Di Gyisɛse Neazo ne Anzi
1 Saa yɛfa yɛ nwo yɛwula ɛdoavolɛyɛlɛ gyima ne anu a, ɔwɔ kɛ yɛkakye kɛ, yɛ neazo kola ka menli mɔɔ nwu yɛ la kpalɛ. Gyisɛse luale ye edwɛkɛ nee ye nyɛleɛ zo hilehilele. Menli mɔɔ ɛlɛnea ye la holale nwunle ye mɔdenlebɔlɛ, menli nwo ɛlɔlɛ, ɛhulolɛ kpundii mɔɔ ɔnyianle kɛ ɔte ɔ Ze duma nwo nee kpɔkɛ mɔɔ ɔbɔle kɛ ɔyɛ ɔ Ze ɛhulolɛdeɛ yeahɔ awieleɛ la.—1 Pit. 2:21.
2 Wɔ Sua nu nee Sua nu Daselɛlilɛ Nu: Kɛmɔ ɛnee ɔde wɔ Gyisɛse afoa nu la, yɛ neazo kola ka menli mɔɔ yɛ nee bɛ ɛlɛyɛ gyima ne la. Nolobɔlɛma mɔɔ bɛle fofolɛ na bɛnlɛ anwubielɛ mɔɔ bɛnwu kɛ yɛlɛfa mɔdenlebɔlɛ yɛayɛ daselɛlilɛ gyima ne la, bazuzu mɔdenle mɔɔ bɛbahola bɛabɔ wɔ daselɛlilɛ gyima ne anu la anwo. Saa bɛnwu kɛzi yɛ nye die nee ɛhulolɛ mɔɔ yɛlɛ kɛ yɛboa awie mɔ la a, ɔbahakye bɛ yeamaa bɛanwu kɛzi ɔhyia kɛ bɛda subane zɛhae mɔ ali wɔ bɛ daselɛlilɛ nu la. Saa bɛnwu kɛzi yɛbɔ mɔdenle yɛfa Ngɛlɛlera ne yɛdi gyima, kɛzi yɛsia yɛkɔkpɔla nee kɛzi yɛyɛ Baebolo ɛzukoalɛ la a, ɔbaha bɛ yeamaa bɛdabɛ noko bɛayɛ bie.
3 Saa Ɛlɛyɛ Baebolo Ɛzukoalɛ A: Yɛ Baebolo sukoavoma banwu yɛ subane ne kpalɛ. Kɛ neazo la, bie a yɛbahilehile nvasoɛ mɔɔ wɔ zo kɛ bɛsiezie bɛ nwo bɛmaa debiezukoalɛ ne, bɛkenga ngɛlɛlera ne mɔ na bɛfa debie bɛpɛ edwɛkɛtitile ne mɔ mɔɔ wɔ nu la abo ɛdeɛ, noko bɛbanlea kɛ saa yɛziezie yɛ nwo a. (Wulo. 2:21) Saa yɛ nee bɛ hyehyɛ mekɛ mɔɔ yɛbava yɛazukoa la na yɛdwu ɛkɛ ne ndɛ a, ɔnrɛmaa bɛnrɛva ninyɛne gyɛne bɛnrɛgyegye bɛ Baebolo ɛzukoalɛ ne. Eza noko bɛbanwu ɛhulolɛ mɔɔ yɛlɛ kɛ yɛtu yɛ nwo yɛamaa yɛayɛ yɛ ɛzonlenlɛ gyima ne nee diedi kpole mɔɔ yɛlɛ la. Ɔnyɛ nwanwane kɛ menli mɔɔ di Gyisɛse neazo ne anzi kpalɛ la sukoavoma ta yɛ menli mɔɔ bɔ mɔdenle yɛɛ nolobɔlɛma mɔɔ so ma a.
4 Wɔ Debiezukoalɛ Bo: Menli mɔɔ wɔ Keleseɛne asafo ne anu la ɔwɔ kɛ dua bɛ neazo zo kilehile wɔ asafo nyianu bo. Anyelielɛma mɔɔ bɔ ɔ bo kɔ debiezukoalɛ la nyia nvasoɛ fi neazo kpalɛ mɔɔ bɛnwu ye wɔ asafo ne anu la azo. Bɛnwu mediemayɛlɛ kɛnlɛma ne, Keleseɛnema koyɛlɛ, tɛladeɛ nee anwoziezielɛ mɔɔ fɛta la. (Edw. 133:1) Nɔhalɛlilɛ nu mɔɔ yɛfi yɛkɔ debiezukoalɛ nee yɛ diedi ne mɔɔ yɛka ye wɔ bagua nu la le neazo bieko mɔɔ bɛbanwu ye a. Ɛyɛvolɛ bie mɔɔ hɔle yɛ debiezukoalɛ ko bie abo la nwunle kɛzi kakula raalɛ ekyi bie holale bukele ngyehyɛnu bie mɔɔ bɛhanle nwolɛ edwɛkɛ la ndɛndɛ wɔ ye Baebolo ne anu na ɔyɛle koonwu ɔlile ɛgengalɛ ne anzi bɔkɔɔ la. Ye neazo ne hanle ɛyɛvolɛ ne manle ɔbizale Baebolo ɛzukoalɛ nwo adenle.
5 Ngɛlɛlera ne wula yɛ anwosesebɛ kɛ yɛzukoa yɛ nuhua ko biala neazo kpalɛ ne. (Fel. 3:17; Hib. 13:7) Ɛhye ati, ɔwɔ kɛ yɛkakye kɛ saa yɛdi Gyisɛse neazo ne anzi kpalɛ a, awie mɔ banwu ye na yɛaha bɛdabɛ noko wɔ adenle kpalɛ zo. Mekɛ mɔɔ yɛnwu ɛhye la, bɛmaa yɛdie edwɛkɛ mɔɔ wɔ 1 Temɔte 4:16 ne mɔɔ se: “Nea ɛ nwo boɛ na nea wɔ ngilehilelɛ ne boɛ” la.
[Debiezukoalɛ kpuyia ne mɔ]
1. Neazo boni a Gyisɛse yɛle a?
2. Ndenle boni azo a yɛ neazo kola ka menli mɔɔ yɛ nee bɛ kɔ daselɛlilɛ la ɛ?
3. Kɛzi yɛ neazo kola boa Baebolo sukoavoma ɛ, na duzu a bɛbahola bɛazukoa a?
4. Saa yɛkɔ debiezukoalɛ a, duzu a bɛsukoa bɛfi yɛ neazo ne anu a?
5. Duzu ati a ɔnle kɛ yɛbu nvasoɛ mɔɔ wɔ yɛ neazo zo la kɛ ɔle debie ekyi ɛ?