Edwɛkɛ Mɔɔ Bɛhye—Kɛzi Ɛbava Wɔali Gyima La
1. Saa ɛye yɛ mbuluku ne mɔ ɛsie ahane a, nziezielɛ mɔɔ baboa la boni a yɛlɛ a?
1 Menli dɔɔnwo anye die kɛ bɛbalua jw.org ne azo bɛagenga edwɛkɛ mɔɔ le nɔhalɛ na ɔyɛ anyelielɛ la. (Nol. 12:10) Noko akee, asoo wɔdie edwɛkɛ mɔɔ bɛhye la bie ɔ? Ɛhye bamaa wɔade edwɛkɛ dɔɔnwo wɔ yɛ wɛbsaete ne azo. Kɛzi edwɛkɛ mɔɔ bɛhye la baboa yɛ ɛ?
2. Kɛzi yɛbava edwɛkɛ mɔɔ bɛhye la yɛali gyima wɔ yɛ ti anwo anzɛɛ abusua debiezukoalɛ nu ɛ?
2 Bɛyɛ Bɛmaa Yɛ Kɛ Yɛva Yɛyɛ Yɛ Ti Anwo Anzɛɛ Abusua Debiezukoalɛ: Saa yɛtie Baebolo ne, magazine ne mɔ, anzɛɛ mbuluku bie anu edwɛkɛ mɔɔ bɛhye la wɔ mekɛ mɔɔ yɛlɛtu adenle anzɛɛ yɛlɛyɛ gyima bie la a, ɔbaboa yɛ yeamaa yɛava yɛ mekɛ yɛali gyima kpalɛ. (Ɛfɛ. 5:15, 16) Yɛbahola yɛahakyihakyi kɛzi yɛyɛ yɛ abusua ɛzonlenlɛ ne la anu ɔlua edwɛkɛ mɔɔ bɛhye mɔɔ yɛbadie na yɛava yɛ buluku ɛdeɛ ne yɛali ɛgengalɛ ne anzi la azo. Saa yɛkulo kɛ yɛ ɛgengalɛ yɛ kpalɛ anzɛɛ saa yɛlɛsukoa aneɛ bie a, edwɛkɛ mɔɔ bɛhye mɔɔ yɛbabɔ yɛadie wɔ yɛ ti anwo debiezukoalɛ bo la baboa kpalɛ.
3. Nwane mɔ a wɔ yɛ azɛlɛsinli ne anu mɔɔ bɛbanyia edwɛkɛ mɔɔ bɛhye la azo nvasoɛ a?
3 Daselɛlilɛ Nu: Menli mɔɔ wɔ yɛ azɛlɛsinli ne anu mɔɔ bɛte nganeɛ kɛ bɛnlɛ alagye bɛngenga la bahulo kɛ bɛbadie edwɛkɛ mɔɔ bɛhye la. Anzɛɛ bie a yɛbayia menli mɔɔ ka aneɛ gyɛne mɔɔ anrɛɛ bɛkɛhulo kɛ bɛkɛdie Belemgbunlililɛ edwɛkɛ ne wɔ bɛ “maanle nu aneɛ” nu la. (Gyi. 2:6-8) Wɔ maanle bie mɔ anu, edwɛkɛ ɛdielɛ boka bɛ amaamuo ne anwo. Kɛ neazo la, wɔ Hmongma amaamuo nu, menli ka tetedwɛkɛ kile ngakula na bɛfa edwɛkɛ ne mɔɔ bɛkɛde la bɛsie kpalɛ. Africama dɔɔnwo anye die kɛ bɛbalua nwɔra ɛdolɛ zo bɛazukoa debie.
4. Kpuya boni mɔ a yɛbahola yɛabiza wɔ menli mɔɔ yɛlɛboa bɛ wɔ yɛ azɛlɛsinli ne anu la anwo a?
4 Asoo ɔbayɛ kpalɛ kɛ ɛbabɔ edwɛkɛ mɔɔ bɛhye la wɔamaa suamenle ne adie wɔ ye aneɛ nu wɔ bɛ azɛlɛsinli ne anu ɔ? Asoo yɛ mbuluku ne mɔ anu edwɛkɛ ne mɔɔ bɛhye mɔɔ yɛbava yɛanwa awie wɔ fonu zo la baboa ye ɔ? Yɛbahola yɛahwe edwɛkɛ mɔɔ bɛhye la bie yɛagua CD zo nee nwolɛ buluku ne yɛamaa suamenle ne ɔ? Yɛbabu ɛlɛtɔlɔneke zo buluku, brohyua, magazine anzɛɛ trate biala mɔɔ yɛbava yɛamaa awie wɔ daselɛlilɛ nu la anwo mgbonda. Bɛyɛ edwɛkɛ mɔɔ bɛhye la bɛmaa yɛ kɛ yɛva yɛyɛ yɛ ti anwo debiezukoalɛ na eza yɛva yɛlua Belemgbunlililɛ nɔhalɛ ma ne.—1 Kɔl. 3:6.