Dahuu Ɛka Amozi Ɔ?
1. (a) Duzu a yɛbahola yɛabiza yɛ nwo wɔ mekɛ zo ɛlilɛ nwo a? (b) Saa awie di mekɛ zo dahuu a, ɔkile duzu?
1 Ɛze ɔ? Duzu ɔ? Kɛzi ɔhyia kɛ ɛdi mekɛ zo wɔ debie biala mɔɔ ɛyɛ la anu! Ɛkɔ Belemgbunlililɛ Asalo kolaa na bɛabɔ debiezukoalɛ bo ɔ? Ɛdwu debiezukoalɛ bo ndɛ, ɛyɛ mediema nee anyelielɛma akoaba na ɛsoma bɛ wɔ mekɛ mɔɔ bɛkɛra na ɛdi ninyɛne gyɛne nwo gyima ɔ? Ɛ nee awie yɛ ngyehyɛleɛ bie a, ɛdwu ɛkɛ ne ndɛ ɔ? Saa ɛyɛ ye zɔhane a, ɛnee ɛle sonla mɔɔ di mekɛ zo. Saa awie di mekɛ zo a, ɔkile kɛ ɔsuzu awie mɔ anwo na ɔdwenle bɛ nwo. Ɔkile kɛ ɛyɛ wɔ ninyɛne pɛpɛɛpɛ, na ɔmaa menli mɔɔ nee wɔ tu la anye die ɛ nwo.
2. Saa yɛka amozi wɔ debiezukoalɛ bo mekɛ ekyi bɔbɔ a duzu a kpa yɛ ti a?
2 Adenle ko mɔɔ Keleseɛnenli bahola alua zo ahile kɛ ɔdwenle awie mɔ anwo la a le kɛ ɔkɛhɔ debiezukoalɛ bo ndɛ. Ɛhye kile ɛbulɛ maa Gyihova Nyamenle nee sunsum nu aleɛ mɔɔ ɔfa ɔmaa la. Na saa yɛka amozi wɔ debiezukoalɛ bo mekɛ ekyi bie bɔbɔ ɛ? Yɛnrɛnyia anwosesebɛ mɔɔ yɛmaa yɛ nwo ngoko na debiezukoalɛ ne abɔ ɔ bo la anu nvasoɛ. Yɛ mediema mɔɔ yɛ nee bɛ babɔ nuhua ado anyelielɛ edwɛne yɛava yɛaye Gyihova duma ne ayɛlɛ mɔɔ le yɛ ɛzonlenlɛ ne foa mɔɔ hyia la bakpa yɛ ti! Nwolɛ adenle kpole mɔɔ maa anwosesebɛ mɔɔ yɛlɛ kɛ yɛbaboka asafo ne anwo yɛahɔ Gyihova anyunlu wɔ asɔneyɛlɛ nu la noko bakpa yɛ ti.
3. (a) Saa yɛka amozi a, kɛzi ɔbaha yɛ wɔ sunsum nu ɛ? Kilehile nuhua. (b) Saa yɛka amozi a, kɛzi yɛgyegye yɛ mediema ɛ?
3 Debiezukoalɛ mekɛ ekyi mɔɔ lumua la kpa yɛ ti a, ɔle kɛ yɛlɛkenga debie na yɛbɔ ɔ bo wɔ ɛdendɛkpunli ne mɔɔ tɔ zo nna azo la—bodane ne, mukenye ne nee kɛzi yɛbade ɔ muala abo na yɛ nye alie nwolɛ la bɔ yɛ. Baebolo ne anu folɛdulɛ mɔɔ hyia la bakpa yɛ ti, eza ɔbamaa yɛagyegye yɛ mediema mɔɔ hɔle ndɛ la, na ɔnrɛmaa bɛnrɛnyia nvasoɛ dɔɔnwo bɛnrɛvi debiezukoalɛ ne anu.
4. (a) Duzu a maa menli bie mɔ dahuu ka amozi a? (b) Saa yɛta yɛka amozi a kɛzi menli babu yɛ ɛ?
4 Kɛmɔti A Bie Mɔ Ka Amozi Ɛ? Menli bie mɔ ta ka amozi, ɔluakɛ bɛnnwu kɛzi ɔhyia kɛ bɛdi mekɛ zo la. Menli ɛmbu awie mɔɔ tɛ debie biala ati a ɔta ɔka amozi la. Kɛmɔti ɛ? Wɔ menli dɔɔnwo adwenle nu, bɛbu ye kɛ ɔle awie mɔɔ ɔndwenle menli nwo, anzɛɛ bɛngola bɛnva bɛ rɛle bɛnwula ye nu yɛɛ bɛnlie ye bɛnli wɔ ninyɛne mɔɔ ɛha la anwo. Noko akee saa awie di mekɛ zo a, ɔkile kɛ ɔlɛ ɛbulɛ ɔmaa Gyihova yɛɛ ɔlɛ ɔ gɔnwo mɔ anwo ɛlɔlɛ.—Fa to Mateyu 7:12 anwo.
5. (a) Ɔdwu mekɛ ne bie a, duzu a bamaa yɛaha amozi wɔ debiezukoalɛ bo a? (b) Saa yɛka amozi bɔbɔ a, duzu a ɔwɔ kɛ yɛbɔ kpɔkɛ kɛ yɛkɛyɛ a?
5 Ɔle nɔhalɛ kɛ ɔdwu mekɛ ne bie a, ɔnva nwo mɔdenle biala mɔɔ yɛbabɔ la, yɛbaha amozi wɔ debiezukoalɛ bo. Bie a kale mɔɔ yɛbavo la bamaa yɛaha amozi anzɛɛ yɛ kale bahola azɛkye adenle nu. Awie mɔɔ ye awovolɛ amuala ɛnle asafo ne anu la bahola ayia ngyegyelɛ anzɛɛ raalɛ mɔɔ ɔ ngomekye ɔde na ɔlɛ ngakula ngyikyi la bahola ayia ngyegyelɛ wɔ mekɛ mɔɔ ɔwɔ kɛ ɔfi sua nu ala la. Saa ɔkɛyɛ boɛ a, kɛ anrɛɛ yɛbamaa debiezukoalɛ ne akpa yɛ ti la, ɔkɛyɛ kpalɛ kɛ yɛkɛbɔ mɔdenle yɛkɛhɔ debiezukoalɛ ne abo na yɛanyia nvasoɛ yɛavi nuhua. Mediema mɔɔ wɔ asafo ne anu la bade gyinlabelɛ ɛhye mɔ abo. Noko akee, wɔ ɛleka mɔɔ yɛbahola yɛayɛ gyinlabelɛ ne anwo bie la, ɔwɔ kɛ yɛnea boɛ kɛ, tɛ kɛ anyezɔlɛ mɔɔ yɛnlɛ, ngyehyɛleɛ kpalɛ mɔɔ yɛnyɛ, anzɛɛ yɛ nye mɔɔ ɛnlie nwo la ati a maa yɛyɛ menli mɔɔ ta ka amozi a.
6. Neazo boni a ɔwɔ kɛ mgbanyima nee azonvolɛ yɛ wɔ kɛzi bɛdi mekɛ zo la anwo a?
6 Nea kɛzi ɔmaa anwosesebɛ kɛ yɛkɛra debiezukoalɛ na yɛkɛnwu kɛ mgbanyima nee azonvolɛ ɛra na bɛlɛkendɛ yɛ bɛazoma yɛ anzɛɛ bɛayɛ yɛ akoaba na bɛalie yɛ zo kɛnlɛma bɛamaa yɛanwu Teokelase abusua kɛnlɛma ne mɔɔ yɛboka nwolɛ la. (Wulo. 15:7) Saa ɛle sonvolɛ anzɛɛ asafo nu kpanyinli a, kakye neazo kɛnlɛma mɔɔ ɛ nee wɔ abusua ne yɛ kɛ bɛkɛhɔ debiezukoalɛ ndɛ la.—1 Pit. 5:3.
7. Duzu a menli bie mɔ ɛyɛ ɛva ɛgyinla ngyegyelɛ ɛhye anloa a?
7 Duzu A Ɛbahola Wɔayɛ A? Kɛzi nolobɔlɛma bie mɔ ɛli ngyegyelɛ ɛhye anwo gyima ɛ? Bie mɔ ɛva asɔneyɛlɛ ɛzuzu edwɛkɛ ne anwo na bɛhɔzɛlɛ adenle wɔ gyima nu kɛ bɛbakpɔne ndɛ wɔ kenle mɔɔ bɛlɛ debiezukoalɛ la, na bɛayɛ gyima bɛawula nuhua wɔ kenle gyɛne. Debie biala mɔɔ bamaa bɛaha amozi wɔ debiezukoalɛ bo la, ɔwɔ kɛ bɛtu bɛsie kenle fofolɛ. Saa yɛyɛ ɛhye a, ɔmaa yɛnwu mɔɔ le kpalɛ la ɔlua debiezukoalɛ kɔsɔɔti mɔɔ yɛbahɔ wɔ ye mekɛ nloa la azo—Mrɛ. 21:5; Fel. 1:10.
8. Ndelebɛbo boni mɔ ati a, ɔwɔ kɛ yɛgyakyi kɛ yɛbaha amozi wɔ daselɛlilɛ ayia bo a?
8 Saa yɛlɛkɔ yɛahɔyia yɛahɔ daselɛlilɛ a, ɔhyia kɛ ɔdaye noko yɛdi mekɛ zo. Nolobɔlɛma dɔɔnwo mɔɔ ta ka amozi wɔ ayia ɛhye abo la, ɛnnyia kɛzi bɛsiezie mediema bɛmaa daselɛlilɛ ne la anu nvasoɛ. Dwenle ɛhye anwo nea, saa nolobɔlɛma bulu fa mitini nsia pɛ kendɛ adiema mɔɔ bɛkpa ye kɛ ɔnlea daselɛlilɛ ne azo mɔɔ ɛha amozi la a, ɔkile kɛ kenle ko ne bɛzɛkye dɔnehwele ko wɔ daselɛlilɛ nu. Saa yɛdi mekɛ zo a, ɔmaa yɛnyia mekɛ dɔɔnwo yɛfa yɛyɛ edwɛkɛhanlɛ nee ɛdoavolɛyɛlɛ gyima ne mɔɔ hyia la. Saa yɛdi mekɛ zo a, menli mɔɔ le fofolɛ wɔ ahyehyɛdeɛ ne anu la nyia anwodozo wɔ yɛ nu. Saa yɛkɔ ndɛ a, ɔkile kɛ yɛle menli mɔɔ yɛ edwɛkɛ le ko ‘Ɛhɛe a Ɛhɛe, yɛɛ Kyɛkyɛ a Kyɛkyɛ.’—Mat. 5:37.
9. Kɛ mɔɔ ngyinlazo ne mɔɔ wɔ 2 Kɔlentema 6:3, 4, kile la, duzu ati a ɔwɔ kɛ awovolɛ nee Baebolo kilehilevolɛma bɔ mɔdenle di mekɛ zo ɛ?
9 Ɔwɔ kɛ awovolɛ yɛ neazo kpalɛ fa maa bɛ mra, ɔlua mekɛ mɔɔ bɛbali zo la azo. Saa bɛye mekɛ mɔɔ bɛfa bɛyɛ abusua debiezukoalɛ wɔ sua nu a, ɔwɔ kɛ abusua ne anu amra kɔsɔɔti di mekɛ ɛhye azo na bɛba mekɛ nloa. Nolobɔlɛma bahola ahilehile bɛ Baebolo sukoavoma kɛzi ɔhyia kɛ bɛdi mekɛ zo wɔ bɛ dapɛne biala debiezukoalɛ ne anu la. (Luku 6:40) Saa yɛyɛ ɛhye a, menli mɔɔ nwu mɔɔ yɛlɛyɛ la babu yɛ, ɔluakɛ “Yɛmkpondɛ kɛ yɛtenda awie agyakɛ anu na awie anyia yɛ gyima ne anwo edwɛkɛ ɛtane aha.”—2 Kɔl. 6:3, 4.
10. Duzu ati a ɔwɔ kɛ yɛ muala yɛbɔ mɔdenle kɛ yɛkɛli mekɛ zo ɛ?
10 Yemɔti saa yeyɛ yɛ subane kɛ yɛka amozi dahuu a, ɔwɔ kɛ yɛkakye kɛ: Saa dahuu yɛdi mekɛ zo wɔ debiezukoalɛ bo, daselɛlilɛ nu, nee ninyɛne gyɛne mɔɔ ɛha la anu a, ɔkile kɛ yɛlɛ ɛbulɛ yɛmaa awie mɔ yɛɛ yɛdi bɛ eni. Ɔkile kɛ yɛ nye gyi yɛ ti anwo na bɛkola bɛfa bɛ rɛle bɛwula yɛ nu. Ɔkile kɛ yɛ nye sɔ sunsum nu ninyɛne mɔɔ Gyihova fa maa yɛ la amgba. Saa yɛ muala yɛnyia subane kɛnlɛma ɛhye na yɛbɔ nwolɛ mɔdenle a, yɛbahola yɛazukoa yɛali mekɛ zo!