Kɛzi Bɛfa “Nyamenle Ɛhulolɛ” Buluku ne Bɛyɛ Baebolo Ɛzukoalɛ La
1. Bodane boni ati a bɛyɛle “Nyamenle Ɛhulolɛ” buluku ne a?
1 Nea kɛzi yɛ nye liele wɔ “Nyamenle Sunsum Kile Yɛ Adenle” Maangyeba Nyianu ne abo, kɛ yɛ sa hanle buluku fofolɛ ne mɔɔ se “Bɛzie Bɛ Nwo wɔ Nyamenle Ɛhulolɛ ne Anu” la ɛ! Kɛmɔ bɛhanle la, bɛyɛ buluku ɛhye kɛ bɛfa bɛaboa yɛ bɛamaa yɛanwu Gyihova ɛbɛlabɔlɛ nwo ngyinlazo ne mɔ na yɛ nye alie nwolɛ, na tɛ kɛ yɛfa yɛahilehile Baebolo ne anu ninyɛne ngyikyi bie mɔ a. Yɛnrɛva buluku ɛhye yɛnrɛmaa wɔ azua nu daselɛlilɛ nu.
2. Nwane mɔ a yɛ nee bɛ bazukoa buluku ɛhye a?
2 Buluku ɛhye bayɛ buluku mɔɔ tɔ zo nwiɔ mɔɔ Baebolo sukoavoma wie Baebolo ne Kilehile buluku ne a bɛbazukoa a. Kakye kɛ asolo kɛzi menli nyi wɔ sunsum nu la. Ɔwɔ kɛ ɛyɛ debiezukoalɛ biala wɔ adenle mɔɔ baboa sukoavo ne la azo. Ɔwɔ kɛ ɛnwu ye kɛ ɔbade debiezukoalɛ ne abo kpalɛ. Fane dɔɔnwo ne ala, ɔnle kɛ yɛ nee menli mɔɔ bie a bɛzukoa buluku dɔɔnwo wɔ dɛba ne noko bɛngɔ debiezukoalɛ yɛɛ bɛ nye ɛnlie nwo kɛ bɛbava Baebolo ne anu nɔhalɛ ne mɔɔ bɛzukoa la bɛabɔ bɛ ɛbɛla la bɔ Baebolo ɛzukoalɛ bo wɔ buluku ɛhye anu.
3. Saa yɛ nee awie ɛlɛsukoa Sonle Nyamenle buluku ne kɛkala a, duzu a ɔwɔ kɛ yɛyɛ a?
3 Saa ɛ nee awie ɛlɛsukoa Sonle Nyamenle buluku ne kɛkala na yeha tile ekyi na bɛawie a, ɛbahola wɔamaa bɛadoa zo bɛawie zɔhane buluku ne na wɔamaa sukoavo ne anwosesebɛ kɛ ɔ ngomekye ɔgenga “Nyamenle Ɛhulolɛ” buluku ne. Tɛ ye zɔhane a, ɔbayɛ kpalɛ kɛ bɛbagyakyi na bɛava buluku fofolɛ ne bɛabɔ ɔ bo. Kɛmɔ ɔde wɔ Baebolo ne Kilehile buluku ne anwo la, saa ɛkulo a yɛɛ ɛbazuzu edwɛkɛ mɔɔ wɔ mokanwo ne anu la anwo a.
4. Saa bɛsɔne sukoavo ne kolaa na yeawie Baebolo ne Kilehile nee “Nyamenle Ɛhulolɛ” mbuluku ne anu biala sukoa a, duzu a ɔwɔ kɛ yɛyɛ a?
4 Saa bɛsɔne sukoavo ne kolaa na yeawie mbuluku nwiɔ ne anu biala sukoa a, ɛnee ɔwɔ kɛ bɛtoa debiezukoalɛ ne azo toonwo bɛwie “Nyamenle Ɛhulolɛ” buluku ne sukoa. Ɔwɔ nuhua kɛ bɛzɔne sukoavo ne ɛdeɛ, noko ɛbahola wɔabu mekɛ ne, sia kɔkpɔla nee debiezukoalɛ ne anwo mgbonda. Nolobɔlɛnli mɔɔ ɛ nee ye kɛhɔ na ɔkɛnyia debiezukoalɛ ne anu kyɛfoa la noko babu mekɛ ne anwo mgbonda.
5. Kɛzi yɛbava “Nyamenle Ɛhulolɛ” buluku ne yɛaboa nolobɔlɛma mɔɔ bɛgyakyi daselɛlilɛ wɔ mekɛ bie anu la ɛ?
5 Saa Asafo Ɛzonlenlɛ Kɔmatii ne anu sonla ko kpa wɔ kɛ ɛ nee awie mɔɔ ɛyɛ bɛtɛɛ wɔ daselɛlilɛ nu la ɛyɛ Baebolo ɛzukoalɛ a, bɛbamaa ɛ nee ye azuzu edwɛkɛtile titile bie mɔ anwo wɔ “Nyamenle Ɛhulolɛ” buluku ne anu. Ɔnle kɛ bɛyɛ debiezukoalɛ ɛhye mekɛ tendenle. Nea kɛ yɛnyia buluku kɛnlɛma ɛhye mɔɔ bɛziezie kɛ ɔboa yɛ ɔmaa yɛzie yɛ nwo wɔ “Nyamenle ɛhulolɛ ne anu” a!—Dwu. 21.