Kpuyia Ɛleka

◼ Tɛladeɛ boni a ɔfɛta kɛ yɛwula wɔ mekɛ mɔɔ yɛlɛkɔ yɛahɔkpɔla azua mɔɔ bɛsonle Gyihova wɔ nu la ɛ?

Ewiade amuala, Belemgbunlililɛ Asalo, Nyianu Azua, Bɛtɛle azua, nee ɔfese ngakyile ne mɔ le ɛleka titile mɔɔ bɛdu bɛzie ɛkɛ mɔɔ bɛfa bɛsonle Gyihova a. Bɛsi bɛ ngɛnlɛma, bɛsiezie nwolɛ bɔkɔbɔkɔ mɔɔ awie biala mɔɔ kɛnwu ɛkɛ la anye die nwolɛ a. Ngakyile kpole la ɛhye nee mɔɔ yɛta yɛnwu ye wɔ Seetan ewiade ne anu la avinli. Ɔwɔ kɛ bɛnwu menli mɔɔ kɔkpɔla ɛleka mɔɔ bɛfa bɛsonle Gyihova la kɛ bɛle Gyihova menli mɔɔ bɛlɛyɛ ye ɛhulolɛdeɛ a.

Kɛ Keleseɛnema la, “yɛkile kɛ yɛle Nyamenle sonvolɛma” wɔ adenle biala anu, mɔɔ boka ɛhye la a le tɛladeɛ kpalɛ nee kɛzi yɛsiezie yɛ nwo yɛmaa ɔfɛta la. (2 Kɔl. 6:3, 4) Eza ɔwɔ kɛ yɛda subane kpalɛ ali. Mekɛ kɔsɔɔti anu, ɔwɔ kɛ yɛ tɛladeɛ nee yɛ nwo ɛziezielɛ kile kɛ yɛdi yɛ nwo eni na yɛfɛta kɛ Gyihova azonvolɛ. Ɛhye le nɔhalɛ, titile wɔ mekɛ mɔɔ yɛlɛkɔ yɛahɔkpɔla asafo ti wɔ New York yɛɛ ɔfese ngakyile mɔɔ wɔ ewiade anu la.

Mekɛ mɔɔ Organized to Do Jehovah’s Will ne ka kɛzi tɛladeɛ nee anwoziezielɛ kpalɛ nwo hyia anwo edwɛkɛ la, ɔka kɛzi ɔhyia kɛ yɛdi yɛ nwo eni, yɛwula tɛladeɛ kɛnlɛma, na yɛsiezie yɛ nwo kpalɛ wɔ mekɛ mɔɔ yɛlɛkɔ daselɛlilɛ nee debiezukoalɛ la. Akee wɔ mukelɛ 138 ɛdendɛkpunli 3 ne, ɔka kɛ: “Kakye kɛ duma Bɛtɛle kile ‘Nyamenle Sua nu.’ Ɛhye ati, yɛ tɛladeɛ, yɛ nwo ɛziezielɛ, nee yɛ nyɛleɛ ɔwɔ kɛ yɛ kɛ yɛlɛkɔ debiezukoalɛ wɔ Belemgbunlililɛ Asalo la.” Ɔwɔ kɛ Belemgbunlililɛ nolobɔlɛma mɔɔ de bikye Bɛtɛle anzɛɛ mɔɔ vi moa mɔɔ ɛlɛkɔ ahɔkpɔla Bɛtɛle la di ngyinlazo ɛhye mɔɔ hyia la azo. Wɔ adenle ɛhye azo, ɛyɛvolɛ ne da anyezɔlɛ nee ɛbulɛ mɔɔ fɛta la ali.—Edw. 29:2.

Ɔwɔ kɛ tɛladeɛ mɔɔ yɛwula la maa bɛnwu yɛ kɛ “menli mɔɔ sonle Nyamenle la.” (1 Tem. 2:10) Tɛladeɛ nee anwoziezielɛ mɔɔ fɛta la ka menli maa bɛka Gyihova nɔhalɛ ɛzonlenlɛ ne anwo edwɛkɛ kpalɛ. Noko akee, yɛnwu kɛ saa mediema mrenya nee mraalɛ ɛlɛkɔ ahɔkpɔla ɛleka mɔɔ bɛfa bɛsonle Gyihova la a, bɛ nuhua ekyi ɛnwula tɛladeɛ kpalɛ anzɛɛ bɛwula tɛladeɛ mɔɔ maa bɛ nwo gua ɛkɛ la. Tɛladeɛ zɛhae ɛnle kpalɛ ɛmmaa Keleseɛnenli wɔ mekɛ biala anu. Wɔ edwɛkɛ ɛhye nee gyɛne mɔɔ fane yɛ Keleseɛnema ɛbɛlabɔlɛ nwo la anu, yɛkulo kɛ yɛdi ngyinlazo mɔɔ hyia mɔɔ maa Nyamenle menli yɛ ngakyile fi ewiade ne anwo la azo, amaa yɛayɛ debie biala yɛava yɛade Nyamenle anyunlu.—Wulo. 12:2; 1 Kɔl. 10:31.

Yemɔti saa ɛlɛkɔ wɔahɔkpɔla ɔfese ngakyile ne mɔ, na saa ɛyɛle nwolɛ ngyehyɛleɛ anzɛɛ ɛhɔle ɛleka bie akpɔsa yɛɛ ɛlɛkɔ ɛkɛ ne a, biza ɛ nwo kɛ: ‘Asoo me tɛladeɛ nee me nwo ɛziezielɛ fɛta ɛleka kɛnlɛma bɔkɔbɔkɔ ne mɔɔ bɛdi ɛkɛ ne eni mɔɔ melɛkɔ ɛkɛ ne la? Asoo ɔka Nyamenle ne mɔɔ mesonle ye la anwo edwɛkɛ kpalɛ?’ Saa awie mɔ nwu me a, asoo ɔbagyegye bɛ? Ɔrɛla ye kɛ yɛ tɛladeɛ nee yɛ nwo ɛziezielɛ bayɛ kɛnlɛma dahuu, “amaa ngilehilelɛ ne mɔɔ fane Nyamenle yɛ Ngoanedievolɛ ne anwo la ayɛ nvasoɛ wɔ debie biala mɔɔ [yɛyɛ] la anu”!—Tae. 2:10.