmaa menli mɔɔ bɛnle ɛkɛ la asa ka ɛdendɛlɛ ɛhye. Kɛmɔ ndenle ngakyile mɔɔ bɛdua zo bɛkye edwɛkɛ la dɔɔnwo ɛra la ati, bɛkola bɛkye ɛdendɛlɛ na bɛfa bɛmaa awie mɔ wɔ adenle sikalɛ zo. Bie mɔ ɛva ɛdendɛlɛ mɔɔ bɛhye, mɔ ɛdendɛlɛ mɔɔ bɛmanle ye wɔ ɛvolɛ dɔɔnwo mɔɔ ɛze ɛhɔ la anu boka nwo la ɛzie, na adwenle kpalɛ bie ati bɛfa ɛdendɛlɛ ɛhye mɔ anzɛɛ bɛyɛ ye kope bɛfa bɛmaa bɛ gɔnwo mɔ. Bie mɔ ɛyɛ Intanɛte address ɛleka bɛva ɛdendɛlɛ ɛhye mɔ bɛgua ɛkɛ mɔɔ awie biala kola ye bie fi ɛkɛ a.
Ndelebɛbo wɔ nu kɛ, yɛndendɛ yɛntia ɛdendɛlɛ mɔɔ awie kɛhye kɛ ɔtie anzɛɛ ɔfa yeamaa ye abusua ne anu amra la. Bieko, mgbanyima ne mɔ bɛahola amaa bɛahye ɛdendɛlɛ bɛava bɛamaa asafo ne anu amra mɔɔ bɛnde kpɔkɛ mɔɔ bɛngola bɛngɔ debiezukoalɛ la. Noko akee, ndelebɛbo dɔɔnwo wɔ ɛkɛ mɔɔ ɔti ɔnle kɛ yɛfa ɛdendɛlɛ mɔɔ bɛhɛlɛ anzɛɛ bɛhye la yɛmaa a.
Kɛmɔ bɛta bɛgyinla asafo nu ngyianlɛ zo a bɛmaa ɛdendɛlɛ la ati, bie a ɔnrɛmaa yɛnrɛde edwɛkɛ bie mɔɔ wɔ ɛdendɛlɛ mɔɔ bɛhye bɛmaa awie anu la abo kpalɛ, ɔluakɛ yɛnze gyinlabelɛ mɔɔ nuhua a bɛmanle ɛdendɛlɛ ne la. Bieko, ɔbayɛ se kɛ yɛkɛnwu ahenle mɔɔ manle ɛdendɛlɛ ne nee mekɛ mɔɔ ɔmanle ɛdendɛlɛ ne la, amaa yɛalie yɛali kɛ edwɛkɛ ne le fofolɛ na ɔle nɔhalɛ. (Luku 1:1-4) Bieko, ɛdendɛlɛ mɔɔ bɛhɛlɛ anzɛɛ bɛhye mɔɔ bɛfa bɛmaa la kola maa awie fa anyunlunyia nee enililɛ mɔɔ ɔnfɛta la maa anzɛɛ ɔdie.—1 Kɔl. 3:5-7.
Akɛlɛ nɔhavo nee nrɛlɛbɛvolɛ ne bɔ mɔdenle maa yɛnyia sunsum nu aleɛ dodo biala wɔ “mekɛ ne anloa.” (Luku 12:42) Mɔɔ boka ɛhye anwo la a le ngyehyɛleɛ mɔɔ bɛyɛ na bɛdua zo bɛmaa ɛdendɛlɛ wɔ Gyihova Alasevolɛ asafo bie anu anzɛɛ edwɛkɛ mɔɔ bɛhye mɔɔ bɛtie mɔɔ bɛkola bɛye bɛfi jw.org Intanɛte address ɛleka ne la. Yɛkola yɛnyia anwodozo kɛ akɛlɛ nɔhavo nee nrɛlɛbɛvolɛ ne nee ye Neazo Eku ne bamaa yɛ sa aha mɔɔ yɛhyia la amaa yɛahola yɛagyinla kpundii wɔ nɔhalɛ ne anu.—Gyi. 16:4, 5.