Kpuyia Ɛleka

◼ Asoo ɔfɛta kɛ mediema bɔ bɛ sa nu wɔ Teokelase Ɛzonlenlɛ Sukulu nee Ɛzonlenlɛ Nyianu foa biala mɔɔ bɛkɛyɛ la anwo?

Mekɛ mɔɔ Gyihova, mɔɔ le Bɔvolɛ ne bɔle azɛlɛ ye la, “aleɛbahye nwɔlɔra bɔle nu dole edwɛne, na Nyamenle amra kɔsɔɔti vale fɛlɛkolilɛ deɛdeanle nu.” (Dwo. 38:7) Nyamenle amra ne mɔ nyianle ɛhulolɛ kɛ bɛye Gyihova ayɛlɛ wɔ ye abɔdeɛ nwanwane gyima ne mɔɔ lale ye nrɛlɛbɛ, kpalɛyɛlɛ nee tumi ali wɔ adenle fofolɛ zo la anwo.

Ɔle kɛnlɛma kɛ yɛdayɛ noko yɛkɛhile anyezɔlɛ wɔ mɔdenle mɔɔ yɛ mediema bɔ maa ɛdendɛlɛ la anwo. Kɛ neazo la, saa yɛkɔ nyianu ngakyile le kɛ maanzinli nee maangyeba nyianu a, yɛta yɛbɔ yɛ sa nu wɔ mekɛ mɔɔ mediema kɛdendɛ anzɛɛ kɛyɛ gyimalilɛ bie la. Ɔhyia mekɛ dɔɔnwo na bɛava bɛaziezie afoa biala mɔɔ bɛyɛ la. Yɛ sa nu mɔɔ yɛbɔ la kile kɛ yɛ nye sɔ gyima ɛsesebɛ mɔɔ bɛyɛ bɛsiezie bɛ nwo na eza ɔkile kɛ yɛ nye sɔ Gyihova nee adehilelɛ mɔɔ ɔlua ye Edwɛkɛ nee ye ahyehyɛdeɛ ne azo ɔlɛfa yeamaa yɛ la.—Aye. 48:17; Mat. 24:45-47.

Na yɛ sa nu mɔɔ yɛbɔ wɔ mekɛ mɔɔ bɛkɛyɛ Teokelase Ɛzonlenlɛ Sukulu nee Ɛzonlenlɛ Nyianu foa bie la ɛ? Saa sukoavo bie yɛ ye gyimalilɛ mɔɔ lumua wɔ sukulu ne anu, na ɔka awie ahonle ɔmaa ɔbɔ ɔ sa nu a, mɛla biala ɛndua ɛhye. Noko akee, bɛ sa nu ɛbɔlɛ bahola ayɛ debie mɔɔ bɛyɛ ye mgbane ala. Ɛhye ati, yɛnda yɛmbɔ yɛ sa nu wɔ mekɛ mɔɔ bɛkɛyɛ foa bie la.

Ɔwɔ nuhua kɛ yɛnda yɛmbɔ yɛ sa nu wɔ Teokelase Ɛzonlenlɛ Sukulu nee Ɛzonlenlɛ Nyianu ne anu ɛdeɛ, noko ndenle ngakyile wɔ ɛkɛ mɔɔ yɛ muala yɛbahola yɛalua zo yɛahile anyezɔlɛ wɔ ngilehilelɛ ne nee bɛdabɛ mɔɔ bɛbɔ mɔdenle bɛyɛ la anwo a. Yɛkola yɛtɛnla aze koonwu yɛtie edwɛkɛ mɔɔ bɛlɛka la yɛfa yɛkile anyezɔlɛ mɔɔ yɛlɛ la. Saa yɛkpɔne debiezukoalɛ ne a, yɛkola yɛkɔ ahenle anwo ɛkɛ na yɛkanvo ye wɔ ye mɔdenlebɔlɛ ne anwo.—Ɛfɛ. 1:15, 16.