Kɛzi Yɛbahola Yɛaboa Menli Mɔɔ Bara Ngakyelɛlilɛ ne Abo La Ɛ?
1. Daselɛ kpole boni a bɛbali ye wɔ March 22, 2008 a?
1 Wɔ March 22, 2008, bɛbali menli mgbe mgbe dɔɔnwo mɔɔ wɔ ewiade la daselɛ kpole. Menli mɔɔ bahɔ Ngakyelɛlilɛ ne abo la, bade ɛlɔlɛ kpole mɔɔ Gyihova luale zo vale ɛkpɔnedeɛ ne manle alesama la anwo edwɛkɛ. (Dwɔn 3:16) Bɛbazukoa Belemgbunlililɛ ne nee kɛzi Gyihova balua zo yeamaa ye ɛhulolɛdeɛ ayɛ ɛkɛ amaa azɛlɛ ye kɔsɔɔti la anwo debie. (Mat. 6:9, 10) Bɛbanwu ɛlɔlɛ nee koyɛlɛ mɔɔ wɔ Nyamenle menli avinli, nee kɛzi yɛsonle menli nyɛvolɛ kɛnlɛma la.—Edw. 133:1.
2. Kɛzi yɛbahola yɛaboa Baebolo sukoavoma mɔɔ bara la ɛ?
2 Baebolo Sukoavoma: Menli mɔɔ bara la bie mɔ a le menli mɔɔ yɛbɔ ɔ bo yɛ nee bɛ ɛlɛsukoa Baebolo ne la. Fa bɛ kile mediema mrenya nee mraalɛ. Ka dapɛne debiezukoalɛ ne anwo edwɛkɛ kile bɛ, na fa mekɛ ekyi fa bɛ kpɔsɛkpɔsa Belemgbunlililɛ Asalo ɛkɛ. Wɔ ɛdendɛlɛ ne anu, tendɛvolɛ ne bamaa menli ɛhye anwosesebɛ kɛ bɛhɔ zo bɛnyia sunsum nu anyuhɔlɛ. Ɛbahola wɔagyinla ye edwɛkɛ ne azo wɔamaa wɔ Baebolo sukoavoma ne anwosesebɛ.
3. Duzu a yɛbahola yɛayɛ na nolobɔlɛma mɔɔ ɛyɛ bɛtɛɛ mɔɔ rale bie la anyia anwosesebɛ ɛ?
3 Nolobɔlɛma Mɔɔ Bɛyɛ Bɛtɛɛ: Menli mɔɔ bara la bie mɔ a le nolobɔlɛma mɔɔ ɛyɛ bɛtɛɛ la. Bɔ mɔdenle kɔ bɛ ɛkɛ na soma bɛ kpalɛ. Koati kɛ ɛbabiza bɛ kpuyia anzɛɛ ɛbaha edwɛkɛ mɔɔ bamaa bɛaze nyiane la. Ngakyelɛlilɛ ne anzi mekɛ ekyi bie anu, mgbanyima ne mɔ ɔwɔ kɛ kɔkpɔla awie biala mɔɔ ɛyɛ bɛtɛɛ na ɔrale bie la, bɛkanvo bɛ wɔ mɔdenle mɔɔ bɛbɔle bɛrale bie la anwo na bɛto ɛsalɛ bɛfɛlɛ bɛ kɛ bɛrɛla debiezukoalɛ bieko mɔɔ bɛbayɛ la bie.
4. Kɛzi yɛ nuhua ko biala bahola aboa nyɛvolɛ ɛ?
4 Nyɛvolɛ: Menli mɔɔ bara la bie mɔ bayɛ yɛ gɔnwo mɔ anzɛɛ yɛ mbusua mɔɔ yɛdole ɛsalɛ yɛvɛlɛle bɛ la. Bie mɔ noko asa hanle ɛsalɛdolɛ kɛlata ne wɔ gyimalilɛ titile ne anu. Saa ɛnwu menli mɔɔ ɛnze bɛ la a, bɔ mɔdenle maa bɛnwu wɔ na yɛ bɛ akoaba. Bie a ɛnee bɛtɛbale debiezukoalɛ ɛlɛ. Ɛ nee bɛ ɛlɛbɔ adawu a, ɛbahola wɔabiza kɛzi ɛbahola wɔanwu bɛ la. Wɔ Ngakyelɛlilɛ ne anzi mekɛ ekyi bie anu, ɛbahola wɔahɔkpɔla bɛ, anzɛɛ wɔavɛlɛ bɛ wɔ telefuu zo, na wɔabɔ mɔdenle wɔaboa bɛ ɛ nee bɛ azukoa Baebolo ne.
5. Duzu a yɛbahola yɛaha yɛava yɛabɔ Baebolo ɛzukoalɛ bo a?
5 Yɛbahola yɛagyinla Ngakyelɛlilɛ ɛdendɛlɛ ne azo yɛahwe bɛ adwenle yɛahɔ Baebolo ne Kilehile buluku ne azo wɔ mekɛ mɔɔ yɛkɛyɛ sia kɔkpɔla la. Kɛ neazo la, tendɛvolɛ ne bagenga Ayezaya 65:21-23. Saa ɛyɛ sia kɔkpɔla a, ɛbahola wɔabɔ ɛdendɛlɛ ne azo na wɔaha kɛ, “Maa mengile wɔ nyilalɛ fofolɛ mɔɔ ɛkpɔnedeɛ ne bamaa yɛanyia la.” Akee ka Baebolo ne Kilehile buluku ne mukelɛ 4-5 la anwo edwɛkɛ. Anzɛɛ ɛbahola wɔaha kɛ, “Menli dɔɔnwo ɛnnwu mekɛ mɔɔ Ayezaya ngapezo ne bara nu amaa yɛ la.” Akee ka tile 9, ɛdendɛkpunli 1-3 la anwo edwɛkɛ. Adenle sikalɛ bieko a le kɛ, ɛbaha tendɛvolɛ ne edwɛkɛ ne mɔɔ ɔhanle la, na akee wɔava Baebolo ne Kilehile buluku ne wɔamaa ye na wɔahile ye kɛzi bɛsukoa ye la.
6. Mekɛ mɔɔ yɛlɛtie adehilelɛ mɔɔ Gyisɛse vale manle kɛ yɛhakye ye ewule ne la, nwolɛ adenle boni a yɛlɛ a?
6 Ɔrɛla ye kɛ yɛ nuhua ko biala bakpondɛ adenle alua zo aboa Baebolo sukoavoma, nolobɔlɛma mɔɔ bɛyɛ bɛtɛɛ nee nyɛvolɛ mɔɔ bara Ngakyelɛlilɛ ne abo la. (Luku 22:19) Nɔhalɛ nu, Gyihova bayila anyuhɔlɛ biala mɔɔ yɛbanyia wɔ yɛ Belemgbunlililɛ gyima ne anu la azo.