Bɛ Ti Anwo nee Abusua Baebolo Ɛzukoalɛ Hyia!
1. Duzu ati a Neazo Eku ne dwenle yɛ nwo titile wɔ mekɛ ɛhye anu ɛ, na kɛmɔti ɛ?
1 Neazo Eku ne dwenle Gyihova menli boɛyɛlɛ nwo kpole kɛmɔ ɛnee ɔde wɔ ɛvoyia ne mɔɔ lumua la anu la. (Gyi. 15:6, 28) Mekɛ mɔɔ amaneɛnwunlɛ kpole ne ɛlɛbikye la, ɔhyia kpalɛ kɛ Belemgbunlililɛ nolobɔlɛnli biala nee Gyihova nyia agɔnwolɛvalɛ mɔɔ anu yɛ se la. Kɛzi ɛbava mekɛ mɔɔ ɛnee bɛfa bɛyɛ Asafo Buluku Debiezukoalɛ la wɔali gyima ɛ? Bɛlɛmaa mediema kɔsɔɔti anwosesebɛ kɛ bɛva mekɛ ɛhye bɛyɛ abusua debiezukoalɛ. Saa yɛfa mekɛ ɛhye yɛdi gyima nrɛlɛbɛ nu a, ɔbamaa yɛazukoa Nyamenle Edwɛkɛ ne mɔɔ vi sunsum nu la yɛahɔ moa na yɛanyia ye ngilehilelɛ ne azo nvasoɛ.—Edw. 1:1-3; Wulo. 11:33, 34.
2. Kɛzi yɛbahola yɛayɛ yɛ abusua nɔsolɛ debiezukoalɛ ngyehyɛleɛ ne ɛ?
2 Abusua Nɔsolɛ Debiezukoalɛ: Bɛlɛmaa abusua tilema anwosesebɛ kɛ ɔwɔ kɛ bɛdi ɛzonle mɔɔ la bɛ nwo zo wɔ Gyihova anyunlu la anwo gyima, na bɛnea kɛ bɛbayɛ Baebolo ɛzukoalɛ mɔɔ yɛ anyelielɛ na ɔkɔ zo dahuu la anwo ngyehyɛleɛ. (Mɛla. 6:6, 7) Mediema mrenya nee mraalɛ mɔɔ bɛtɛgyale na bɛnlɛ abusua nu ɛzonlelilɛ la bahola ava mekɛ ɛhye ayɛ bɛ ti anwo Baebolo ɛzukoalɛ nee neɛnleanu. Ɔhyia kɛ yɛ muala ‘yɛnyia alagye wɔ adenle biala anu’ yɛfa yɛsukoa na yɛdwenledwenle nwolɛ, amaa yɛanyia sunsum nu anwosesebɛ mɔɔ hyia wɔ “ɛtanelilɛ mekɛ” ɛhye anu la.—Ɛfɛ. 5:15, 16.
3, 4. Nzuzulɛ boni a bɛva bɛmaa wɔ ninyɛne mɔɔ yɛbahola yɛazukoa la anwo a, na duzu a ɔwɔ kɛ yɛkakye a?
3 Mɔɔ Ɛbazukoa: The Watch Tower Publications Index anzɛɛ Watchtower Library wɔ CD-ROM zo baboa wɔ yeamaa wɔanyia edwɛkɛ mɔɔ yɛ anyelielɛ la. Mbusua bahola azukoa The Watchtower, ne anu edwɛkɛ mɔɔ ba dahuu mɔɔ le kɛ “Keys to Family Happiness,” “Teach Your Children,” yɛɛ “For Our Young People.” Eza edwɛkɛ mɔɔ se, “Young People Ask” yɛɛ abɔdeɛ mɔɔ yɛ nwanwane la anwo edwɛkɛ mɔɔ yɛ anyelielɛ la wɔ Awake! nu.
4 Baebolo mɔɔ bɛkenga ye bɛtɛɛ la kola maa ngyinlazo nee ɛzukoalɛdeɛ kpalɛ ka abusua ne anu amra kɔsɔɔti adwenle nu na ɔka bɛ ahonle. (Hib. 4:12) Ɔdwu mekɛ ne bie a, bɛbahola bɛanlea video mɔɔ ahyehyɛdeɛ ne ɛyɛ la ko na bɛazuzu nwolɛ. Adenle dɔɔnwo wɔ ɛkɛ mɔɔ ɛbahola wɔalua zo wɔamaa debiezukoalɛ ne ayɛ anyelielɛ a. Duzu ati a ɛmbiza wɔ abusua ne anu amra ɛmmaa bɛnga mɔɔ bɛ nye balie nwo la bɛngile wɔ ɛ?
5. Kɛmɔti a bɛ ti anwo nee abusua Baebolo ɛzukoalɛ hyia kpole wɔ yɛ ɛbɛlabɔlɛ nu ɛnɛ ɛ?
5 Deɛmɔti Nwolɛ Hyia Ɛnɛ La: Saa yɛmaa yɛ sunsum nu gyinlabelɛ ne anu mia a, ɔbaziezie yɛ yeamaa ‘yɛagyinla kpundii na yɛanlea kɛzi Gyihova balie yɛ la.’ (Ade. 14:13) Ɔhyia kɛ awovolɛ nyia adehilelɛ fi Nyamenle ɛkɛ na bɛava bɛatete bɛ mra wɔ “adalɛ nee ɛtane ewiade ye anu.” (Fel. 2:15) Ngakula hyia moalɛ na bɛahola bɛagyinla ɛbɛlatane mɔɔ ɛlɛkɔ zo wɔ sukulu ne mɔ anu la anloa. (Mrɛ. 22:3, 6) Ɔle kpalɛ kɛ agyalɛma maa Gyihova boka bɛ nwo wɔ agyalɛ ne anu na yeayɛ “nyɛma bɔ nwolɛ nsa a nuhua ɛdelɛ ɛnla aze.” (Nolo. 4:12) Ɛnee bɛmaa yɛ muala yɛva mekɛ ne mɔɔ ɛha la yɛli gyima kpalɛ, amaa yɛagyinla kpundii wɔ yɛ “diedi nwuanzanwuanza ne anu”!—Dwu. 20.