Kpuyia Ɛleka

◼ Kɛ ɔkɛyɛ na awie biala aboa amaa yɛadie edwɛkɛ wɔ asafo debiezukoalɛ bo ɛ? (Mɛla. 31:12)

Ɔlua ɛbulɛ kpole mɔɔ yɛlɛ yɛmaa Gyihova nee asafo debiezukoalɛ mɔɔ yeziezie yemaa yɛ la ati, bɛmaa yɛ kɔsɔɔti anwosesebɛ kɛ yɛdwu ɛkɛ ne ndɛ na yɛziezie yɛ nwo yɛmaa ɔhile yɛ debie. Ɔle kpalɛ kɛ yɛtɛnla ɔ nyunlu nehane na yɛgyakyi mbia ne mɔɔ wɔ ɔ nzi la yɛmaa bɛdabɛ mɔɔ bɛlɛ ngakula nee menli mɔɔ ɔyɛ a bɛka amozi la. Kolaa na debiezukoalɛ ne abɔ ɔ bo la, ɔwɔ kɛ yɛnea kɛ yɛ mobile nee ninyɛne mɔɔ ɛha la ɛnrɛgyegye tievolɛma adwenle. Saa menli mɔɔ wɔ debiezukoalɛ ne abo la kɔsɔɔti fi ɛbulɛ nu yɛ ninyɛne a, ngyegyelɛ ne azo bade na yeayɛ ekyi bie.—Nolo. 5:1; Fel. 2:4.

Saa menli mɔɔ le fofolɛ la bɔ ɔ bo kɛ bɛkɔ debiezukoalɛ a, awie mɔɔ wɔ asafo ne anu mɔɔ ze bɛ la bahola ɔ nee bɛ adɛnla. Saa bɛlɛ ngakula mɔɔ ɔwɔ kɛ bɛtete bɛ la a, ɛhye baboa kpalɛ. Bie a kenle mɔɔ lumua mɔɔ abusua ne ɛlɛba debiezukoalɛ la ɛne. Saa ɔle zɔ a, bɛ nye balie nwolɛ kpalɛ kɛ bɛkɛdɛnla ɔ nzi, amaa saa ɔhyia kɛ awovolɛ ne mɔ fi asalo ɛkɛ ne wɔ mekɛ ekyi bie anu na bɛkɔnea bɛ ngakula ne mɔ a yeangyegye awie mɔ adwenle. (Mrɛ. 22:6, 15) Ɔnle kɛ bɛmaa mbusua mɔɔ bɛlɛ ngakula la tɛnla ɛleka gyɛne mɔɔ bamaa ngakula ne mɔ ayɛ dede la. Fane dɔɔnwo ne ala ɔle kpalɛ kɛ awovolɛ finde na bɛtenrɛdenrɛ bɛ mra ne mɔ anzɛɛ bɛdi bɛ ngyianlɛ nwo gyima na bɛazia bɛ nee bɛ aradɛnla aze.

Menli mɔɔ die nyɛvolɛ la bɔ mɔdenle kɛ ngyegyelɛ biala ɛnrɛra ɛleka mɔɔ bɛsonle la. Bɛdwu ɛkɛ ne ndɛ na bɛboa mbusua nee menli mɔɔ ɔyɛ a bɛka amozi la bɛmaa bɛnyia ɛleka mɔɔ fɛta la bɛtɛnla. Menli mɔɔ die nyɛvolɛ la bɔ mɔdenle fa nrɛlɛbɛ di gyima wɔ mekɛ mɔɔ bɛlɛboa awie mɔ bɛamaa bɛanyia ɛleka bɛadɛnla la amaa bɛandwehwe awie mɔ adwenle. Saa ngyegyelɛ bie ba arɛlevilɛ nu a, bɛfa ndelebɛbo kpalɛ bɛdi nwolɛ gyima. Saa kakula bie nyɛleɛ ɛlɛtwehwe awie mɔ adwenle a, bɛfi atiakunlukɛnlɛma nu bɛboa.

Menli mɔɔ kɔ asafo debiezukoalɛ bo kɔsɔɔti la bahola aboa amaa yɛadie Gyihova nee ye anzondwolɛ nee tenlene ewiade fofolɛ bodane ne anwo edwɛkɛ.—Hib. 10:24, 25.