BAEBOLO KPUYIA MƆƆ BƐBUA
Asoo bodane bie ati a azɛlɛ ne wɔ ɛkɛ a?
Bɛbɔle azɛlɛ ne kɛ ɔyɛ aako mɔɔ anyelielɛ wɔ nu ɔmaa alesama
Yɛ azɛlɛ ne boa kpalɛ maa ngoane kɔ zo. Nzule dɔɔnwo mɔɔ hyia maa ngoane la wɔ zo. Kɛzi azɛlɛ ne kyea, ɔkakyi na ɔpɛne ɔ nwo la kɔ zo pɛpɛɛpɛ mɔɔ ɔmmaa azule mgbole ne mɔ ɛnyɛ weɛlɛkɔkɔ anzɛɛ wuluwulu mɔɔ bo zo a. Eza anwomanyunlu nee magenɛte mɔɔ wɔ azɛlɛ ne anu la bɔ nwolɛ bane wɔ wienyi mɔɔ yɛ ɛzulolɛ la anwo. Kɛzi mbaka nee nane ngoane boa bɛ nwo wɔ azɛlɛ ye azo la yɛ nwanwane. Ɛhye ati, menli dɔɔnwo ɛha kɛ bodane bie ati a bɛbɔle azɛlɛ ne a.—Kenga Ayezaya 45:18.
Noko bie a ɛbabiza kɛ: ‘Asoo amaneɛnwunlɛ nee nzisi boka zɔhane bodane ne anwo ɔ?’—Kenga Mɛla ne 32:4, 5.
Asoo azɛlɛ ne bodane bara nu?
Bɛbɔle azɛlɛ ye kɛ ɔyɛ aako kɛnlɛma ɔmaa menli mɔɔ di bɛ gɔnwo mɔ eni na bɛkulo bɛ Bɔvolɛ ne la. Ɛhye ati, sonla ngoane gyi bodane kpole zo tɛla baka anzɛɛ nane ngoane. Yɛkola yɛte ɔ bo kɛ yɛlɛ Bɔvolɛ, mɔɔ yɛkola yɛkile ye ɛlɔlɛ nee ye pɛlepɛlelilɛ ne anwo anyezɔlɛ na yɛsukoa a.—Kenga Nolobɔvo ne 12:13; Maeka 6:8.
Yɛ Bɔvolɛ ne kola yɛ debie biala mɔɔ yebɔ kpɔkɛ kɛ ɔbayɛ la. Yemɔti yɛkola yɛdie yɛdi kɛ ɔbaye amaneɛnwunlɛ nee nzisi yeavi ɛkɛ na yeamaa yɛ azɛlɛ ye azia ayɛ aako kɛnlɛma mɔɔ di munli la amaa alesama.—Kenga Edwɛndolɛ 37:11, 29; Ayezaya 55:11.