“Bɛbɔ Ɛbɛla Kpalɛ wɔ Adenle Biala Anu”
1 Mekɛ mɔɔ Gyisɛse bɔle daselɛlilɛ gyima ne abo fofolɛ la, ɔdɔle alagye ɔzieziele ye ɛdoavolɛma ne. (Mat. 10:5-14) Ɔwɔ nuhua kɛ yɛ muala yɛnlɛ alagye ɛdeɛ, noko saa yɛnyia mekɛ ekyi yɛfa yɛsiezie yɛ nwo kolaa na yɛahɔ sua nu nee sua nu daselɛlilɛ ne a, ɔbamaa yɛabu ma kpalɛ dɔɔnwo wɔ nu.—2 Kɔl. 9:6.
2 Kɛzi Bɛsiezie Bɛ Nwo: Mbuluku mɔɔ yɛbava yɛamaa mɔɔ yɛbanwu nuhua edwɛkɛ ne kpalɛ la kile kɛ yɛziezie yɛ nwo. Eza ɔwɔ kɛ yɛsuzu menli mɔɔ wɔ yɛ azɛlɛsinli ne anu la anwo. Edwɛkɛ boni a gyegye bɛ a? Diedi boni a bɛlɛ a? Yɛbahola yɛanlea nzuzulɛ mɔɔ wɔ Yɛ Belemgbunlililɛ Gyima ne nee Reasoning From the Sciptures ne anu la, amaa yɛanwu mɔɔ ɔwɔ kɛ yɛka a.
3 Saa yɛtie yɛkile mɔɔ bɛyɛ ye wɔ Ɛzonlenlɛ Nyianu ne anu la a, ɔdaye noko ɔbaboa yɛ. Saa yɛnwu edwɛkɛ mɔɔ yɛbaha la a, yɛbava mekɛ ekyi bie ala a yɛaziezie yɛ nwo a. Noko akee, kolaa na yɛahɔ daselɛlilɛ mekɛ biala la, saa yɛsuzu mɔɔ yɛbaha la anwo na yɛkɔ zo yɛsiezie yɛmaa ɔyɛ kɛnlɛma a, yɛbanyia anyuhɔlɛ. Eza ɔwɔ kɛ yɛnyia mekɛ ekyi yɛnea kɛ mbuluku mɔɔ yɛbava yɛahɔ daselɛlilɛ la wɔ yɛ baage ne anu.
4 Duzu a bamaa yɛahakye edwɛkɛ mɔɔ yɛbaha la? Saa yɛka ye yɛ nloa a, ɔbamaa yeaha yɛ ti anu. Bie mɔ sukoa mɔɔ bɛbaha la wɔ bɛ abusua debiezukoalɛ bo. Bie mɔ noko ɛnwu kɛ saa bɛkɛlɛ mɔɔ bɛbaha la wɔ kɛlata zo, bɛnlea nuhua kolaa na bɛahɔ anlenkɛ bie anwo a ɔboa.
5 Deɛmɔti Ɔle Kpalɛ: Saa yɛsiezie yɛ nwo kpalɛ a, ɔmaa yɛbɔ mɔdenle wɔ daselɛlilɛ nu na yɛ nye die. Ɔmaa yɛto yɛ rɛle aze yɛɛ ɔmmaa yɛnzulo wɔ anlenkɛ nloa. Ɔmaa yɛkola yɛtie suamenle ne kpalɛ tɛla kɛ yɛkɛdwenle mɔɔ yɛbaha la anwo. Bieko, saa yɛnwu buluku ne anu edwɛkɛ ne a, ɔmaa yɛ nye die kɛ yɛkɛva yɛkɛmaa.
6 Ngɛlɛlera ne si yɛ ahonle kɛ “Bɛbɔ Ɛbɛla Kpalɛ wɔ Adenle Biala Anu.” (Tae. 3:1) Gyima kpalɛ boni a tɛla edwɛkpa ne anwo nolobɔlɛ ne a? Saa yɛsiezie yɛ nwo kpalɛ a, ɔmaa yɛbu suamenle ne mɔɔ ɛlɛtie yɛ la na yɛbu Gyihova, Nyamenle ne mɔɔ ye gyima a yɛlɛyɛ la.—Aye. 43:10.