Yɛka Yɛ Belemgbunlililɛ Anyelazo ne Anwo Edwɛkɛ
1 Wɔ awieleɛ mekɛ ɛhye anu, menli dɔɔnwo mɔɔ wɔ ewiade ye anu la ɛnlɛ anyelazo. (Ɛfɛ. 2:12) Bie mɔ noko ɛva bɛ nwo ɛdo nwonane nu ninyɛne, dasanli tumivolɛma, adwuleso abɔdeɛ nwo nrɛlɛbɛ nee mɔɔ bokɛboka nwo la azo mɔɔ nrɛlɛbɛ ɛnle nu a. Nea anyelielɛ mɔɔ ɔyɛ kɛ yɛlɛ anyelazo wɔ kenlebie, anyelazo mɔɔ “le kɛ sɛkɛ maa yɛ ɛkɛla. Ɔgyi pi, na ɔgyi ye kpundii” a!—Hib. 6:19.
2 Wɔ Nyamenle Belemgbunlililɛ ne anu, bɛbahakyi azɛlɛ ne na bɛayɛ ye paladaese. Bɛbadwazo yɛ alɔvolɛ mɔɔ ɛwu la. (Gyi. 24:15) Ehyia, nzisi, anwodolɛ, mgbanyinliyɛlɛ, yɛɛ ewule bavi ɛkɛ. (Edw. 9:18; Mat. 12:20, 21; Yek. 21:3, 4) Gyihova ɛwɔkɛ ne mɔ mɔɔ ɔnrɛhyɛ na ara nu la bie mɔ ɛne. Yɛ anyelazo ne foa boni a ɛ nye la zo titile a?
3 Bɔ Edwɛkpa ne Nolo: Ɔnle kɛ yɛfea Belemgbunlililɛ anyelazo ne azo. Ɔwɔ kɛ Nyamenle nee yɛ gɔnwo sonla nwo ɛlɔlɛ ka yɛ maa yɛsukoa Gyisɛse na ‘yɛka Edwɛkpa ne yɛkile ehyiavolɛma. Yɛbɔ fanwodi nwo nolo yɛkile bɛdabɛ mɔɔ bɛhye bɛ nuokɛ la, na yɛmaa anyenzinliravolɛma nwu debie.’ (Luku 4:18) Ɛzoanvolɛ Pɔɔlo bɔle edwɛkpa ne nolo wɔ gua nu nee ɛleka biala mɔɔ ɔnwunle menli la. Ɔmanle ɛzonlenlɛ gyima ne ɛyɛlɛ hyianle ye. (Gyi. 18:5) Saa yɛdi ye neazo ne anzi na yɛbɔ mɔdenle wɔ ɛzonlenlɛ gyima ne anu a, ɔnrɛmaa “ɛbɛlabɔlɛ ye anwo adwenleadwenle [nee] anyiabɛnwo ɛhulolɛ” ɛnrɛheda yɛ Keleseɛne anyelazo ne azo.—Mak. 4:19.
4 Saa yɛyia menli mɔɔ anye ɛnlie edwɛkɛ ne anwo, mɔɔ bu Belemgbunlililɛ nrɛlaleɛ ne kɛ ɔngyia, anzɛɛ mɔɔ ye bɛ nyunlu dwazo tia yɛ la a ɔmmaa yɛ Belemgbunlililɛ anyelazo ne anu ɛndo. Yɛsɔ “anyelazo ne mɔɔ yɛlɛ ye la anu kpalɛ” (Hib. 10:23) Yɛnze “Edwɛkpa ne anwo nyiane.” (Wulo. 1:16) Ɔbahola yeara ye kɛ anwodozo nee abotane mɔɔ yɛlɛ la baha menli bie mɔ yeamaa badie edwɛkɛ ne.
5 Yɛtwe adwenle yɛkɔ ewiade gyinlabelɛ mɔɔ ɛzɛkye mɔɔ maa Baebolo ngapezo ba nu la azo yɛmaa ɔfɛta ɛdeɛ, noko yɛnle menli mɔɔ bɔ munzule edwɛkɛ nolo a. Emomu yɛ ɛzonlenlɛ gyima ne gyi Belemgbunlililɛ anyelazo ne, mɔɔ le Belemgbunlililɛ ne anwo edwɛkpa ne la azo. Bɛmaa yɛva mɔdenlebɔlɛ yɛbɔ edwɛkpa ɛhye nolo, ‘amaa mɔɔ yɛ nye la zolɛ la yɛ sa aha ye.’—Hib. 6:11.