Yɛ Sonvolɛ Mɔɔ Nyia Anyuhɔlɛ
1 Yɛ anwuma Selɛ ne anye die wɔ mekɛ mɔɔ ye azonvolɛ kɛnyia sunsum nu anyuhɔlɛ la. Edwɛkpa ne mɔɔ yɛbahilehile ye kpalɛ kɛ menli mɔɔ bɔ mɔdenle la boka anyuhɔlɛ ɛhye anwo. Pɔɔlo manle neavolɛ Temɔte anwosesebɛ kɛ ɔmaa ɔ nye ɛbolo amaa ye anyuhɔlɛ ne ala ali. (1 Tem. 4:13-15) Ɔwɔ kɛ yɛ kɔsɔɔti yɛbɔ mɔdenle yɛmaa yɛ daselɛlilɛ nyia anyuhɔlɛ, bɔbɔ bɛdabɛ mɔɔ bɛle nolobɔlɛma mɔɔ bɛbɔ mɔdenle la.
2 Fa Bodane Sie Ɛ Nye Zo: Saa yɛbanyia anyuhɔlɛ a ɔwɔ kɛ yɛfa bodane yɛsie yɛ nye zo. Bodane boni mɔ a yɛbahola yɛava yɛazie yɛ nye zo a? Yɛbahola yɛabɔ mɔdenle kɛ yɛyɛ menli mɔɔ kola kilehile yɛ sunsum nu dadeɛ, mɔɔ le Baebolo ne la anu kpalɛ. (Ɛfɛ. 6:17) Bie a daselɛlilɛ foa bie mɔɔ le kɛ gua zo daselɛlilɛ, telefuu zo daselɛlilɛ anzɛɛ gyima nu daselɛlilɛ le mɔɔ ɔwɔ kɛ yɛnyia anyuhɔlɛ wɔ nu a. Bie a ɔwɔ kɛ yɛbɔ mɔdenle na yɛahola yɛayɛ sia kɔkpɔla kpalɛ. Bodane kpalɛ bieko a le anyuhɔlɛ mɔɔ yɛbanyia wɔ kɛzi bɛbɔ Baebolo ɛzukoalɛ bo na bɛkɔ zo bɛyɛ la.
3 Moalɛ: Bɛziezie asafo debiezukoalɛ ne mɔ, titile Teokelase Ɛzonlenlɛ Sukulu ne yɛɛ Ɛzonlenlɛ Nyianu ne kɛ bɛfa bɛaboa yɛ bɛamaa yɛanyia anyuhɔlɛ kɛ azonvolɛ. Saa yɛsiezie yɛ nwo kpalɛ yɛkɔ debiezukoalɛ ɛhye mɔ na yɛfa nzuzulɛ mɔɔ bɛfa bɛmaa la yɛdi gyima a, yɛbanyia nvasoɛ kpole yɛavi nuhua.—2 Kɔl. 9:6.
4 Ɔwɔ kɛ eza yɛboa yɛ nuhua ko biala yɛmaa ɔnyia anyuhɔlɛ. (Mrɛ. 27:17) Saa yɛtie menli mɔɔ yɛ nee bɛ kɔ daselɛlilɛ la edwɛkɛ mɔɔ bɛka la a ɔbaboa yɛ yeamaa yɛanyia anyuhɔlɛ. Bieko, yɛ buluku ɛzukoalɛ zo neavolɛ ne bahola ayɛ ngyehyɛleɛ yeamaa awie aboa yɛ. Nea nyilalɛ kpole mɔɔ ɔle kɛ yɛkɛnyia adekpakyelɛnli anzɛɛ nolobɔlɛnli mɔɔ bɔ mɔdenle la kɛboa yɛ kɛmaa yɛkɛyɛ awie mɔɔ bɔ mɔdenle kpalɛ na yɛ nye kɛlie kpole wɔ daselɛlilɛ nu a! Nolobɔlɛnli mɔɔ ɔle fofolɛ la wɔ yɛ buluku ɛzukoalɛ ɛkɛ ne ɔ? Bie a yɛbahola yɛado ɛsalɛ yɛavɛlɛ ye kɛ ɔmaa yɛhɔ daselɛlilɛ.
5 Gyima mɔɔ hyia mɔɔ bɛlɛyɛ ye ɛnɛ la a le Keleseɛne daselɛlilɛ gyima ne. Mekɛ mɔɔ yɛlɛbɔ ‘afɔle kpalɛ’ yɛamaa Gyihova la, yɛkulo kɛ yɛyɛ biala mɔɔ yɛkɛhola la yɛmaa ye. (Hib. 13:15) Saa yɛbɔ mɔdenle yɛnyia anyuhɔlɛ wɔ yɛ daselɛlilɛ gyima ne anu a, yɛbayɛ “kɛ gyimayɛvolɛ mɔɔ ɛnze ye gyima nwo nyiane na ɔkilehile Nyamenle nɔhalɛ edwɛkɛ ne kpalɛ la.”—2 Tem. 2:15.