Kpuyia Ɛleka
◼ Asoo ɔle ɛtane kɛ yɛ nee nrenya anzɛɛ raalɛ mɔɔ ɔnle yɛ agyalɛ nu bokavolɛ anzɛɛ yɛ nwo sonla la kɛvea sua mɔɔ bɛdo nu la anu?
Amaneɛbɔlɛ dɔɔnwo mɔɔ ɔfese ne asa ɛha la kile kɛ mediema mrenya nee mraalɛ bie mɔ ɛva ɛyɛ bɛ subane kɛ bɛ nee nrenya anzɛɛ raalɛ mɔɔ ɔnle bɛ agyalɛ nu bokavolɛ anzɛɛ bɛ nwo sonla mɔɔ le kɛ bɛ awovolɛ, bɛ diema nrenya anzɛɛ raalɛ la kɛvea sua mɔɔ bɛdo nu la anu. Bie mɔ suzu kɛ saa ɛbɛlatane biala anzi a, ɔnle ɛtane kɛ menli nwiɔ ne kɛvea sua mɔɔ bɛdo nu la anu. Asoo ɛhye le adwenle kpalɛ?
Saa awie nee nrenya anzɛɛ raalɛ mɔɔ ɔnle ye bokavolɛ anzɛɛ ɔ nwo sonla la fea sua ko mɔɔ bɛdo nu la anu a nrɛlɛbɛ ɛnle nu ɔluakɛ ɔbamaa bɛahola bɛayɛ evinli nyɛleɛ anzɛɛ bɛabɔ ɛbɛla mgbane mgbane, titile saa bɛyɛ kɛ bɛbagya bɛ nwo a. Ɔbahola yeamaa menli mɔɔ kɛnwu bɛ la aha Alasevolɛ ne mɔ nɔhalɛlilɛ ne anwo edwɛkɛ anzɛɛ ɔbahola yeazɛkye menli bie mɔ diedi. Saa awie nee nrenya anzɛɛ raalɛ mɔɔ ɔnle ye bokavolɛ anzɛɛ ɔ nwo sonla la da sua ko anu maa aleɛ kye a ɔle subane ɛtane kpole na ɔwɔ kɛ mgbanyima ne mɔ nea di edwɛkɛ ne.—Mrɛ. 22:3; Gal. 5:19; Mat. 18:6, 7.
Awie kola twe ɔ nwo fi gyinlabelɛ ɛhye anwo ɔ? Ɛhɛe, ngyegyelɛ ɛhye to menli ɔluakɛ bɛndie nwolɛ kɔkɔbɔlɛ mɔɔ mediema bie mɔ fa maa bɛ la. (1 Kɔl. 6:18; Mrɛ. 18:12) Bie mɔ noko die bɛ nwo di somaa, na bɛmaa banebɔlɛ mɔɔ bɛte nganeɛ kɛ bɛlɛ la sua bɛ ɛhane. (Fa to Mrɛ. 6:27 anwo.) Bie mɔ no nza na bɛngola bɛnli bɛ nwo zo, yemɔti ɔmaa bɛtɔ esiane nu. Ɛhye ati, nea kɛzi ɔle kpalɛ kɛ yɛkɛdie folɛdulɛ mɔɔ wɔ Hozia 4:11 mɔɔ ka kɛ: “[Adwɔmanebɔlɛ nee] Nwanye, dɛba o, fofolɛ o, sɛkye me menli ne ndelebɛbo!”
Bɛdu Keleseɛnema folɛ fane dɔɔnwo kɛ “Bɛyɛ bɛ nye gyɛlɛmgbɛɛnye na bɛzinza!” wɔ kɛzi bɛ nee nrenya anzɛɛ raalɛ tu la anwo amaa Seetan anli bɛ nwo zo konim. (1 Pit. 5:8) Ɛhye kile kɛ ɔwɔ kɛ dahuu yɛnea boɛ. Kɛ neazo la, saa raalɛ kɔkpɔla awie mɔɔ le nrenya la wɔ Bɛtɛle, anzɛɛ saa nrenya a hɔkpɔlale raalɛ, na tɛ ɔ nwo sonla anzɛɛ ye bokavolɛ a, ɔwɔ kɛ ahenle mɔɔ wɔ Bɛtɛle la buke anlenkɛ ne wanaanwo to nwo. Ɛhye bɔ bɛ nwo bane fi sɔnea nwo. (Mat. 6:13) Sɔnea ne yɛ kpole wɔ mekɛ mɔɔ menli nwiɔ mɔɔ yɛ kɛ bɛbagya bɛ nwo sosɔ bɛ nwo wɔ fealera nu la. (1 Kɔl. 10:12) Wɔ menli mɔɔ ɛlɛtu na bɛagya bɛ nwo la afoa nu, nrɛlɛbɛ wɔ nu kɛ dahuu bɛbamaa awie aboka bɛ nwo anzɛɛ bɛbayia wɔ ɛleka mɔɔ menli ekpunli wɔ la. (Mrɛ. 28:26) Mekɛ mɔɔ ewiade ɛhye ɛbɛlabɔlɛ ɛlɛkɔ zo azɛkye la, bɛmaa yɛ nuhua ko biala ɛhɔ zo ɛbɔ ɛbɛla kpalɛ ɛva ɛwula Gyihova yɛ Selɛ ne mɔɔ anwo Te la anyunlunyia.—Mat. 5:14-16; 1 Pit. 2:12.