Duzu A Awie Mɔ Nea Wɔ A Bɛsukoa Bɛfi Wɔ Ɛkɛ A?
1. Gyisɛse ɛdoavolɛma ne nleanle ye la duzu a bɛzukoale bɛvile ye ɛkɛ a?
1 Gyisɛse hanle kɛ: “Bɛva me gyɛnvayile ne bɛdo bɛ kɔme zo na bɛzukoa mɔɔ meyɛ la.” (Mat. 11:29) Ɔda ali wienyi kɛ ɔluale neazo kpalɛ mɔɔ ɔyɛle la azo a ɔhilehilele awie mɔ a na tɛ edwɛkɛ mɔɔ ɔhanle la ala. Dwenle mɔɔ ɛdoavolɛma ne zukoale vile Gyisɛse ɛkɛ wɔ mekɛ mɔɔ bɛnleanle ye la anwo. Ɛnee ɔle bɛtɛɛ, ɔ tiakunlu le kɛnlɛma yɛɛ ɔlɛ ɛlɔlɛ. (Mat. 8:1-3; Mak. 6:30-34) Ɛnee ɔbɛlɛ ɔ nwo aze nɔhalɛ nu. (Dwɔn 13:2-5) Mekɛ mɔɔ bɛ nee ye ɛlɛyɛ ɛzonlenlɛ gyima ne la, ɛdoavolɛ ne mɔ nwunle kɛ ɔle gyimayɛvolɛ mɔɔ bɔ mɔdenle ɔkilehile nɔhalɛ ne kpalɛ ɔkile awie mɔ a. (Luku 8:1; 21:37, 38) Saa awie mɔ nea mɔɔ yɛlɛyɛ la wɔ daselɛlilɛ nu a, kɛzi ɔka bɛ ɛ?
2. Kɛzi yɛ anwoziezielɛ nee subane kpalɛ wɔ daselɛlilɛ nu maa suamenle ne mɔ nyia yɛ nwo adwenle kpalɛ ɛ?
2 Suamenle Ne Mɔ: Tɛladeɛ mɔɔ fɛta, subane kpalɛ nee menli mɔɔ yɛkile bɛ nwo anyelielɛ la kola maa suamenle ne mɔ nyia yɛ nwo adwenle kpalɛ. (2 Kɔl. 6:3; Fel. 1:27) Bɛnwu kɛ yɛta yɛfa Baebolo ne yɛdi gyima. Bie mɔ noko anye die nwo kɛ bɛlɛtendɛ a, yɛfi ɛbulɛ nu yɛtie bɛ. Ɔnle kɛ yɛbu yɛ nye yɛgua kɛzi neazo kpalɛ mɔɔ yɛyɛ wɔ ɛleka ɛhye mɔ la kola ka menli maa bɛtie Belemgbunlililɛ nrɛlaleɛ ne la azo.
3. Subane kpalɛ boni a yɛbahola yɛamaa yɛ mediema anyia a?
3 Yɛ Mediema: Suzu kɛzi yɛ nyɛleɛ kola ka yɛ mediema la noko anwo nea. Mɔdenle mɔɔ yɛbɔ wɔ daselɛlilɛ nu la bie kola ka yɛ mediema. Kɛmɔ bulalɛ si bulalɛ maa ɔyɛ nla la, edwɛkɛ mɔɔ yɛbaha mɔɔ yɛkɛziezie ye kpalɛ la ka mediema maa bɛbɔ mɔdenle wɔ daselɛlilɛ nu. (Mrɛ. 27:17) Mɔdenle mɔɔ yɛbɔ yɛyɛ kɛlɛtokɛ kpalɛ wɔ menli mɔɔ anye die edwɛkɛ ne anwo na yɛsia yɛkɔ bɛ ɛkɛ ne ndɛndɛ la ka yɛ mediema maa bɛdabɛ noko bɛyɛ zɔ. Saa yɛyɛ yɛ ɛzonlenlɛ gyima ne bɔkɔɔ a, ɔbaha yɛ gɔnwo mɔ gyimayɛvoma wɔ adenle kpalɛ zo.—2 Tem. 4:5.
4. Kɛmɔti a ɔwɔ kɛ yɛneɛnlea yɛ neazo ne anu boɛ ɔvi mekɛ mɔɔ kɔ mekɛ la ɛ?
4 Kɛmɔti a ɔvi mekɛ mɔɔ kɔ mekɛ la ɛnneɛnlea mɔɔ ɛyɛ nee mɔɔ ɛka la anu na ɛnnwu kɛzi wɔ neazo ka awie mɔ la ɛ? Yɛ neazo kpalɛ ne bazɔ Gyihova anye na yeamaa yɛade nganeɛ kɛ ɛzoanvolɛ Pɔɔlo, wɔ mekɛ mɔɔ ɔhanle kɛ: “Bɛva me gyakɛ, kɛmɔ meva Kelaese agyakɛ la.”—1 Kɔl. 11:1.