Yɛ Muala Yɛwula Yɛ Nwo Anwosesebɛ
1 Ɛzoanvolɛ Pɔɔlo hɛlɛle hɔmanle Wulomu asafo ne kɛ: “Mekulo kɛ mebakpɔla bɛ, amaa yɛanyia Nyamenle Sunsum nu ahyɛlɛdeɛ ne na bɛ nwo ayɛ se. Mɔɔ mekpondɛ meaha la a le kɛ, saa yɛ muala yɛyia nu a bɛ diedi bamaa me anwosesebɛ, yɛɛ me diedi bamaa bɛ diedi anyi.” (Wulo. 1:11, 12) Yɛ mekɛ ye anu neavolɛ adenduvoma ɛkpɔlalɛ maa yɛnyia adenle ko ne ala yɛdua zo yɛwula yɛ nwo ngoko anwosesebɛ.
2 Asafo Ne: Mekɛ dɔɔnwo ne ala bɛdumua bɛbɔ maanzinli zo neavolɛ ne ɛkpɔlalɛ ne nolo bɛkile asafo ne kɛyɛ siane nsa na yeara. Ɛhye maa yɛnyia adenle yɛyɛ yɛ ngyehyɛleɛ boɛ amaa yɛanyia nuhua nvasoɛ kpole. (Ɛfɛ. 5:15, 16) Saa ɛyɛ gyima a, bie a ɛbahola wɔazɛlɛ adenle wɔ gyima nu, amaa wɔava ɛ nwo wɔawula daselɛlilɛ nu wɔ dapɛne ne anu. Bie mɔ yɛ ngyehyɛleɛ yɛ adekpakyelɛ boavolɛ wɔ siane ne mɔɔ ɔbarakpɔla la anu. Saa wɔyɛ kɛ ɛbadu adenle a, asoo ɛbahola wɔahakyi wɔ ngyehyɛleɛ ne, amaa yearado wɔ wɔ zɔhane dapɛne ne anu?
3 Maanzinli zo neavolɛ ne bodane titile a le kɛ, ɔwula sonla ko biala anwosesebɛ na yeatete ye wɔ daselɛlilɛ nu. Asoo ɛbahɛlɛ wɔ duma na ɛ nee ye alua, anzɛɛ saa ɔgya raalɛ a, ɛ nee ɔ ye alua? Maanzinli zo neavolɛ ne anye die nwo kɛ ɔ nee nolobɔlɛma kɔsɔɔti kɛyɛ gyima, mɔɔ bɛdabɛ mɔɔ bɛnlɛ anwubielɛ anzɛɛ bɛkulo kɛ bɛnwu kɛzi bɛyɛ ɛzonlenlɛ gyima ne kpalɛ la boka nwo a. Awie biala bahola azukoa kɛzi ɔdi daselɛ la, na bɛava nzuzulɛ biala mɔɔ ɔkɛvi atiakunlukɛnlɛma nu ɔkɛva ɔkɛmaa la bɛali gyima. (1 Kɔl. 4:16, 17) Saa ɛto ɛsalɛ ɛfɛlɛ ye na ɛ nee ye di aleɛ a, ɔbabuke nwolɛ adenle fofolɛ amaa wɔanyia agɔnwolɛvalɛ mɔɔ wula anwosesebɛ la. (Hib. 13:2) Kɛmɔ ɔsiezie ye ɛdendɛlɛ ne ɔfa ɔdi asafo ne ngyianlɛ nwo gyima la ati, tie ye boɛ.
4 Maanzinli zo Neavolɛ Ne: Ɛnee ɛzoanvolɛ Pɔɔlo le kɛ mediema mɔɔ wɔ asafo ne mɔ anu ala la. Ɔyiale ngyegyelɛ nee adwenledwenle yɛɛ ɔhyianle anwosesebɛwulalɛ na ɔhilele nwolɛ anyezɔlɛ. (2 Kɔl. 11:26-28) Mekɛ mɔɔ Wulomu asafo ne dele kɛ Pɔɔlo mɔɔ ɛnee la efiade ɛlɛba ɛkɛ la, bie mɔ hɔyiale ye wɔ Apeɛse gua nu mɔɔ ye tendenle le mayɛlɛ 46 la! “Mɔɔ Pɔɔlo nwunle bɛ la, ye ahonle gyinlanle na ɔyɛle Nyamenle mo.” (Gyi. 28:15) Ɛdawɔ noko ɛbahola wɔawula wɔ maanzinli zo neavolɛ ne anwosesebɛ. Di ye ‘eni mɔnwo’ ɔlua anyelielɛ nu mɔɔ ɛbavi wɔaboa ye ɛkpɔlalɛ ne la azo. (1 Tem. 5:17) Kile anyezɔlɛ kpalɛ wɔ mɔdenle mɔɔ ɔlɛbɔ yeamaa wɔ la anwo na da wɔ anyezɔlɛ ne ali. Mekɛ mɔɔ ɔ nee ɔ ye kɛnwu wɔ diedi, ɛlɔlɛ nee kɛzi ɛgyi ye kpundii la, bɛ nye bɛalie.—2 Tɛs. 1:3, 4.
5 Wɔ mekɛ ɛhye mɔɔ “anwongyelelɛ dɔɔnwo” wɔ nu la anu, yɛ nuhua ne boni a ɛngyia anwosesebɛwulalɛ a? (2 Tem. 3:1) Si kpɔkɛ ɛnɛ kɛ, ɛbava ɛ nwo wɔawula gyimalilɛ dapɛne titile ne anu wɔ mekɛ mɔɔ maanzinli zo neavolɛ ne kɛra la. Yɛ kɔsɔɔti—neavolɛ adenduvoma nee nolobɔlɛma, yɛbahola yɛavi anyelielɛ nu yɛawula yɛ nwo ngoko anwosesebɛ. Wɔ zɛhae adenle ne azo, yɛdayɛ noko ‘yɛbaboa yɛ nwo ngoko na yɛawula yɛ nwo anwosesebɛ.’—1 Tɛs. 5:11.
[Debiezukoalɛ kpuyia ne mɔ]
1. Nwolɛ adenle titile boni mɔ a neavolɛ adenduvoma ɛkpɔlalɛ maa yɛnyia a?
2. Duzu ati a bɛdumua bɛbɔ maanzinli zo neavolɛ ne ɛkpɔlalɛ ne nolo ɛ?
3. Duzu a yɛbahola yɛayɛ wɔ ye ɛkpɔlalɛ ne anu amaa yɛwula yɛ anwosesebɛ ɛ?
4. Kɛzi yɛbahola yɛawula yɛ maanzinli zo neavolɛ ne anwosesebɛ ɛ?
5. Kɛmɔti a yɛ kɔsɔɔti yɛhyia anwosesebɛwulalɛ ɛnɛ ɛ?