Belemgbunlililɛ Asalo Ɛsisilɛ—Ɛzonlenlɛ Nwuanzanwuanza Foa Mɔɔ Hyia
1 Wɔ ɛvolɛ nsuu mɔɔ ɛze ɛhɔ la anu, bɛsisi anzɛɛ bɛzia bɛziezie Belemgbunlililɛ Asalo dɔɔnwo wɔ Ghana azɛlɛsinli ye anu. Yɛ nye sɔ Belemgbunlililɛ Asalo Ɛsisilɛ ekpunli ne mɔ gyima ɛsesebɛ mɔɔ bɛyɛle nee menli kɔsɔɔti mɔɔ boale bɛ la kpole. Ɔwɔ nuhua kɛ bɛyɛ gyima dɔɔnwo ɛdeɛ, noko Belemgbunlililɛ Asalo ɛsisilɛ gyima ne dɔɔnwo tɛbɔ ɛkɛ mɔɔ ɔwɔ kɛ bɛyɛ a. Kɛzi yɛ muala yɛbahola yɛaboa ɛzonlenlɛ nwuanzanwuanza mɔɔ yɛfa yɛmaa Gyihova foa ɛhye mɔɔ hyia la ɛ?—Yek. 7:15.
2 Bɛnyia Ɛhulolɛ: Saa ɛle nolobɔlɛnli mɔɔ bɛzɔne wɔ a, yɛto ɛsalɛ yɛavɛlɛ wɔ kɛ ɛdu ɛ nwo ɛmaa na ɛ nee Belemgbunlililɛ Asalo Ɛsisilɛ ekpunli ne mɔ ɛyɛ gyima wɔ mekɛ mɔɔ bɛkɛbɔ ye nolo kɛ bɛlɛyɛ gyima bie wɔ bɛ ɛkɛ ne la. (Edw. 110:3) Ɔwɔ kɛ menli kɔsɔɔti mɔɔ tu bɛ nwo maa la yɛ menli mɔɔ lɛ ɛhulolɛ kɛ bɛkɛyɛ gyima yɛɛ bɛ nee awie mɔ kɛyɛ gyima kɛbɔ nu. (Edw. 133:1) Saa ɛnlɛ suazilɛ nwo adwenle bɔbɔ a, ɛbahola wɔayɛ dɔɔnwo wɔava wɔaboa sua bie mɔɔ bɛlɛsi la.
3 Suazilɛ ekpunli ko biala anu, mediema mrenya nnu mɔɔ bɔ mɔdenle mɔɔ bɛtete bɛ kɛ bɛboa bɛmaa bɛzi bɛ Belemgbunlililɛ Asalo ne wɔ mekɛ fɔɔnwo bie anu la a wɔ nu a. Ɛhye ati, ɔhyia kɛ menli mɔɔ wɔ ɛkɛ ne la tu bɛ nwo maa na gyima ne ali munli. Saa menli ekyi bie ala a tu bɛ nwo maa na mekɛ mɔɔ bɛfa bɛawie gyima ne la amba ye zɔ a, ɔbamaa asafo ngakyile mɔɔ hyia Belemgbunlililɛ Asalo nwo ɛsesebɛ la anwo ahyele bɛ.
4 Bɛhile Nwolɛ Anyezɔlɛ: Saa bɛanye ezukoa bɛamboa a, Belemgbunlililɛ Asalo ɛsisilɛ gyima ne ɛnrɛli munli. Wɔ gyimayɛlɛ mekɛ ne anu, asafo ne kpondɛ dabelɛ mɔɔ fɛta nee aleɛ kpalɛ maa suazilɛ ekpunli ne. Menli dɔɔnwo fi bɛ ɛhulolɛ nu fa aleɛ ngakyile boa. Eza bɛye ndoloboa bɛfa bɛtɔ ninyɛne gyɛne mɔɔ hyia la bɛboa gyima ne. Ɔdwu mekɛ ne bie a, ɛhye bahola ayɛ se amaa asafo ne ɛdeɛ, noko bɛmbu ye kɛ ɔle adesoa, emomu bɛnwu kɛ ɔle adenle mɔɔ bɛdua zo bɛda ɛlɔlɛ mɔɔ bɛlɛ bɛmaa Gyihova, ye menli nee Belemgbunlililɛ ne la ali a.— Mrɛ. 3:9.
5 Bodane mɔɔ bɛfa bɛsi Belemgbunlililɛ Asalo ne mɔ la a le kɛ, bɛkɛva ninyɛne mɔɔ bɛnyia bɛfi ɛkɛ ne la bɛkɛzi azua mɔɔ kakɛ dɔɔnwo ɛnle nwolɛ la. Bɛyɛ ɛhye amaa bɛahola bɛava ezukoa ekyi mɔɔ bɛlɛ la bɛazi Belemgbunlililɛ Asalo dɔɔnwo. Eza ɔmmaa Belemgbunlililɛ Asalo ne mɔ ɛziezielɛ nee nwolɛ banebɔlɛ ɛnyɛ se. Yɛkulo kɛ yɛkanvo bɛ kɛ bɛdie azua ɛhye mɔ mɔɔ yɛsi yɛmaa bɛ bɛto nu la. Kɛmɔ yɛze kɛ ɔnle kɛ yɛ Belemgbunlililɛ Asalo ne mɔ yɛ azua mgbole mɔɔ si menli nwo la ati, ɔboa yɛ ɔmaa yɛfa yɛ adwenle yɛsie ninyɛne “mɔɔ le kpalɛ la” azo.— Fel. 1:10.
6 Bɛnlea Bɛ Belemgbunlililɛ Asalo ne azo Boɛ: Saa bɛsi asalo bie bɛwie a, asafo ne anu amra kɔ zo fi bɛ ahonle nu ye ndoloboa boa maa bɛtua nwolɛ kakɛ ne. (2Kɔ 9:2) Ɔwɔ kɛ bɛ kɔsɔɔti bɛbu ye kɛ ɔle nwolɛ adenle kɛ bɛkɛva ezukoa bɛkɛboa na bɛkɛdu bɛ nwo bɛkɛmaa Asalo ne ɛziezielɛ, bɛkɛmaa ɔkɛyɛ kɛnlɛma, na bɛkɛli nwolɛ eni. Ɔwɔ kɛ Belemgbunlililɛ Asalo ne anu nee nwolɛ ne amuala kile kɛ ɔgyi ɛkɛ ne ɔmaa Gyihova ahyehyɛdeɛ ne.—od m. 120-121.
7 Ɛzoanvolɛ Pɔɔlo hanle menli mɔɔ wɔ asafo ne anu la anwo edwɛkɛ kɛ bɛyɛ gyima bɛbɔ nu wɔ koyɛlɛ nu ‘amaa nwonane ne anyi wɔ ɛlɔlɛ nu.’ (Ɛfɛ. 4:16) Ɛlɔlɛ mɔɔ yɛlɛ yɛmaa Gyihova nee nɔhalɛ ɛzonlenlɛ la ka yɛ maa yɛboa Belemgbunlililɛ Asalo ɛsisilɛ gyima ne.
[Debiezukoalɛ kpuyia ne mɔ]
1. Duzu a bɛhola bɛyɛ wɔ Belemgbunlililɛ Asalo ɛsisilɛ nu a, noko ngyianlɛ boni a tɛbɔ ɛkɛ a?
2. Adenle fɔɔnwo boni azo a yɛbahola yɛaboa Belemgbunlililɛ Asalo ɛsisilɛ gyima ne a?
3. Kɛzi tunwomaa sunsum hyia wɔ Belemgbunlililɛ Asalo ɛsisilɛ gyima ne anu ɛ?
4. Ndenle ngakyile boni mɔ azo a yɛkola yɛkile kɛ yɛdi yɛboa ngyehyɛleɛ ɛhye a?
5. Duzu ati a bɛsisi Belemgbunlililɛ Asalo mɔɔ ɔnle mgbole yɛɛ kakɛ dɔɔnwo ɛnle nwolɛ la ɛ?
6. Duzu a yɛbahola yɛayɛ yɛava yɛanlea yɛ Belemgbunlililɛ Asalo ne azo boɛ a?
7. Saa menli mɔɔ wɔ asafo ne anu la kɔsɔɔti yɛ gyima bɔ nu bɛmaa nɔhalɛ ɛzonlenlɛ nyia anyuhɔlɛ a, duzu a ɔmaa bɛyɛ a?