Bɛha Edwɛkɛ ne Mɔɔ Bɛngyakyi
1 Ɔdwu mekɛ ne bie a, yɛkola yɛte nganeɛ kɛ yɛyɛ yɛ azɛlɛsinli ne anu gyima kpalɛ fane dɔɔnwo noko bɛndie edwɛkɛ ne. Noko ninyɛne dɔɔnwo wɔ ɛkɛ mɔɔ ɔti ɔwɔ kɛ yɛkɔ zo yɛka edwɛkɛ ne a.—Mat. 28:19, 20.
2 Amaa Yeayɛ Daselɛlilɛ: Gyisɛse hanle dole ɛkɛ ne kɛ Belemgbunlililɛ ne anwo edwɛkɛhanlɛ ne bayɛ “awieleɛ ne” anwo sɛkɛlɛneɛ ne anu debie titile, na bɛbayɛ bɛamaa “yɛayɛ daselɛlilɛ yeamaa aleɛabo amra.” (Mat. 24:3, 14) Saa menli nwu kɛ yɛlɛbɔ Belemgbunlililɛ edwɛkpa ne nolo a, ɔdi bɛ daselɛ kpole. Saa bɛandie edwɛkɛ ne bɔbɔ na yɛfi ɛkɛ ne yɛkɔ a, bie a menli ne baha yɛ ɛkpɔlalɛ ne anwo edwɛkɛ wɔ mekɛ dɔɔnwo anu. Saa yɛ nye die deɛmɔti yɛkɔ daselɛlilɛ la anwo a, ɔbaboa yɛ yeamaa yɛahɔ zo yɛaha edwɛkɛ ne. Saa yɛkɔ zo yɛboa yɛmaa Baebolo ngapezo ba nu ɔlua daselɛlilɛ nee ɛzɛkyelɛ ne mɔɔ ɛlɛba la anwo kɔkɔbɔlɛ zo a, ɛnee yɛlɛsɔ Gyihova anye.—2 Tɛs. 1:6-9.
3 Ɔhyia Abotane: Kɛmɔ ninyɛne dɔɔnwo twetwe menli adwenle na bɛnlɛ alagye la ati, ɔhyia kɛ yɛnyia abotane wɔ mekɛ mɔɔ yɛlɛboa bɛ yɛamaa bɛ nye alie edwɛkɛ ne anwo la. Alasevolɛ bie kpɔlale raalɛ ko dapɛne biala dedee ɛvolɛ ko kolaa na yeakponle zo kɛ ɔ nee bɛ kɛzuzu Baebolo ne anwo. Ɔ nye liele mɔɔ ɔdele la anwo somaa, yemɔti ɔmanle bɛ nee ye yɛle Baebolo ɛzukoalɛ, ɔbɔle ɔ bo ɔhɔle debiezukoalɛ na yeangyɛ ɔhanle kɛ ɔkulo kɛ bɛsɔne ye.
4 Ewiade gyinlabelɛ ne ɛlɛkakyi ndɛndɛ, Menli mɔɔ dɛba ne ɛnee bɛmkponle kɛ yɛkɛkpɔla bɛ la, ɛnɛ kulo kɛ bɛtie anyelazo edwɛkɛ kɛnlɛma ne mɔɔ yɛka la. Saa sonla kokye tie Belemgbunlililɛ nrɛlaleɛ ne a, ɛnee ɔfɛta kɛ yɛzile abotane a.
5 Ewiade amuala, menli dɔɔnwo “ɛlɛdi nyane wɔ munzule ɛbɛla mɔɔ bɛbɔ wɔ zolɛ la anwo.” (Yiz. 9:4) Mɔɔ vi Belemgbunlililɛ ne anwo edwɛkɛhanlɛ ne anu ɛra la di daselɛ kɛ menli mɔɔ lɛ ahonle kpalɛ la ɛlɛtie Belemgbunlililɛ nrɛlaleɛ ne. (Aye. 2:2, 3) Ɛhye ati bɛmaa yɛhɔ zo yɛha edwɛkɛ ne mɔɔ yɛngyakyi, na yɛzi abotane yɛvi ɛlɔlɛ nu yɛva “nrɛlaleɛ kpalɛ” yɛmaa bɛ.—Aye. 52:7; Gyi. 5:42.