EDWƐKƐ TITILE | KƐZI ƐBANYIA BAEBOLO ƐGENGALƐ ZO NVASOƐ LA

Duzu A Bamaa Yeayɛ Anyelielɛ A?

Ɔbu bɛ nye ɔ? Anzɛɛ ɔyɛ anyelielɛ? Duzu a Baebolo ɛgengalɛ bamaa wɔanyia a? Dɔɔnwo bagyinla kɛzi ɛbagenga ye la azo. Maa yɛnlea mɔɔ ɛbahola wɔayɛ amaa ɛ nye alie ye ɛgengalɛ nwo la.

Kpa adwuleso ngilebɛbo kpalɛ. Saa ɛkenga debie mɔɔ ɔ bo ɛdelɛ yɛ se anzɛɛ edwɛkɛ agbɔkɛ ne mɔ ɛkpa nwo la a, bie a ɛ nye ɛnrɛlie ye ɛgengalɛ nwo. Ɔti kpondɛ Baebolo mɔɔ nuhua edwɛkɛ ne abo ɛdelɛ ɛnyɛ se mɔɔ baha wɔ ahonle la. Eza ɔwɔ kɛ ɛnea kɛ ye ngilebɛbo ne le pɛpɛɛpɛ.a

Fa adwuleso ɛlɛtɔlɔnek ninyɛne di gyima. Ɛnɛ, yɛlɛ Baebolo ne mɔɔ bɛpelente yɛɛ bie noko wɔ ɛlɛtɔlɔnek ninyɛne zo. Ɛbahola wɔagenga Baebolo bie mɔ wɔ yintanɛte zo anzɛɛ wɔahwe wɔagua kɔmpita, tabelɛte anzɛɛ fonu zo na wɔagenga. Ninyɛne gyɛne boka ngilebɛbo bie mɔ anwo mɔɔ maa ɛkpondɛ Baebolo ngyehyɛnu gyɛne ndɛndɛ wɔ edwɛkɛtile ko ne ala abo anzɛɛ ɛbava wɔatoto ngilebɛbo dɔɔnwo anwo. Saa ɛkulo kɛ ɛtie mɔɔ ɛngenga a, eza bɛhye Baebolo ne bɛgua debie zo wɔ aneɛ bie mɔ anu. Menli dɔɔnwo anye die kɛ bɛbadie edwɛkɛ wɔ mekɛ mɔɔ bɛde kale nu, bɛlɛkpo ninyɛne anzɛɛ bɛlɛyɛ gyima bie la. Nzɔne ati a ɛnzɔ mɔɔ ɛ nye die nwo la ɛnnea ɛ?

Fa Baebolo ɛzukoalɛ mbuluku di gyima. Baebolo ɛzukoalɛ mbuluku bahola aboa wɔ yeamaa wɔanyia wɔ ɛgengalɛ zo nvasoɛ dɔɔnwo. Bɛyɛ Baebolo nu ɛleka bie mɔ anwo azɛkɛlata mɔɔ ɔbaboa yeamaa wɔanwu ɛleka ɛleka bie mɔ na wɔapɛ edwɛkɛ mɔɔ sisile la anwo nvoninli wɔ mekɛ mɔɔ ɛlɛkenga la. Edwɛkɛ mɔɔ le kɛ ɛhye mɔ mɔɔ wɔ magazine ɛhye anu anzɛɛ “Baebolo Ngilehilelɛ” mɔɔ wɔ yɛ wɛbsaete jw.org/nzi abo la, baboa wɔ yeamaa wɔade Baebolo ne afoa bie mɔ abo.

Kakyihakyi wɔ ɛgengalɛ ne anu. Saa ɛlɛkenga Baebolo ne ɔvi mɔlebɛbo kɔdwu awieleɛ na ɔyɛ wɔ kɛ ɔbabu ɛ nye a, nzɔne ati a ɛmkpa Baebolo buluku mɔɔ ɛ nye die nwo na ɛmbɔ ɔ bo ɛngenga ɛ? Saa ɛkulo kɛ ɛnwu menli mɔɔ ɛlie duma wɔ Baebolo ne anu la anwo edwɛkɛ dɔɔnwo a, ɛbahola wɔagenga bɛ nwo edwɛkɛ. Neazo bie mɔɔ ɛbalua zo wɔayɛ ɛhye la wɔ ɛlɛka, “Neɛnlea Baebolo Ne Anu Na Nwu Nuhua Menli Ne” anu. Bie a ɛkpondɛ kɛ ɛkenga Baebolo tile bie anzɛɛ kɛzi edwɛkɛ bie sisile la. Duzu ati a ɛnzɔ ɛhye mɔ anu ko ɛnnea ɛ?

a Menli dɔɔnwo ɛnwu ye kɛ New World Translation of the Holy Scriptures ne anu edwɛkɛ ne le pɛpɛɛpɛ, anwodozo wɔ nu yɛɛ ye ɛgengalɛ ɛnyɛ se. Baebolo ɛhye mɔɔ Gyihova Alasevolɛ ɛyɛ la wɔ aneɛ mɔɔ bo 130 la anu. Ɛbahola wɔahwe bie wɔavi yɛ wɛbsaete jw.org azo anzɛɛ twe JW Library ne. Anzɛɛ saa ɛkulo a, Gyihova Alasevolɛ bava mɔɔ bɛpelente la bie arɛlɛ wɔ wɔ sua nu.

NEƐNLEA BAEBOLO NE ANU NA NWU NUHUA MENLI NE

**Mraalɛ nɔhavo bie mɔ**
Abegeli	1 Samoɛle tile 25
Ɛseta	Ɛseta tile 2-5, 7-9
Hana	1 Samoɛle tile 1-2
Mɛle	(Gyisɛse ɔ nli) Mateyu tile 1-2; Luku tile 1-2; eza nea Dwɔn 2:1-12; Gyima ne 1:12-14; 2:1-4
Releehabe	Dwɔhyua tile 2, 6; eza nea Hibuluma 11:30, 31; Gyemise 2:24-26
Relɛbɛka	Mɔlebɛbo tile 24-27
Sɛla	Mɔlebɛbo tile 17-18, 20-21, 23; eza nea Hibuluma 11:11; 1 Pita 3:1-6

**Mrenyia bie mɔ mɔɔ bɛle ngakyile**
Ebileham	Mɔlebɛbo tile 11-24; eza nea 25:1-11
Devidi	1 Samoɛle tile 16-30; 2 Samoɛle tile 1-24; 1 Arelemgbunli tile 1-2
Gyisɛse	Mateyu, Maake, Luku nee Dwɔn Edwɛkpa ne
Mosisi	Adendulɛ tile 2-20, 24, 32-34; Ɛdianlɛ tile 11-17, 20, 21, 27, 31; Mɛla ne tile 34
Nowa	Mɔlebɛbo tile 5-9
Pɔɔlo	Gyima ne tile 7-9, 13-28
Pita	Mateyu tile 4, 10, 14, 16-17, 26; Gyima ne tile 1-5, 8-12

BAEBOLO ƐZUKOALƐ MBULUKU MƆƆ GYIHOVA ALASEVOLƐ ƐYƐb

JW.ORG—Yɛ wɛbsaete ɛhye maa yɛnwu mbuluku dɔɔnwo mɔɔ bɛfa bɛsukoa debie, mɔɔ foa ne mɔɔ se, “Baebolo Kpuya Mɔɔ Bɛbua” boka nwo la. Eza ɔfa adehilelɛ mɔɔ maa yɛnwu kɛzi yɛbahwe JW Library ne la ɔmaa
“See the Good Land”—Brohyua ɛhye ka azɛkɛlata nee ɛleka bie mɔ mɔɔ bɛha nwolɛ edwɛkɛ wɔ Baebolo ne anu la anwo edwɛkɛ
Insight on the Scriptures—Encyclopedia Baebolo buluku ɛhye mɔɔ le foa nwiɔ la kilehile menli, ɛleka ngakyile nee edwɛkɛ agbɔkɛ mɔɔ wɔ Baebolo ne anu la abo
“All Scripture Is Inspired of God and Beneficial”—Buluku ɛhye kilehile kenle, ɛleka nee deɛmɔti bɛhɛlɛle Baebolo ne anu buluku ko biala la anu yɛɛ ɔka buluku biala anwo edwɛkɛ sikalɛ
The Bible—God’s Word or Man’s?—Buluku ekyii ɛhye mɔɔ bɛdɔ alagye bɛyɛ nwolɛ neɛnleanu la maa yɛnwu daselɛ mɔɔ kile kɛ bɛvale Nyamenle sunsum a bɛhɛlɛle Nyamenle Edwɛkɛ, Baebolo ne la
The Bible—What Is Its Message?—Brohyua ɛhye mɔɔ le mukelɛ 32 la ka edwɛkɛtile mɔɔ Baebolo ne amuala gyi zo la anwo edwɛkɛ

b Ninyɛne ɛhye mɔ bie wɔ Nrelenza nu.