Kpuyia Ɛleka

◼ Nwane mɔ a ɔwɔ kɛ nyia Yɛ Belemgbunlililɛ Gyima ne bie a?

Bɛyɛ Yɛ Belemgbunlililɛ Gyima ne kɛ bɛfa bɛaboa menli mɔɔ kɔ daselɛlilɛ la bɛamaa bɛanyia anwosesebɛ. Ɛhye ati, tɛ awie biala a asa ka bie a. Nolobɔlɛma kɔsɔɔti mɔɔ bɛzɔne bɛ nee mɔɔ bɛtɛsɔnenle bɛ la ɔwɔ kɛ nyia bie. Menli mɔɔ ba ɛzonlenlɛ nyianu ne abo dahuu na bɛlɛnyia anyuhɔlɛ mɔɔ bamaa bɛahɔ daselɛlilɛ la noko ɔwɔ kɛ nyia bie. (Ngakula mɔɔ bɛnyi mɔɔ bɛbahola bɛava bɛali gyima kpalɛ la boka nwo.) Bɛva ko bɛzie Belemgbunlililɛ Asalo mbuluku ɛzielɛ ɛleka ne. Ɔnle kɛ bɛmaa awie biala mɔɔ bɛdu ye la Yɛ Belemgbunlililɛ Gyima ne bie.

Asafo bie mɔ ɛnwu kɛ nvasoɛ wɔ zo kɛ bɛkɛlɛ menli mɔɔ fɛta kɛ nyia bie la aluma na bɛnea asafo buluku ɛzukoalɛ ekpunli ne mɔ azo bɛkyɛ aluma ne anu. Buluku ɛzukoalɛ zo neavolɛma bahola anlea aluma ne azo na bɛahyɛ bɛamaa bɛ, bie bɔbɔ a bɛbahɛlɛ awie biala duma kɛnlɛma wɔ ye ɛdeɛ ne azo. Awie biala mɔɔ kɛnyia Yɛ Belemgbunlililɛ Gyima ne bie la ɔwɔ kɛ nea zo boɛ, na ɔsukoa kɛzi bɛfa bɛsiezie bɛ nwo bɛmaa ɛzonlenlɛ nyianu ne nee daselɛlilɛ la. Menli dɔɔnwo ɛnwu kɛ nvasoɛ wɔ zo kɛ bɛfa Yɛ Belemgbunlililɛ Gyima ne bɛboka bɛ Teokelase mbuluku nwo bɛsie na bɛava bɛayɛ neɛnleanu kenlebie.