Kpuyia Ɛleka
◼ Asoo ‘akɛlɛ nɔhavo nee nrɛlɛbɛvolɛ eku’ ne die Alasevolɛ ekpunli ngakyile mɔɔ yɛ bɛ ti anwo neɛnleanu wɔ Ngɛlɛlera ne anu na bɛyia nu bɛsuzu nwolɛ la to nu?—Mat. 24:45, 47.
Kyɛkyɛ, ɔnlie ɔndo nu. Noko wɔ ewiade ɛleka ngakyile, menli ekyi mɔɔ boka yɛ ahyehyɛdeɛ ne anwo la ɛyɛ bɛ ti anwo neɛnleanu wɔ Baebolo nu edwɛkɛ bie mɔ anwo. Bie mɔ yia nu kɛ ekpunli sukoa Hibulu nee Giliki mɔɔ bɛvale bɛhɛlɛle Baebolo ne la wɔ bɛ ti anwo kɛ bɛfa bɛazuzu nɔhalɛ mɔɔ New World Translation ne de la anwo. Bie mɔ yɛ neɛnleanu wɔ abɔdeɛ nwo nrɛlɛbɛ ninyɛne mɔɔ fane Baebolo ne anwo la anu. Bɛyɛ Intanɛte zo address nee ɛleka mɔɔ maa awie mɔ kile bɛ adwenle la. Eza bɛyɛ nyianu nee mbuluku ngakyile kɛ bɛfa mɔɔ bɛnwu ye la baboa debie mɔɔ yɛsukoa wɔ Keleseɛne nyianu bo nee yɛ mbuluku ne mɔ anu la.
Wɔ ewiade amuala, Gyihova menli ɛlɛnyia sunsum nu ngilehilelɛ nee anwosesebɛwulalɛ dɔɔnwo wɔ asafo nyianu, nyianu mgbole nee ngyikyi bo yɛɛ mbuluku mɔɔ Gyihova ahyehyɛdeɛ ne ɛyɛ la azo. Gyihova dua ye sunsum nwuanzanwuanza ne nee ye nɔhalɛ Edwɛkɛ ne azo fa ninyɛne mɔɔ hyia amaa Nyamenle menli kɔsɔɔti ‘ahye bɛ nwo file wɔ adwenle nu nee bɛ kpɔkɛbɔlɛ nu’ na ‘bɛ diedi agyinla kpundii’ la maa. (1 Kɔl. 1:10; Kɔlɔ. 2:6, 7) Nɔhalɛ nu, yɛ nye sɔ ɛzonlenlɛ nu ninyɛne mɔɔ Gyihova fa maa yɛ wɔ awieleɛ mekɛ ɛhye anu la. Ɛhye ati, ‘akɛlɛ nɔhavo nee nrɛlɛbɛvolɛ ne’ ɛnlie buluku, nyianu anzɛɛ Intanɛte zo address biala mɔɔ tɛ ɔdaye a ɔnea zolɛ la ɔndo nu.—Mat. 24:45-47.
Ɔle kpalɛ kɛ menli kɛhulo kɛ bɛfa bɛ adwenle bɛboa edwɛkpa ne ɛhanlɛ. Noko akee, ɔnle kɛ awie biala mɔdenlebɔlɛ twe adwenle fi mɔɔ Gyisɛse Kelaese ɛlɛdua ye asafo ne azo ayɛ ye wɔ azɛlɛ ye azo ɛnɛ la azo. Wɔ ɛvoya ne mɔɔ lumua la anu, ɛzoanvolɛ Pɔɔlo bɔle kɔkɔ kɛ menli mmasɛkye bɛ mekɛ fa bɛ nwo wula edwɛkɛ mɔɔ le kɛ “bɛ nla mɔ anwo nwɔra ɛdolɛ ne nee mbusua nu ɛhilehilelɛ somasoma ne. Ɛhye mɔ wie kpolerazulɛ ala, na ɔnvane Nyamenle ngyehyɛlɛ ne mɔɔ bɛdua diedi zo bɛnwu ye la anwo.” (1 Tem. 1:3-7) Ɔwɔ kɛ Keleseɛnema kɔsɔɔti bɔ mɔdenle “tua ɛhye mɔ: kpolerazulɛ mɔɔ nrɛlɛbɛ ɛnle nu, yɛ nlenya mɔ aluma ngilehilenu, butulelilɛ nee mɛla nwo kpolerazulɛ. Ɛhye mɔ anwo ɛnlɛ nvasoɛ yɛɛ eza bɛle debie mgbane.”—Tae. 3:9.
Wɔ menli mɔɔ kpondɛ kɛ yɛ Baebolo ɛzukoalɛ nee neɛnleanu gyɛne la afoa nu, yɛsuzu kɛ bɛnleɛnlea Insight on the Scriptures, “All Scripture Is Inspired of God and Beneficial,” nee yɛ mbuluku gyɛne le kɛ Daneɛle, Ayezaya nee Yekile mɔɔ ka ngapezo nwo edwɛkɛ la anu. Edwɛkɛ dɔɔnwo wɔ mbuluku ɛhye mɔ anu mɔɔ yɛbahola yɛava Baebolo ne yɛazukoa na yɛazuzu nwolɛ na ɔlua zo ‘sunsum nu nrɛlɛbɛ nee ndelebɛbo muala ayi yɛ tɛkɛɛ, amaa yɛanyia Nyamenle ɛhulolɛdeɛ ne anwo ndelebɛbo, yɛabɔ yɛ ɛbɛla ne yɛamaa yeafɛta Awulae, dahuu yɛayɛ mɔɔ ɔkulo la, na yɛ ɛbɛlabɔlɛ ne anwo ara nvasoɛ wɔ gyima kpalɛ biala mɔɔ yɛyɛ la anu, na yɛade Nyamenle edwɛkɛ ne abo kpalɛ.’—Kɔlɔ. 1:9, 10.