Kɛ Ɔkɛyɛ Na Meabɔ Ɔ Bo Ɛ?

Duzu a baboa wɔ amaa ɛ nye alie Baebolo ɛgengalɛ nwo na wɔanyia zolɛ nvasoɛ a? Yɛ nzuzulɛ nnu mɔɔ ɛboa menli dɔɔnwo la nzonlɛ.

Kpondɛ ɛleka kpalɛ. Bɔ mɔdenle kɛ ɛbanyia ɛleka mɔɔ le koonwu la. Mmamaa ɛkɛ ne yɛ dede amaa wɔ adwenle ahɔ mɔɔ ɛlɛkenga la azo. Kɛnlaneɛ kpalɛ nee anwoma kpalɛ baboa wɔ yeamaa wɔanyia wɔ ɛgengalɛ ne azo nvasoɛ dɔɔnwo.

Nyia nwolɛ adwenle kpalɛ. Kɛmɔ Baebolo ne vi yɛ anwuma Selɛ ne ɛkɛ ne la ati, saa ɛyɛ ɛ nwo kɛ kakula mɔɔ ɔkulo kɛ ɔsukoa debie ɔfi ye awovolɛ ɛkɛ a, ɔbaboa wɔ kpalɛ. Saa ɛlɛ adwenle mɔɔ ɛndenrɛ wɔ Baebolo ne anwo a, ye fi ɛ ti anu amaa Nyamenle ahilehile wɔ.​—Edwɛndolɛ 25:4.

Yɛ asɔne kolaa na wɔagenga. Nyamenle edwɛkɛ a wɔ Baebolo ne anu a, yemɔti ɔnyɛ nwanwane kɛ yɛbahyia ye moalɛ amaa yɛade ɔ bo. Nyamenle ɛbɔ ɛwɔkɛ kɛ ɔbava ye ‘Sunsum Nwuanzanwuanza ne yeamaa bɛdabɛ mɔɔ bɛkɛbiza ye la.’ (Luku 11:13) Sunsum nwuanzanwuanza ne baboa wɔ amaa wɔade Nyamenle edwɛkɛ ne abo. Mekɛ ɛlɛkɔ la, ɔbabuke wɔ adwenle nu amaa wɔade kɛzi “Nyamenle ngyehyɛlɛ ne kuma ne kuloonwu si de la” abo.​—1 Kɔlentema 2:10.

Kenga ye mɔɔ ɛbade ɔ bo. Mmakenga ala. Dwenle mɔɔ ɛlɛkenga la anwo kpalɛ. Biza ɛ nwo kpuya ɛhye mɔ: ‘Subane boni mɔ a menwu ye wɔ ahenle mɔɔ melɛkenga ɔ nwo debie la anwo a? Kɛ ɔkɛyɛ na meava meali gyima ɛ?’

Fa bodane fɔɔnwo bie sie ɛ nye zo. Amaa wɔanyia wɔ Baebolo ɛgengalɛ ne azo nvasoɛ la, sukoa debie mɔɔ baboa wɔ kpalɛ la. Bie a ɛbahola wɔava bodane mɔɔ le kɛ ɛhye mɔ la wɔazie ɛ nye zo: ‘Mekulo kɛ mesukoa Nyamenle anwo edwɛkɛ dɔɔnwo.’ ‘Mekulo kɛ meyɛ sonlakpalɛ, meyɛ kunli anzɛɛ yelɛ kpalɛ.’ Akee kenga Baebolo ne foa bie mɔɔ baboa wɔ amaa wɔadwu zɔhane bodane ne mɔ anwo la.a

Nzuzulɛ nnu ɛhye mɔ baboa wɔ amaa wɔabɔ ɔ bo. Noko kɛ ɔkɛyɛ na wɔamaa wɔ ɛgengalɛ ne ayɛ anyelielɛ kpalɛ ɛ? Edwɛkɛ mɔɔ doa zo la bava nzuzulɛ bie mɔ amaa.