Wɔziezie Ɛ Nwo Wɔmaa Mgbemgbɛnenu Daselɛlilɛ Ɔ?
1. Neazo boni a kile kɛ yɛbahola yɛayɛ mgbemgbɛnenu daselɛlilɛ kpalɛ ɛ?
1 Yɛbahola yɛayɛ mgbemgbɛnenu daselɛlilɛ kpalɛ. Mgbemgbɛnenu daselɛlilɛ mɔɔ debie kpalɛ vi nu rale la anwo neazo dɔɔnwo wɔ Baebolo ne anu. (Dwɔn 4:7-15) Kɛ ɔkɛyɛ na yɛaziezie yɛ nwo yɛamaa daselɛlilɛ ɛhye ɛ?
2. Kɛzi yɛ tɛladeɛ nee yɛ anwoziezielɛ boa maa yɛdi daselɛ ɛ?
2 Tɛladeɛ Nee Anwoziezielɛ: Saa yɛnea yɛ tɛladeɛ nee yɛ anwoziezielɛ zo boɛ dahuu a, ɔbamaa yɛahola yɛaha yɛ diedi ne anwo edwɛkɛ yɛahile awie mɔ mɔɔ yɛnzulo a. (1 Tem. 2:9, 10) Saa yɛte nganeɛ kɛ yɛ anwoziezielɛ ne ɛnle kpalɛ a, ɔnrɛmaa yɛnrɛli awie mɔ daselɛ. Noko akee saa yɛsiezie yɛ nwo kɛnlɛma a, ɔbamaa menli anye alie nwolɛ. Kɛ neazo la, mekɛ bie ɛnee Alasevolɛ mɔɔ bɛle agyalɛma mɔɔ bɛziezie bɛ nwo kɛnlɛma la ɛlɛtu adenle, na bɛdɛnlanle nrenya bie mɔɔ kɔ Ngɛnlamo la anwo ɛkɛ. Mekɛ mɔɔ ɔnwunle bɛ anwoziezielɛ ne la, ɔbizale bɛ kɛ saa bɛle Keleseɛnema a. Ɛhye manle bɛ nee ye lile Baebolo ne anwo adwelie dɔnehwele nsa.
3. Kɛzi Gyisɛse neazo ne ɛboa ɛmaa wɔbɔ adwelielilɛ bo ɛ?
3 Bɔ Adwelielilɛ Bo: Mekɛ mɔɔ Gyisɛse yiale Samɛlea raalɛ ne wɔ Gyekɔbo bula ne azo la, ɔzele ye kɛ ɔmaa ye nzule ne bie ɔnlo ɔvale ɔbɔle adwelielilɛ bo. Yɛdayɛ noko yɛbahola yɛabiza edwɛkɛ anzɛɛ kpuyia sikalɛ yɛava yɛabɔ adwelielilɛ bo. Bie a yɛbahwenlehwenle yɛ bo aze ɛdeɛ, noko saa yɛkpondɛ moalɛ yɛfi Gyihova ɛkɛ a, yɛbanyia “akɛnrasesebɛ” yɛava yɛabɔ adwelielilɛ bo.—1 Tɛs. 2:2.
4. Kɛzi yɛbahola yɛayɛ mgbemgbɛnenu daselɛlilɛ ɛ?
4 Kpondɛ Adenle: Nolobɔlɛma dɔɔnwo ɛkpondɛ ndenle ɛlua zo ɛyɛ mgbemgbɛnenu daselɛlilɛ. Nea gyinlabelɛ mɔɔ ɛwɔ nu la, na suzu menli mɔɔ ɛbahola ɛ nee bɛ ayia alehyenlɛ biala la anwo. Fa mbuluku mɔɔ fɛta la nee Baebolo ekyi ko. Gua ɛ nye aze, na kile menli mɔɔ ɛkɛyia bɛ la anwo anyelielɛ. Saa ɛdumua ɛsuzu ndenle mɔɔ ɛbahola wɔanyia wɔ alehyenlɛ ne anu la anwo a, ɛbahola wɔali daselɛ kɛnlɛma.—Fel. 1:12-14; 1 Pita 3:15.
5. Duzu ati a ɔwɔ kɛ yɛyɛ mgbemgbɛnenu daselɛlilɛ nwo ngyehyɛleɛ ɛ?
5 Nyamenle nee yɛ gɔnwo anwo ɛlɔlɛ le ndelebɛbo kpalɛ nwiɔ mɔɔ bamaa yɛakpondɛ ndenle yɛalua zo yɛayɛ mgbemgbɛnenu daselɛlilɛ a. (Mat. 22:37-39) Kɛmɔ edwɛkɛhanlɛ gyima ne anwo hyia la ati, ɔwɔ kɛ yɛyɛ mgbemgbɛnenu daselɛlilɛ nwo ngyehyɛleɛ. Ɔwɔ kɛ yɛdua adenle biala mɔɔ fɛta mɔɔ yɛbanyia ye la azo yɛka Belemgbunlililɛ ne anwo edwɛkɛ yɛkile awie mɔ wɔ mekɛ mɔɔ mekɛ tɛbɔ nu la.—Wulo. 10:13, 14; 2 Tem. 4:2.