“Bɛnwu Nyele”
1 Mekɛ mɔɔ Gyisɛse yɛle kokobɛvolɛma bulu ayile la, bɛ nuhua ko ala a ziale ɔ nzi kɛ ɔkayɛ ye mo a. Gyisɛse hanle kɛ: “Menli bulu a menyɛle bɛ ayile a, na ngɔnla ne wɔ nienwu?” (Luku 17:11-19) Nea kɛzi ɔhyia kɛ yɛkile anyezɔlɛ na yɛye yɛ anwuma Selɛ, Gyihova Nyamenle mɔɔ lɛ ɛlɔlɛ la ayɛlɛ wɔ “ɛlolɛdeɛ kpalɛ biala nee ahyɛlɛdeɛ biala mɔɔ di munli” mɔɔ ɔfi atiakunlukɛnlɛma nu ɔfa ɔmaa yɛ la anwo a!—Kɔlɔ. 3:15; Gye. 1:17.
2 Ninyɛne bie mɔ boni a yɛbahola yɛala ase wɔ nwolɛ a? Yɛ nye sɔ ɛkpɔnedeɛ ne mɔɔ le Nyamenle ahyɛlɛdeɛ kpole kpalɛ mɔɔ yeva yemaa alesama la. (Dwɔn 3:16) Yɛda Gyihova ase noko kɛ yɛhwe yɛ yebikye ɔ nwo a. (Dwɔn 6:44) Yɛ Keleseɛne koyɛlɛ ne noko le debie bieko mɔɔ ɔwɔ kɛ yɛda nwolɛ ase a. (Edw. 133:1-3) Ɔda ali wienyi kɛ ɛbahola wɔazuzu ahyɛlɛdeɛ dɔɔnwo mɔɔ ɛha mɔɔ vi Gyihova ɛkɛ ne la anwo. Yɛmkpondɛ kɛ yɛyɛ kɛ Yizilayɛma mɔɔ bɛnze ayɛlɛ na bɛ rɛle vile gyima mɔɔ Gyihova yɛle manle bɛ la!—Edw. 106:12, 13.
3 Da Anyezɔlɛ Ali: Ɔwɔ nu kɛ bie a kokobɛvolɛma bulu ne anye liele mɔɔ Gyisɛse yɛle manle bɛ la anwo ɛdeɛ, noko ko ala a hilele nwolɛ anyezɔlɛ a. (Luku 17:15) Yɛdayɛ noko, yɛdua mɔdenle mɔɔ yɛbɔ wɔ daselɛlilɛ nu la azo yɛda anyezɔlɛ ali. Saa yɛ nye sɔ mɔɔ yɛ anwuma Selɛ ne mɔɔ lɛ ɛlɔlɛ la ɛyɛ ɛmaa yɛ la a, ɔbaha yɛ ahonle yeamaa yɛavi ɛlɔlɛ nee atiakunlukɛnlɛma nu yɛaha ɔ nwo edwɛkɛ yɛahile awie mɔ. (Luku 6:45) Mekɛ mɔɔ yɛlɛka Gyihova ‘adwenle nee ye nwanwane nyɛleɛ wɔ yɛ nwo’ anwo edwɛkɛ yɛahile awie mɔ la, ɛlɔlɛ nee anyezɔlɛ mɔɔ yɛlɛ wɔ Gyihova anwo la bayɛ kpole—Edw. 40:5.
4 Maa Awie Mɔ Ɛhile Anyezɔlɛ: Ɔwɔ kɛ yɛkpondɛ ndenle yɛdua zo yɛboa yɛ mra nee Baebolo sukoavoma yɛmaa bɛda anyezɔlɛ ali. Awovolɛ lɛ adenle dɔɔnwo yɛ ɛhye wɔ mekɛ mɔɔ bɛlɛka ninyɛne mɔɔ Gyihova ɛbɔ anwo edwɛkɛ bɛahile bɛ mra la. (Wulo. 1:20) Saa yɛlɛyɛ Baebolo ɛzukoalɛ a, yɛbahola yɛabiza sukoavo ne kɛ, “Duzu a ɛhye ka wɔ sonla holɛ mɔɔ Gyihova de la anwo a?” Mekɛ mɔɔ sukoavo ne anyezɔlɛ ne ɛlɛyɛ kpole la, zɔhane ala a ɔbanyia ɛlɔlɛ kpole yeamaa Nyamenle na yeabɔ kpɔkɛ kpalɛ kɛ ɔsɔ ɔ nye a.
5 Awieleɛ mekɛ ɛhye anu, menli dɔɔnwo ɛnze ayɛlɛ. (2 Tem. 3:1, 2) Nea kɛzi Gyihova anye balie kɛ ɔkɛnwu kɛ ye azonvolɛ mɔɔ lɛ anwofamaa la bɔ mɔdenle kɔ daselɛlilɛ fa kile anyezɔlɛ mɔɔ bɛlɛ la!—Gye. 1:22-25.