Wɔ Abusua ne Ɛlɛboɔboa Ɔ Nwo Amaa Ngoanelielɛ Ɔ?

¹ Baebolo ngapezo mɔɔ ɛra nu la di daselɛ wienyi kɛ ewiade ɛtane ɛhye awieleɛ ɛbikye ndɛndɛ. Ɛnɛ yɛwɔ anwongyelelɛ mekɛ mɔɔ nee mekɛ mɔɔ ɛnee lumua Azuyilɛ ne anyunlu le ko la anu. (Mat. 24:37-39) Nowa nyianle ɔ ti wɔ zɔhane ewiade ne ɛzɛkyelɛ nu, ɔluakɛ “ɔ nee Nyamenle bɛ avinli ande ɛlɛ.” (Mɔl. 6:9) Nowa hilehilele ye abusua ne mɔɔ Gyihova kpondɛ kɛ bɛyɛ la, ɔluakɛ bɛdabɛ noko bɛnyianle ngoane. Adenle boni azo a yɛbahola yɛazukoa Nowa na yɛaboɔboa yɛ nwo kɛ abusua amaa yɛanyia ngoane wɔ ewiade ɛhye awieleɛ ne anu a?

² Ɔbɔle Pɛlepɛlelilɛ nwo Nolo: Nowa hɔle zo vale ɛvolɛ kɛyɛ 40 kɔdwu 50 “bɔle . . . pɛlepɛlelilɛ nwo nolo.” (2 Pita 2:5) Ɔ gɔnwo mɔ mɔɔ bie a zukoale anwumabɔvolɛ ne mɔ mɔɔ hakyile bɛ nwo menli la golole ɔ nwo. Menli dɔɔnwo ta yɛ anyetele wɔ yɛ daselɛlilɛ ne anwo na bɛgolo yɛ nwo bɛmaa ɔda ali kɛ ewiade ɛtane ɛhye awieleɛ ɛbikye. (2 Pita 3:3, 4) Noko akee, mɔɔ nee Nowa mekɛ zo amra ɛdeɛ ne ɛnle ko la, menli dɔɔnwo ɛlɛtie yɛ edwɛkɛ ne, yɛɛ ‘bɛlɛnriandi’ bɛara Gyihova ɛzonlenlɛ nu. (Aye. 2:2) Saa yɛkɔ zo yɛka edwɛkɛ ne a, ‘yɛkɛlie yɛ nwo nee bɛdabɛ mɔɔ bɛtie yɛ la ngoane.’ (1 Tem. 4:16) Nea kɛzi ɔhyia kɛ awovolɛ kɛlua bɛ edwɛkɛ mɔɔ bɛka nee bɛ neazo zo kɛhilehile bɛ mra kɛmaa bɛkɛnwu kɛ daselɛlilɛ gyima ne anwo hyia a!—2 Tem. 4:2.

³ Ɔyɛle “Debie Biala”: Ngoane mɔɔ Nowa nee ye abusua ne nyianle la ɛnee gyi Gyihova adehilelɛ mɔɔ bɛdiele ye kpalɛ la azo. (Mɔl. 6:22) Nwolɛ hyia ɛnɛ noko kɛ ‘yɛka yɛ nwo aze na yɛtie’ adehilelɛ mɔɔ vi Baebolo ne anu nee akɛlɛ eku ne ɛkɛ ne la. (Gye. 3:17) Ngakula mɔɔ bɛnyi ekyi wɔ abusua ko anu la hanle kɛzi bɛ papa vale adehilelɛ mɔɔ vi Gyihova ahyehyɛdeɛ ne ɛkɛ lile gyima la anwo edwɛkɛ. Kɛ neazo la, dapɛne biala ɔyɛ abusua debiezukoalɛ, na ɔ nee bɛ kɔ daselɛlilɛ dapɛne awieleɛ kɛmɔ bɛhile la. Ɔbɔle mɔdenle kɛ ɔ nee ɔ ra ko kɛhɔ daselɛlilɛ dapɛne biala. Mɔdenle mɔɔ ɔbɔle ɔyɛle “debie biala” la hanle ngakula ne mɔ ahonle, na ngakula nsia ne amuala nyinle na bɛzonlenle Gyihova nɔhalɛ nu.

⁴ Ewiade ɛhye awieleɛ bara ndɛndɛ. (Luku 12:40) Saa yɛsukoa Nowa na yɛnyia diedi wɔ ngoanelielɛ ne anu a, yɛ nee yɛ abusua ne baziezie yɛ nwo bɔkɔɔ amgba!—Hib. 11:7.