Kɛzi Maangyebakyi Zo Neavolɛma Boa Yɛ Ɛ?

Kilisiene Giliki Ngɛlɛlera ne ka Baanabase nee ɛzoanvolɛ Pɔɔlo anwo edwɛkɛ fane dɔɔnwo. Mrenyia ɛhye mɔ zonlenle kɛ neavolɛ adenduvoma na ɛnee bɛkɔkpɔla alimoa asafo ne mɔ. Duzu ati ɔ? Ɛnee bɛdwenle bɛ sunsum nu mediema ɛkpazilɛ nwo kpalɛ. Pɔɔlo hanle kɛ ɛnee ɔkpondɛ kɛ ‘ɔsia ɔkɔkpɔla mediema ne mɔ’ na ɔnwu kɛzi bɛ nwo de la. Ɛnee ɔkulo kɛ ɔpɛ adenle mayɛlɛ (km) dɔɔnwo amaa yeahɔmaa bɛ anwosesebɛ. (Gyima ne 15:36) Neavolɛ adenduvoma lɛ ɛhulolɛ zɛhae ɛnɛ.

Bɛba kɛ bɛbamaa yɛ anwosesebɛ. Maangyebakyi zo neavolɛ biala kpɔla asafo kɛyɛ 20, na ɔdi dapɛne ko wɔ asafo biala anu fane nwiɔ wɔ ɛvolɛ ko anu. Yɛbahola yɛanyia nvasoɛ kpole yɛavi mediema ɛhye mɔ anwubielɛ ne anu, saa bɛgya mraalɛ a bɛdabɛ noko bɛbaboa yɛ. Bɛbɔ mɔdenle kɛ bɛbanwu mgbanyinli nee ngakula kɔsɔɔti, yɛɛ bɛkulo kɛ bɛ nee yɛ kɔ daselɛlilɛ na bɛaboa yɛ wɔ mekɛ mɔɔ yɛlɛyɛ Baebolo ɛzukoalɛ la. Neavolɛ ɛhye mɔ nee mgbanyima ne mɔ kɔkpɔla mboane ne. Na amaa bɛamaa yɛ anwosesebɛ la, bɛmaa ɛdendɛlɛ mɔɔ maa anwosesebɛ la wɔ debiezukoalɛ nee nyianu bo.​—Gyima ne 15:35.

Bɛ nye die yɛ nwo. Asafo ne mɔ sunsum nu gyinlabelɛ a hyia maangyebakyi zo neavolɛma ne kpalɛ a. Bɛ nee mgbanyima nee azonvolɛ yia nu na bɛsuzu anyuhɔlɛ mɔɔ bɛnyia la anwo na bɛboa bɛ bɛmaa bɛnwu kɛzi bɛbahola bɛayɛ bɛ gyima ne kpalɛ la. Bɛboa adekpakyelɛma bɛmaa bɛkola bɛyɛ bɛ gyima ne kpalɛ yɛɛ bɛ nye die kɛ bɛkɛnwu menli mɔɔ le fofolɛ nee kɛzi bɛlɛnyia anyuhɔlɛ la. Mediema ɛhye mɔ ko biala tu ɔ nwo maa kɛ ‘agɔnwolɛ mɔɔ nee yɛ yɛ gyima boa yɛ a.’ (2 Kɔlentema 8:23) Ɔwɔ kɛ yɛsukoa bɛ diedi nee anwofamaa mɔɔ bɛfa bɛsonle Nyamenle la.​—Hibuluma 13:7.

• Bodane boni ati a maangyebakyi zo neavolɛma kpɔla asafo ne mɔ a?

• Kɛ ɔkɛyɛ na wɔahola wɔanyia bɛ ɛkpɔlalɛ ne azo nvasoɛ ɛ?