Kɛlata Mɔɔ Vi Neazo Eku Ne Ɛkɛ
Mediema Gyihova Alasevolɛ:
Nea kɛzi ɔyɛ anyelielɛ kɛ yɛlɛkɛlɛ bɛ kɛlata ɛhye a! Yɛte nganeɛ kɛ ɛzoanvolɛ Dwɔn mɔɔ hanle ɔ gɔnwo mɔ diedima anwo edwɛkɛ kɛ, ‘ɔkulo bɛ nɔhalɛ nu kpole kpalɛ’ na ɔ nye liele kɛ ‘bɛli nɔhalɛ ne anzi’ la. (2 Dwɔn 1, 4) O, nea kɛzi nɔhalɛ ne ɛyɛ nyilalɛ ɛmaa yɛ kɔsɔɔti ɛ! Nɔhalɛ ne ɛmaa yɛnyia fanwodi yɛvi Babelɔn Kpole ne nee ye ngilehilelɛ yɛɛ amaamuo ngakyile mɔɔ ɛnli Nyamenle eni la anwo. Nɔhalɛ ne anwo tieyɛ mɔɔ yɛyɛ la ɛboa yɛ ɛmaa yɛyɛ menli mɔɔ yɛlɛ ɛlɔlɛ, atiakunlukɛnlɛma nee anwunvɔnezelɛ a. Nɔhalɛ ne ɛbuke nwolɛ adenle ɛmaa yɛnyia gyinlabelɛ kpalɛ wɔ Nyamenle anyunlu nee dahuu ngoane nwo anyelazo.
Nea anyezɔlɛ kpole noko mɔɔ yɛlɛ wɔ Gyihova sunsum ne, mɔɔ alehyenlɛ biala ɔkile yɛ adenle na ɔmaa yɛ anwosesebɛ la anwo a! Yɛdie yɛdi kɛ bɛ nye liele nziezielɛ ɛhye mɔɔ Gyihova vi ɛlɔlɛ nu ɛva ɛmaa yɛ mɔɔ bɛhanle ye afoa ngakyile nwo edwɛkɛ wɔ “Nyamenle Sunsum Kile Yɛ Adenle” Maangyeba Nyianu ne mɔɔ bɛyɛle ye kenlensa ye la anwo. Mekɛ mɔɔ ewiade ye tɛnlabelɛ ne anu ɛlɛyɛ se la, ɔhyia kɛ yɛfa yɛ rɛle yɛwula Gyihova sunsum ne mɔɔ tumi kpole wɔ nu la anu na yɛmaa ɔkile yɛ adenle wɔ mekɛ ɛsesebɛ mɔɔ la yɛ nyunlu la anu.
Yɛlɛ anwodozo kɛ yɛ mediema mɔɔ ɛgyinla amaneɛnwunlɛ dɔɔnwo anloa ɔlua bɛ diedi ne ati la anwo edwɛkɛ mɔɔ wɔ Yearbook ne anu mɔɔ bɛgenga la ɛha bɛ ahonle. Ɔyɛ nwanwane kɛ yɛkɛzuzu nwo kɛ mediema ɛhye mɔ mɔɔ bɛlile nɔhalɛ la anu dɔɔnwo le mɔɔ bɛzɔnenle bɛ la yeangyɛ biala anzɛɛ ɛnee bɛtɛsɔnenle bɛ bɔbɔ yɛɛ ngyegyelɛ ɛhye mɔ dole bɛ a. Nea kɛzi yɛ nye die bɛ nɔhalɛlilɛ nee tenleneyɛlɛ mɔɔ bɛgyinlanle ɔ nzi kpundii la anwo a! Nɔhalɛ nu, bɛ neazo kɛnlɛma ne ɛmaa yɛnyia anwosesebɛ wɔ kpɔkɛ mɔɔ yɛbɔ kɛ yɛkɔ zo yɛali nɔhalɛ yɛamaa Belemgbunlililɛ ne ɔnva nwo ɛkpɔlɛ biala mɔɔ kɛra yɛ nwo zo la.—1 Tɛs. 1:6-8.
Mediema mrenya nee mraalɛ, yɛze kɛ ezukoa afoa nu ngyegyelɛ nee ngyegyelɛ gyɛne dɔɔnwo wɔ ɛkɛ mɔɔ ɔwɔ kɛ bɛgyinla ɔ nloa, na bɛahola bɛaha bɛ mbusua bɛabɔ nu wɔ ɛlɔlɛ nu. Ɔyɛ se ɔmaa bɛ bie mɔ kɛ bɛbahola bɛaboa Belemgbunlililɛ nolobɔlɛ gyima ne nee asafo gyima ngakyile mɔɔ hyia la dahuu. Ɛhye ati a, mekɛ mɔɔ yɛvale asɔneyɛlɛ yɛzuzule ninyɛne dɔɔnwo anwo la yɛyɛ nzenzaleɛ wɔ asafo debiezukoalɛ ngyehyɛleɛ ne anu ɔvi January 1, 2009 mɔɔ ba la. Yɛlɛ anyelazo kɛ bɛbava ngyehyɛleɛ ɛhye bɛali gyima kpalɛ, amaa bɛanyia mekɛ dɔɔnwo bɛava bɛayɛ bɛ ti anwo nee abusua debiezukoalɛ.
Wɔ nyianu ngyikyi nee mgbole ngakyile mɔɔ bɛyɛle ye ɛkenle ɛvolɛ ne la anu, yɛ nye liele kɛ yɛnwunle menli dɔɔnwo mɔɔ ɛnee fɛta kɛ bɛsɔne bɛ la. Ɛnee bɛ nuhua bie mɔ le ngakula. Ɔwɔ kɛ yɛkanvo awovolɛ mɔɔ tetele bɛ mra manle bɛnyianle nɔhalɛ ne anwo anyezɔlɛ na bɛmanle bɛ anwosesebɛ bɛmanle bɛyilale bɛ nwo zo wɔ bɛ ngakula nu la. Kɛmɔ ngakula ɛhye mɔ yia ngyegyelɛ dɔɔnwo wɔ sukulu noko bɛfɛta kɛ bɛsɔne bɛ la kile kɛ bɛnyianle ndetelɛ kpalɛ wɔ sua nu.—Edw. 128:1-6.
Debie bieko mɔɔ yɛkulo kɛ yɛka nwolɛ edwɛkɛ la a le Baebolo ɛzukoalɛ ne mɔɔ ɛnyia anyuhɔlɛ kɛnlɛma la—na yɛ edwɛkpatɛlɛvoma nee adekpakyelɛ titilema mɔɔ bɔ mɔdenle la a manle yɛnyianle anyuhɔlɛ ɛhye a. Yɛdayɛ mɔɔ yɛwɔ Neazo Eku ne anu la kɔsɔɔti anye sɔ mɔdenle mɔɔ yɛ mediema mrenya nee mraalɛ ɛlɛbɔ aha ahile ahonlekpalɛma kɛ ‘Bɛrɛla!’ nee ɛsalɛ mɔɔ bɛlɛto bɛavɛlɛ bɛdabɛ mɔɔ nzuhɔne ɛlɛku bɛ kɛ “bɛralie nzule mɔɔ maa ngoane la bɛnlo” la. (Yek. 22:17) Yɛfa anyelielɛ yɛayɛ menli 289,678 mɔɔ vale nzule nu ɛzɔnenlɛ yɛle bɛnwozoyilalɛ ne anwo sɛkɛlɛneɛ ɛkenle ɛvolɛ ne la akoaba yɛara asafo ne anu!
Ɔle kpalɛ kɛ yɛkakye ɛzoanvolɛ Dwɔn edwɛkɛ mɔɔ ɔhɛlɛle kɛ: “Ewiade nee nuhua atiakunluwɔzo ninyɛne ne mɔ amuala bapɛ nu aze, na sonla ne mɔɔ yɛ Nyamenle ɛhulolɛdeɛ la de aze dahuu” la. (1 Dwɔn 2:17) Kɛkala, yɛwɔ mekɛ mɔɔ ɔnrɛhyɛ ewiade ɛhye “bapɛ nu aze” la anu! Nea kɛzi nrɛlɛbɛ wɔ nu kɛ yɛfa yɛ ɛbɛlabɔlɛ kɔsɔɔti yɛyɛ Nyamenle ɛhulolɛdeɛ na ‘yɛsinza’ ɛ. (Mat. 24:42) Saa yɛyɛ zɔhane a, yɛnrɛnlu yɛ nwo ɛlɛ, na yɛbanyia Gyihova ɛhulolɛ kpundii ne azo nyilalɛ.—Aye. 63:7.
Yɛlɛ anyelazo kɛ edwɛkɛ mɔɔ yɛ anyelielɛ mɔɔ vi maanle ngakyile nu mɔɔ wɔ Yearbook ne anu la bamaa bɛ kɔsɔɔti anwosesebɛ yeamaa bɛava Belemgbunlililɛ ne balumua wɔ bɛ ɛbɛlabɔlɛ nu. Yɛkulo kɛ bɛnwu kɛ dahuu yɛdwenle bɛ nwo na yɛyɛ asɔne yɛmaa bɛ na ɛhye kile kɛ yɛ nye die bɛ nwo somaa. Yɛsɛlɛ Gyihova kɛ ɔyila bɛ kpole kpalɛ.
Bɛ mediema,
Gyihova Alasevolɛ Neazo Eku