Kyekye Menli Mɔɔ Arɛle Ɛbɔ La Arɛle
1 Menli hyia arɛlekyekyelɛ nwo wɔ mekɛ ɛhye anu tɛla biala wɔ alesama tetedwɛkɛ nu. Mekɛ mɔɔ yɛlɛdi Kelaese Gyisɛse, yɛ Belemgbunli ne neazo ne anzi la, yɛdayɛ noko yɛbɔ mɔdenle yɛkyekye “menli mɔɔ arɛle ɛbɔ la arɛle”—Aye. 61:1.
2 Kɛzi Yɛbayɛ Ye: Amaa yɛakyekye menli arɛle la, ɔwɔ kɛ yɛka edwɛkɛ mɔɔ wula anwosesebɛ la wɔ daselɛlilɛ nu. Saa yɛanga adalɛ ngilehilelɛ nee ewiade ɛbɛlatane nwo edwɛkɛ dɔɔnwo a, ɔbamaa Ngɛlɛlera ne anu nɔhalɛ ne nee Nyamenle arɛlekyekyelɛ nwo ɛwɔkɛ ngɛnlɛma ne mɔ avinde yɛ adawubɔlɛ ne anu dɔɔnwo. Ɛhye ɛngile kɛ ɔnle kɛ yɛka Amagɛdɔn ne anwo edwɛkɛ. Yɛ gyima a le kɛ yɛbabɔ ‘nolo kɛ Gyihova anwunvɔnezelɛ mekɛ ne, nee mekɛ ne mɔɔ yɛ Nyamenle ne fa ali nzenralɛ la ɛdwu,’ na ‘yɛaha yɛahile ɛtanevolɛ kɛ ɔgyakyi ye subane.’ Noko akee, ɔnle kɛ Amagɛdɔn nee ɛzɛkyelɛ mɔɔ ɔbava yeara la anwo edwɛkɛ keda bodane ne mɔɔ ‘edwɛkpa ne mɔɔ fane Nyamenle Belemgbunlililɛ ne anwo’ gyi zolɛ la azo.—Aye. 61:2; Yiz. 3:18; Mat. 24:14.
3 Sua nu nee Sua Nu: Yɛta yɛnwu menli mɔɔ anwodolɛ, dɔvolɛ bie ewule, nzisi anzɛɛ ezukoa ti bɛ rɛle ɛbɔ la. Kɛ menli mɔɔ yɛli Kelaese anzi la, “alɔbɔlɛ” ku yɛ na yɛse menli mɔɔ yɛyia bɛ wɔ daselɛlilɛ nu la anwunvɔne. (Luku 7:13; Wulo. 12:15) Ɔwɔ nu kɛ yɛka ngɛlɛlera ne anu edwɛkɛ ko anzɛɛ nwiɔ mɔɔ fane ngyegyelɛ ne anwo la ɛdeɛ, noko ‘ɔwɔ kɛ yɛyɛ ndɛndɛ yɛtie yɛ nzo anwo,’ na yɛmaa ahenle nyia adenle ka kɛzi ɔte nganeɛ la. (Gye. 1:19) Saa yɛdumua yɛtie a, ɔbamaa yɛahola yɛakyekye bɛ rɛle kpalɛ.
4 Adawubɔlɛ ne ɛlɛkɔ zo a, mekɛ mɔɔ fɛta la anu yɛbahola yɛaha kɛ, “Mekulo kɛ meka Baebolo ne anu edwɛkɛ mɔɔ wula anwosesebɛ la mekile wɔ.” Ɔwɔ kɛ yɛfa ndelebɛbo kpalɛ yɛdi gyima na yɛandendɛ yɛantia edwɛkɛ ɛtane biala mɔɔ ahenle ne kɛha la. Emomu, ɔwɔ kɛ yɛtwe adwenle yɛkɔ Ngɛlɛlera ne anu edwɛkɛ mɔɔ baha bɛ ahonle na yeawula bɛ anwosesebɛ la azo. Wɔ ɛhye anwo, ɛbahola wɔanlea Reasoning From the Scriptures mukelɛ 117-121 wɔ edwɛkɛtile mɔɔ se “Encouragement” la abo. Anzɛɛ ɛbahola wɔava tract ne mɔɔ se Comfort for the Depressed la wɔamaa suamenle ne na ɛ nee ye azuzu edwɛkɛ mɔɔ wula anwosesebɛ mɔɔ wɔ nu la anwo.
5 Kpondɛ Adenle Dua zo Kyekye Awie mɔ Arɛle: Asoo ɛze ɛ gɔnwo, ɛ gɔnwo gyimayɛvolɛ, ɛ gɔnwo mɔɔ ɛ nee ye kɔ sukulu anzɛɛ wɔ busuanli mɔɔ hyia arɛlekyekyelɛ nwo la ɔ? Bɔ mɔdenle kɔ bɛ ɛkɛ wɔ sua nu na fa yɛ wɔ bodane kɛ ɛbavi Ngɛlɛlera ne anu wɔakyekye bɛ rɛle. Saa ɛnwu deɛmɔti bɛhyia arɛlekyekyelɛ nwo la a, ɛbahola wɔaziezie ɛ nwo kpalɛ wɔamaa zɔhane gyinlabelɛ ne. Bie mɔ ɛlua adenle ɛhye azo ɛhɛlɛ ngɛlata anzɛɛ ɛvɛlɛ wɔ telefuu zo ɛkyekye menli rɛle. Yɛ gɔnwo mɔ anwo nɔhalɛ ɛlɔlɛ baha yɛ amaa yɛade bɛ nganeɛ ne bie na yɛalua Ngɛlɛlera ne azo yɛava arɛlekyekyelɛ mɔɔ hyia la yɛamaa bɛ.—Luku 10:25-37.
6 Ɛhɛe, bɛva gyima bɛwula yɛ sa nu kɛ yɛkyekye mɔɔ ɛlɛdi nyane nee alɔbɔlɛ la arɛle, na yɛmaa bɛnyia kenlebie anyelazo kɛnlɛma. Ɛhye a le arɛlekyekyelɛ mɔɔ menli mɔɔ wɔ ewiade la hyia a. Saa yɛfi anyelielɛ nu yɛka ninyɛne kpalɛ dɔɔnwo mɔɔ Nyamenle ɛva ɛbɔ ɛwɔkɛ la a ɔbakyekye menli mɔɔ lɛ ahonle kpalɛ la arɛle na yeamaa banyia anyelazo. Bɛmaa dahuu yɛhakye kɛ ɔhyia kɛ yɛkyekye menli mɔɔ arɛle ɛbɔ la arɛle.