kpuyia Ɛleka

◼ Asoo ɔle kpalɛ kɛ Gyihova Dasevolɛ kɛlie ayile na ɔkɛmaa bɛkɛnlea ye wɔ asopiti anzɛɛ ɛleka mɔɔ bɛwo mɔɔ ɛzonlenlɛ ɛku bie a ɛbuke la?

Ɛzonlenlɛ ɛku ngakyile ɛbuke asopiti anzɛɛ ɛleka mɔɔ bɛwo mɔɔ maa ayile anzɛɛ bɛnea menli mɔɔ ɛnde kpɔkɛ la. Fane dɔɔnwo ne ala bɛnyɛ ɛleka ɛhye mɔ kɛ bɛfa bɛaboa Babelɔn Kpole ne wienyi. (Yek. 18:2, 4) Bie a mɔlebɛbo ne bɛte kɛ bɛfa bɛaboa ɛzonlenlɛ ɛku bie bɛamaa yeanyia ezukoa. Ɛnɛ, asopiti bie mɔ wɔ ɛkɛ a ɛzonlenlɛ bie mɔ duma ala a la zo a, yɛɛ bie mɔ noko wɔ ɛkɛ a ɛsɔfo ne mɔ yɛ gyima wɔ ɛkɛ.

Saa Gyihova Dasevolɛ kpondɛ kɛ ɔkɔ asopiti anzɛɛ bɛnea ye a, ɔwɔ kɛ ɔsi ɔ ti anwo kpɔkɛ kɛ saa ɔkɛhɔ asopiti mɔɔ ɛzonlenlɛ bie duma la zo la a. Awie adwenle bahola amaa yeayɛ zɔ noko awie gyɛne adwenle ɛnrɛmaa ɔnrɛhɔ. (1 Tem. 1:5) Gyinlabelɛ bie mɔ wɔ ɛkɛ mɔɔ kola ka awie kpɔkɛzilɛ a na ɔwɔ kɛ yɛsuzu ɛhye mɔ anwo.

Kɛ neazo la, bie a asopiti anzɛɛ ɛleka mɔɔ bɛwo mɔɔ ɛzonlenlɛ bie duma la zo ala la a wɔ ɛkɛ a. Anzɛɛ saa bieko wɔ ɛkɛ a, ko ne mɔɔ ɛzonlenlɛ bie duma la zo la maa ayile kpalɛ. Bie a asopiti zɛhae mɔɔ ɛzonlenlɛ bie duma la zo la a bahola ayɛ ewule bie ayile a, anzɛɛ yemɔ ala a le asopiti mɔɔ wɔ dɔketa ne bahola ayɛ wɔ ayile wɔ ɛkɛ a. Bieko, ɔdwu mekɛ ne bie a, asopiti mɔɔ ɛzonlenlɛ bie duma la zo la kola die wɔ kpɔkɛ mɔɔ wɔzi wɔ mogya nwo kɛ keleseɛnenli la to nu wɔ mekɛ mɔɔ bie a asopiti gyɛne anzɛɛ arane deɛ ɛnrɛyɛ zɔ la. Ɛhye a le edwɛkɛ bie mɔ mɔɔ ɛbahola wɔazuzu nwolɛ wɔ mekɛ mɔɔ ɛlɛsi asopiti mɔɔ ɛbahɔ la anwo kpɔkɛ la.

Saa ɛsi kpɔkɛ kɛ ɛbahɔ asopiti anzɛɛ ɛleka mɔɔ bɛwo mɔɔ ɛzonlenlɛ bie duma la zo a, ɛbahola wɔabu ye kɛ ɛlɛtua gyima mɔɔ bɛyɛ bɛmaa wɔ la anwo kakɛ ala. Ɛbahola wɔabu ye kɛ ɛzonlenlɛ ɛku ne ɛbuke gyima bie, na saa ɛtɔ debie ɛfi gyima ɛhye anu a, ɔngile kɛ ɛlɛye ndoboa wɔaboa adalɛ ɛzonlenlɛ fɔɔnwo, ɛlɛtua debie mɔɔ wɔdɔ la anwo kakɛ ala.

Nɔhalɛ nu, kɛ keleseɛnenli la, wɔ gyinlabelɛ zɛhae anu ɔwɔ kɛ ɛnea ɛnwu ye kɛ ɛnrɛva ɛ nwo ɛnrɛwula adalɛ ɛzonlenlɛ nu. Bieko, ɔnle kɛ ɛfa ɛzonlenlɛ nu amodinli mɔɔ le kɛ “Father” anzɛɛ “Sister” la ɛfɛlɛ menli mɔɔ yɛ gyima anzɛɛ bɛba asopiti ɛkɛ ne la. (Mat. 23:9) Ɔwɔ kɛ ɛnwu ye kɛ gyima ti a ɛhɔle ɛkɛ ne a, yɛɛ ɛhɔle kɛ ɛkalie ayile na debie bieko ɛmboka ye.

Saa bɛto wɔ wɔ asopiti ɛkɛ ne a ɛbahola wɔamaa bɛanwu kɛ ɛle Gyihova Dasevolɛ na ɛ nye balie kɛ wɔ asafo nu mgbanyima barakpɔla wɔ. Ɛhye bamaa wɔanyia sunsum nu moalɛ wɔ mekɛ mɔɔ ɛla ɛkɛ ne la.—1 Tɛs. 5:14.

Mediema mɔɔ wɔ abusua ne anu, asafo ne anu mgbanyima nee mediema gyɛne ɔwɔ kɛ bɔ mɔdenle maa mediema mraalɛ nee mrenya biala mɔɔ bɛyɛ mgbanyimaa mɔɔ bɛdo bɛ wɔ asopiti mɔɔ ɛzonlenlɛ bie duma la zo la asa ka bɛ sunsum nu ngyianlɛ. Saa bɛbɔ mɔdenle bɛyɛ ɛhye a, ɔbamaa menli ɛhye mɔ anyia anwosesebɛ na bɛanva bɛ bɛamboka nyamenlezonlenlɛ nu debieyɛlɛ, ɛvoyialilɛ anzɛɛ debie gyɛne biala mɔɔ bɛyɛ ye wɔ ɛkɛ ne la anwo.

Mekɛ mɔɔ edwɛkɛ ɛhye mɔ wɔ yɛ adwenle nu la, ɔwɔ kɛ awie biala suzu gyinlabelɛ mɔɔ bɛha nwolɛ edwɛkɛ la anwo na ɔsi asopiti anzɛɛ ɛleka mɔɔ bɛwo mɔɔ ɔbahɔ la anwo kpɔkɛ, ɔluakɛ awie biala ɔdaye ɔbazoa ye adesoa.—Gal. 6:5.