Bɛbɔ Bɛ Ɛbɛla kɛ Bɛle Nrɛlɛbɛvolɛma
1 Mekɛ mɔɔ Gyisɛse hanle hilele fɛlɛhyelɛma nna ne kɛ bɛdoa ye la, bɛandu bɛ kpɔkɛzilɛ ne bɛanzie “Na ɛkɛ ne ala . . . bɛdoale ye.” (Mat. 4:18-22) Mekɛ mɔɔ Sɔɔlo mɔɔ vi Taasɛse hakyile na ɔnwunle debie bieko la, ɔdaye noko yeandwehwenle ɔ bo aze, na ‘ndɛndɛ ne ala ɔhɔle nyianu azua ne mɔ anu ɔhɔbɔle Gyisɛse anwo nolo.’ (Gyi. 9:20) Dahuu mekɛ kɔ ndɛndɛ; na saa ɔkpa nwo a, ɛnee yekpa nwo bɔkɔɔ. Ɛhye ati a ɔhyia kɛ ‘yɛbɔ yɛ ɛbɛla kɛ yɛle nrɛlɛbɛvolɛma’ wɔ kɛzi yɛfa yɛ mekɛ yɛdi gyima anwo la.—Ɛfɛ. 5:15, 16.
2 Esiane: Adenle mɔɔ yɛlɛ yɛsonle Gyihova ɛnɛ la bahola avi yɛ sa ɛhyema. (Gye. 4:14) ‘Esiane’ kola to yɛ muala. (Nolo. 9:11) Bieko, yɛ kɔsɔɔti yɛlɛyɛ mgbanyinli, na yɛngola yɛngoati munzule mekɛ mɔɔ ɔmmaa yɛngola yɛnyɛ dɔɔnwo wɔ Gyihova ɛzonlenlɛ nu wɔ mekɛ mɔɔ yɛkɛyɛ mgbanyinli la. (Nolo. 12:1) Ɛhye ati, nrɛlɛbɛ ɛnle nu kɛ yɛkɛdu mekɛ mɔɔ ɔwɔ kɛ yɛyila yɛ nwo zo yɛmaa Nyamenle la yɛsie anzɛɛ yɛkendɛ na mekɛ mɔɔ le kpalɛ la anu yɛabuke yɛ ɛzonlenlɛ gyima ne anu kɛmɔ yɛkɛhola la. (Luku 9:59-62) Ebileham nyianle anzondwolɛ wɔ ye mgbanyinli nu, “ɔyɛle ɛrelera nwosonwoso” na yeawu, ɔboalekɛ ɔbɔle ye ɛbɛla nrɛlɛbɛ nu, ɔvale ye mekɛ kɔsɔɔti ɔzonlenle Gyihova.—Mɔl. 25:8.
3 Mekɛ ne Ɛwie: Yɛkulo kɛ yɛdayɛ noko yɛfa yɛ mekɛ yɛdi gyima nrɛlɛbɛ nu, ɔluakɛ “mekɛ ne ɛwie.” (1 Kɔl. 7:29-31) Ɔnrɛhyɛ biala ewiade ɛtane ɛhye bara ye awieleɛ. Adenle mɔɔ yɛlɛ yɛyɛ menli mɔɔ le kɛ mboane anloaboɔboalɛ gyima kpole ne wɔ “azɛlɛ ye azo bɛyɔba” ne anu la bara ye awieleɛ. (Yek. 14:15) Ɔwɔ kɛ yɛnea boɛ na yeammaa ɛbɛlabɔlɛ nu adwenledwenle nee ninyɛne gyɛne anzɛkye mekɛ mɔɔ ɔwɔ kɛ yɛfa yɛdi gyima kpalɛ wɔ ɛzonlenlɛ gyima ne anu la. (Luku 21:34, 35) Nea ahunlundwolɛ mɔɔ ɔbayɛ kɛ yɛkɛdo yɛ nye yɛ nzi na yɛkɛnwu kɛ yɛyɛle dɔɔnwo wɔ bɛyɔba ne anu a!
4 Ɔwɔ kɛ yɛkɔ zo yɛmaa yɛ nye da ɛkɛ, amaa nwolɛ adenle ngɛnlɛma mɔɔ yɛbanyia yɛava yɛ nwo yɛawula ɛzonlenlɛ gyima ne anu la amkpa yɛ ti. Bɛmaa yɛsika yɛ bo kɛ yɛbazonle Gyihova, kɛmɔ “‘Ɛnɛ’ gyi ɛkɛ ne maa yɛ alehyenlɛ biala mɔɔ kɛhye yɛ nyunlu la. ” (Hib. 3:13) Saa yɛyɛ zɔhane a, yɛdayɛ noko yɛbahile kɛ yɛze nrɛlɛbɛ amgba, ɔboalekɛ “sonla ne mɔɔ yɛ Nyamenle ɛhulolɛdeɛ la de aze dahuu.”—1 Dwɔn 2:17.