Kɛzi Nyamenle Kyekye Yɛ Rɛle La

Ɛzoanvolɛ Pɔɔlo hanle Gyihovaa anwo edwɛkɛ kɛ, ‘arɛlekyekyelɛ Nyamenle ne mɔɔ ɔkyekye yɛ rɛle wɔ amaneɛnwunlɛ kɔsɔɔti anu la.’ (2 Kɔlentema 1:3, 4) Ɔti Baebolo ne maa yɛnwu kɛ Nyamenle kola boa awie biala na esiane kpole biala ɛnle ɛkɛ mɔɔ yɛ anwuma Selɛ ne ɛngola ɛnkyekye yɛ rɛle wɔ nwo a.

Nɔhalɛ nu, saa yɛkulo kɛ Nyamenle kyekye yɛ rɛle a, ɔwɔ kɛ yɛyɛ nwolɛ debie. Saa yɛangɔ dɔketa bie ɛkɛ a, kɛ ɔkɛyɛ na yeaboa yɛ ɛ? Ngapezonli Emɔso hanle kɛ: “Menli nwiɔ ɛngola ɛmbɔ nu ɛndu adenle, kyesɛ bɛka bɛsie.” (Emɔso 3:3) Ɔti Ngɛlɛlera ne tu yɛ folɛ kɛ: “Bɛhwe bɛbikye Nyamenle, na ɔdaye noko ɔkɛbikye bɛ.”​—Gyemise 4:8.

Kɛ ɔkɛyɛ na yɛalie yɛli kɛ Nyamenle babikye yɛ ɛ? Mɔɔ limoa, ɔka ɔkile yɛ fane dɔɔnwo kɛ ɔkulo kɛ ɔboa yɛ. (Nea ɛlɛka ne anu.) Mɔɔ tɔ zo nwiɔ, yɛnyia daselɛ kpalɛ yɛfi menli mɔɔ Nyamenle kyekyele bɛ rɛle la ɛkɛ​—menli mɔɔ dɛnlanle aze, ɔvi tete ne nee ɛnɛ.

Kɛ mɔɔ menli dɔɔnwo mɔɔ yia ngyegyelɛ la, kpondɛ moalɛ fi Nyamenle ɛkɛ la, zɔhane ala a Belemgbunli Devidi noko yɛle a. Mekɛ bie, ɔzɛlɛle Gyihova kɛ, “Tie me modolɛ nzɛlɛlɛ, melɛsu meavɛlɛ wɔ kɛ ɛboa me.” Asoo Nyamenle diele ɔ? Ɛhɛe. Devidi doale zo kɛ: “Menyia moalɛ, yɛɛ medi fɛlɛko.”​—Edwɛndolɛ 28:2, 7.

MƆƆ GYISƐSE YƐ KYEKYE BƐDABƐ MƆƆ BƐDI NYANE ARƐLE LA

Nyamenle yɛle kɛ Gyisɛse a bakyekye menli arɛle a. Gyima gyɛne mɔɔ Nyamenle vale maanle Gyisɛse la a le kɛ ‘ɔkyekye menli mɔɔ arɛle ɛbɔ la arɛle’ na ɔkyekye “menli mɔɔ di nyane la arɛle.” (Ayezaya 61:1, 2) Kɛ mɔɔ bɛhanle la, Gyisɛse anye liele menli mɔɔ “bɛzo ɛnlomboɛ na bɛvɛ la” anwo.​—Mateyu 11:28-30.

Gyisɛse kyekyele menli rɛle ɔlua folɛ kpalɛ mɔɔ ɔdule bɛ, ɔ nee bɛ lile ye kɛnlɛma nu na bɔbɔ ɔdwu mekɛ ne bie a ɔyɛ bɛ ayile. Kenle ko bie, kokobɛvolɛ bie bodole Gyisɛse kɛ: “Saa ɔyɛ wɔ ɛhulolɛ a, ɛkola ɛmaa me nwo sa.” Gyisɛse nwunle ye anwunvɔne na ɔbuale kɛ, “Mekulo, ɛ nwo ɛza!” (Maake 1:40, 41) Na kokobɛvolɛ ne anwo zale.

Nyamenle Ara ne ɛnle azɛlɛ ye azo ɛnɛ mɔɔ ɔbakyekye yɛ rɛle a. Noko ye Papa, Gyihova, “arɛlekyekyelɛ Nyamenle ne” kɔ zo boa bɛdabɛ mɔɔ bɛ nwo ɛhyele bɛ la. (2 Kɔlentema 1:3) Suzu ndenle titili nna mɔɔ Nyamenle dua zo kyekye menli rɛle la anwo.

• Baebolo Ne. “Debie biala mɔɔ bɛhɛlɛ ye wɔ Nyamenle Edwɛkɛ ne anu la wɔ ɛkɛ ne kilehile yɛ, amaa yɛagyinla kpundii, yɛazi yɛ ahonle yɛalua mɔɔ Nyamenle Edwɛkɛ ne fa maa yɛ la azo yɛanyia anyelazo.”​—Wulomuma 15:4.

• Nyamenle Sunsum Nwuanzanwuanza. Gyisɛse wule la anzi, ɛnee Kilisiene asafo ne hyia arɛlekyekyelɛ nwo kpalɛ. Baebolo ne ka kɛ Nyamenle luale sunsum nwuanzanwuanza ne azo kyekyele bɛ rɛle. (Gyima ne 9:31) Sunsum nwuanzanwuanza ne, Nyamenle gyimayɛlɛ tumi ne, le tumi kpole kpalɛ. Nyamenle kola dua zo kyekye awie biala arɛle wɔ tɛnlabelɛ biala anu.

• Asɔneyɛlɛ. Baebolo ne tu yɛ folɛ kɛ, “Bɛmmadwenle debie biala anwo.” Emomu, ɔka kɛ, “bɛva mɔɔ bɛhyia nwolɛ la bɛdo Nyamenle anyunlu. Na Nyamenle anzonudwolɛ ne mɔɔ bo sonla ndelebɛbo muala azo la bazie bɛ ahonle nee bɛ adwenle gyɛlɛɛnye.”​—Felepaema 4:6, 7.

• Yɛ Gɔnwo Mɔ Kilisienema kola yɛ agɔnwolɛma kpalɛ mɔɔ yɛlɛ bɛ nu anwodozo kɛ bɛbakyekye yɛ rɛle wɔ tɛnlabelɛ mɔɔ anu yɛ se la anu. Ɛzoanvolɛ Pɔɔlo hanle kɛ ɔ gɔnwo mɔ ‘boale ye kpole kpalɛ’ wɔ ye “anwongyelelɛ nee amaneɛnwunlɛ ne mɔ anu.”—Kɔlɔsaema 4:11; 1 Tɛsalonaekama 3:7.

Noko bie a, ɛlɛdwenle kɛzi ɛhye mɔ kɔsɔɔti kola boa yɛ la anwo. Maa yɛnlea menli mɔɔ yɛhanle bɛ nwo edwɛkɛ kɛ bɛyiale ngyegyelɛ la anwubielɛ ne. Kɛ mɔɔ bɛyɛle la, ɛbahola wɔanwu kɛ Nyamenle tɛdi ye ɛwɔkɛ ɛhye mɔɔ yɛ anyelielɛ la azo: “Kɛ ninli si kyekye ɔ ra arɛle la, zɔhane ala yɛɛ mebakyekye bɛ rɛle a.”​—Ayezaya 66:13.