Menli Nsa Mɔɔ Kpondɛle Nɔhalɛ Ne Wɔ Ɛvoya 16 Ne Anu—Duzu A Bɛnwunle Ye A?

“DUZU a le nɔhalɛ ne?” Kpuyia ɛhye a Pɔnteɛse Paelɛte mɔɔ ɛnee le Wulomu amɛnlado wɔ Dwudiya wɔ ɛvoya ne mɔɔ lumua la, bizale Gyisɛse mɔɔ ɛnee bɛlɛdi ye edwɛkɛ wɔ amɛnlado ne anyunlu la. (Dwɔn 18:38) Nɔhalɛ nu, ɛnee Paelɛte ɛmkpondɛ kɛ ɔnwu nɔhalɛ ne amgba. Ye kpuyia ne hilele kɛ ye adwenle nu yɛle ye kesee na ɛnee ɔnlie ɔnli. Ɔda ali kɛ, wɔ Paelɛte afoa nu​—ɛnee nɔhalɛ ne a le debie biala mɔɔ awie kulo kɛ ɔdie ɔdi anzɛɛ bɛmaa ɔdie ɔdi la; adenle biala ɛnle ɛkɛ mɔɔ bɛkola bɛgyinla zo bɛkile nɔhalɛ ne a. Menli dɔɔnwo te nganeɛ zɔhane ala ɛnɛ.

Ɛnee menli mɔɔ kɔ asɔne wɔ ɛvoya 16 ne anu wɔ Europe la ɛnnwu nɔhalɛ ne mɔɔ ɔwɔ kɛ bɛdie bɛdi la. Kɛmɔ bɛhilehile bɛ bɛmanle bɛliele pope tumi ne nee asɔne ngilehilelɛ gyɛne bɛlile la ati, ɛnee ɔwɔ kɛ bɛko bɛtia Nzenzaleɛ mɔɔ ɛlɛkɔ zo wɔ Europe wɔ zɔhane mekɛ ne la. Duzu a ɔwɔ kɛ bɛdie bɛdi a? Kɛ ɔkɛyɛ na bɛanwu nɔhalɛ ne ɛ?

Wɔ zɔhane mekɛ ne, ɛnee mrenya nsa bie nee awie mɔ ɛbɔ kpɔkɛ kɛ bɛkpondɛ nɔhalɛ ne.a Kɛzi bɛnwunle nɔhalɛ ne nee mɔɔ le adalɛ la ɛ? Duzu a bɛnwunle ye a? Bɛmaa yɛnlea.

‘BƐMAA BAEBOLO NE ƐHILE ADENLE NE DAHUU’

Ɛnee Wolfgang Capito le kpavolɛ mɔɔ lɛ asɔne nu diedi kpundii a. Ɛnee Capito ɛlɛsukoa ayileyɛlɛ, mɛla yɛɛ asɔne nwo debie, yemɔti ɔyɛle ɛsɔfo wɔ 1512 na akee ɔyɛle ɛsɔfo ɔmanle ɛsɔfo kpanyinli ne mɔɔ wɔ Mainz la.

Mɔlebɛbo ne, Capito bɔle mɔdenle kɛ ɔmaa Nzenzaleɛ mɔɔ bɛlɛka nwolɛ edwɛkɛ mɔɔ tia Katɔlek ngilehilelɛ ne la anwo mɔdenlebɔlɛ ne aha aze. Noko, yeangyɛ Capito mumua ne bɔle ɔ bo kɛ ɔka nzenzaleɛ nwo edwɛkɛ. Duzu a ɔyɛle a? Mekɛ mɔɔ bɛvale ngilehilelɛ ngakyile ne bɛdole Capito anyunlu la, tetedwɛkɛ kɛlɛvolɛ James M. Kittelson kile kɛ, ɔhanle kɛ “debie mɔɔ bɛbahola bɛagyinla zo bɛabua bɛ edwɛkɛhanlɛ ne la a le Baebolo ne, ɔluakɛ yemɔ ala a le nɔhalɛ a.” Ɛhye ati Capito hanle kɛ paano nee nwanye ne mɔɔ bɛkile kɛ ɔkakyi Gyisɛse nwonane nee ye mogya ne yɛɛ anwodelɛma mɔɔ bɛdi bɛ eni mɔɔ asɔne ne kilehile la ɛngyi ngɛlɛlera ne azo. (Nea ɛlɛka “Bɛnea Kɛ Ɔle Nɔhalɛ A.”) Wɔ 1523 ne anu, Capito gyakyile gyima titile mɔɔ ɔyɛ ɔmaa ɛsɔfo kpanyinli ne la, na ɔhɔdɛnlanle suakpole Strasbourg, ɛleka mɔɔ ɛnee asɔne nu nzenzaleɛ ɛlɛkɔ zo wɔ zɔhane mekɛ ne la.

Ɛnee Capito sua ne mɔɔ wɔ Strasbourg la anu a menli mɔɔ lɛ asɔne nwo adwenle ngakyile la yia na bɛsuzu asɔne edwɛkɛ nee Baebolo ngilehilelɛ dɔɔnwo anwo a. Menli mɔɔ kulo Nzenzaleɛ la bie mɔ zile Nsa-Ko ngilehilelɛ ne adua ɛdeɛ, noko buluku ne mɔɔ bɛfɛlɛ ye The Radical Reformation la ka kɛ, ninyɛne mɔɔ Capito hɛlɛle la da ye ali kɛ “yeanga Nsa-Ko ngilehilelɛ ne anwo edwɛkɛ yeangile awie mɔ.” Kɛmɔti ɛ? Capito anye liele kɛzi Michael Servetus mɔɔ vi Spain mɔɔ ɛzukoa asɔne nwo debie gyinlanle Baebolo tɛkese zo hilele kɛ Nsa-Ko ne ɛnle nɔhalɛ la anwo.b

Awie kpo Nsa-Ko ne a ye ngoane bahola ala esiane nu, yemɔti Capito nleanle kɛ ɔnrɛha kɛzi ɔte nganeɛ la wienyi. Noko akee, ye edwɛkɛ mɔɔ ɔhɛlɛle la kile kɛ ɛnee yelumua yezu Nsa-Ko ngilehilelɛ ne anwo kpolera kolaa na yeayia Servetus. Katɔlek ɛsɔfo bie hɛlɛle ye amozi kɛ Capito nee ɔ gɔnwo mɔ “hɔle zo zuzule nwo wɔ fealera nu,​—bɛzuzule asɔne feabo edwɛkɛ mɔɔ tɛla biala la anwo na bɛkpole Nsa-Ko Nwuanzanwuanza ne.” Ɛvoya bie anzi, bɛdianle Capito bɛbokale menli mɔɔ bɛlie duma kɛ bɛkɛlɛ debie bɛtia Nsa-Ko ne la anwo.

Ɛnee Capito die di kɛ nɔhalɛ ne wɔ Baebolo ne anu. Ɔhanle kɛ, “Bɛmaa Baebolo ne nee Kelaese mɛla ne ɛhile asɔne ne adenle dahuu.” Dkt. Kittelson kile kɛ, Capito hanle kɛ “menli mɔɔ zukoale asɔne nwo debie la ambɔ mɔdenle ɔluakɛ bɛbule bɛ nye bɛguale Ngɛlɛlera ne azo.”

Martin Cellarius (mɔɔ eza bɛfɛlɛ ye Martin Borrhaus la), kpavolɛ bie mɔɔ ɛnee ɔde Capito sua nu wɔ 1526 la anye liele mɔdenle zɛhae mɔɔ bɛbɔ bɛsukoa Nyamenle Edwɛkɛ ne anu nɔhalɛ ne la anwo.

“NƆHALƐ NYAMENLE NE ANWO NRƐLƐBƐ”

Bɛwole Cellarius wɔ 1499, ɛnee ɔbɔ mɔdenle ɔsukoa asɔne nee nrɛlɛbɛnwunlɛ nwo debie. Ɔyɛle kilehilevolɛ gyima wɔ Wittenberg, mɔɔ wɔ Germany la. Kɛmɔ Wittenberg a ɛnee Nzenzaleɛ nwo edwɛkɛ kɔ zo wɔ ɛkɛ la ati, yeangyɛ Cellarius vale Martin Luther nee menli mɔɔ kulo kɛ bɛkakyi asɔne ngilehilelɛ ne la agɔnwolɛ. Ɛnee kɛ ɔkɛyɛ na Cellarius anwu ngakyile mɔɔ wɔ sonla adwenle nee Ngɛlɛlera nu nɔhalɛ ne anu la ɛ?

Kɛmɔ buluku Teaching the Reformation kile la, ɛnee Cellarius die di kɛ nɔhalɛ ndelebɛbo gyi “mɔdenlebɔlɛ mɔɔ bɛfa bɛkenga Ngɛlɛlera, Ngɛlɛlera ne mɔɔ bɛfa bɛtoto nwo yɛɛ anlubɛnwo mɔɔ bɛfa bɛboka asɔneyɛlɛ nwo la azo.” Duzu a Cellarius nwunle ye wɔ Baebolo ne mɔɔ ɔnleɛnleanle nu la anu a?

Wɔ July 1527 ne anu, Cellarius hɛlɛle mɔɔ ɔnwunle ye la wɔ buluku bie mɔɔ ati se, On the Works of God la anu. Ɔhɛlɛle kɛ asɔne ɛlolɛ debie mɔɔ le kɛ paano nee nwanye ne mɔɔ bɛkile kɛ ɔkakyi Gyisɛse nwonane nee ye mogya ne la le sɛkɛlɛneɛ bɔkɔɔ. Kɛmɔ Benleravolɛ Robin Barnes hilele la, Cellarius buluku ne eza “hilehilele ngɛlɛlera nu ngapezo bie mɔɔ kile kɛ munzule nee amaneɛnwunlɛ bara na akee anyelielɛ nee ninyɛne boɛyɛlɛ ali ɔ nzi ara la anu.”​—2 Pita 3:10-13.

Ɔhyia kɛ yɛyɛ ye nzonlɛ titile kɛ Cellarius hanle kɛzi Gyisɛse Kelaese de la anwo edwɛkɛ sikalɛ bie ala. Yeandendɛ yeantia Nsa-Ko ne wienyi ɛdeɛ, noko Cellarius manle ngakyile mɔɔ wɔ “Anwuma Selɛ” ne nee “ɔ Ra Gyisɛse Kelaese” anu la lale ali na ɔhɛlɛle kɛ Gyisɛse le nyamenle dɔɔnwo ne anu ko yɛɛ ɔle tumivolɛ bedevinli Nyamenle amra ne mɔ ko.​—Dwɔn 10:34, 35.

Wɔ buluku Antitrinitarian Biography (1850) anu, Robert Wallace hanle kɛ mɔɔ Cellarius hɛlɛle la ɛnzɔho Nsa-Ko ngilehilelɛ ne mɔɔ ɛnee ɔlɛkɔ zo wɔ ɛvoya 16 ne anu la.c Ɛhye ati nwomama dɔɔnwo hanle kɛ ɔbayɛ kɛ Cellarius ɛkpo Nsa-Ko ngilehilelɛ ne. Bɛbule ye kɛ ɔle awie mɔɔ Nyamenle luale ɔ nwo zo manle “nɔhalɛ Nyamenle ne nee Kelaese anwo nɔhalɛ ne dwule menli ɛkɛ a.”

ANYELAZO KƐ NINYƐNE BAZIA AYƐ BOƐ

Ɛvolɛ kɛyɛ 1527 ne anu, Johannes Campanus, mɔɔ sukoa asɔne nwo debie na ye mekɛ zo amra bu ye kɛ nwomama mɔɔ ɛbe anu ko la vale Wittenberg yɛle ye sua nu. Ɛnee ɔkulo asɔne nu nzenzaleɛ ɛdeɛ, noko Campanus anye anlie Martin Luther ngilehilelɛ ne anwo. Kɛmɔti ɛ?

Campanus dendɛle tiale paano nee nwanye ne mɔɔ kakyi Gyisɛse nwonane nee ye mogya wɔ mekɛ mɔɔ bɛlɛbɔ Mass la. Eza ɔdendɛle ɔtiale Luther ngilehilelɛ ne mɔɔ kile kɛ paano ne nee nwanye ne nee Kelaese nwonane ne “bɔ nu tɛnla” wɔ Awulae Nɔsolɛ Aleɛ ne abo la. Buluku kɛlɛvolɛ André Séguenny kile kɛ, ɛnee Campanus die di kɛ “paano ne le paano dahuu, noko kɛmɔ ɔle ɛlolɛ debie la ati, sɛkɛlɛneɛ adenle zo ɔgyi ɛkɛ ɔmaa Kelaese nwonane ne.” Wɔ ɛvolɛ 1529, Marburg Ayia ne mɔɔ bɛyɛle kɛ bɛfa bɛazuzu kpuyia ɛhye mɔ anwo la abo, bɛammaa Campanus anga mɔɔ yezukoa yevi Ngɛlɛlera ne anu la anwo edwɛkɛ. Ɛhye anzi, ɔ gɔnwo mɔ mɔɔ kulo Nzenzaleɛ mɔɔ wɔ Wittenberg la kpole ye.

Nzenzaleɛma ne vale ɛya titile wɔ diedi mɔɔ ɛnee Campanus lɛ wɔ Selɛ ne, Ralɛ ne nee sunsum nwuanzanwuanza ne anwo la anwo. Wɔ ye Restitution buluku ne mɔɔ ɔyɛle ye 1532 la anu, Campanus hilele kɛ Gyisɛse nee ɔ Ze le menli ngakyile nwiɔ. Ɔhilele nu kɛ, Selɛ ne nee Ralɛ ne le “ko,” kɛmɔ kunli nee yelɛ le “sonla ko” la​—bɛle ko, noko bɛle menli nwiɔ. (Dwɔn 10:30; Mateyu 19:5) Campanus hanle kɛ Ngɛlɛlera ne ka edwɛkɛ ko ne ala mɔɔ kile kɛ Selɛ ne lɛ Ralɛ ne anwo zo tumi la kɛ: ‘Raalɛ ati a le nrenya, yɛɛ Kelaese noko ati a le Nyamenle.’​—1 Kɔlentema 11:3.

Na sunsum nwuanzanwuanza ne noko ɛ? Bieko, Campanus gyinlanle Baebolo ne azo hɛlɛle kɛ: “Ngɛlɛlera biala ɛngile kɛ Sunsum Nwuanzanwuanza a le sonla mɔɔ tɔ zo nsa a . . . Nyamenle fa ye tumi ne yɛ gyima, ɔluakɛ Ɔdua ye sunsum ne tumi zo ɔsiezie na ɔyɛ debie biala.”​—Mɔlebɛbo 1:2.

Luther hanle kɛ Campanus le munzuvo yɛɛ ɔle Nyamenle Ara ne kpɔvolɛ. Nzenzaleɛma ko hanle kɛ bɛhu Campanus. Noko, Campanus anzulo. Kɛmɔ The Radical Reformation ne kile la, “ɛnee Campanus die di kɛ kɛmɔ bɛande mɔɔ ɛzoanvolɛma nee Baebolo ne ka fane Nsa-Ko ne nee sonla nwo abo la ati a asɔne ne dɔle aze a.”

Campanus anyɛ ye adwenle kɛ ɔte asɔne bie. Ɔhanle kɛ, ɔkpondɛle nɔhalɛ ne “wɔ eku dɔɔnwo nee nzenzaleɛma avinli” mgbane. Yemɔti ɛnee ɔ nye la kɛ Katɔlek Asɔne ne bazia ayɛ ninyɛne boɛ na bɛahilehile nɔhalɛ Keleseɛne ngilehilelɛ ne bieko. Noko, awieleɛ ne, Katɔlek mgbanyima hyele Campanus na ɔbayɛ kɛ ɔlale efiade mɔɔ bo ɛvolɛ 20 la. Tetedwɛkɛ kɛlɛvoma die di kɛ ɔwule ɛvolɛ kɛyɛ 1575 ne anu.

“BƐZƆ NINYƐNE KƆSƆƆTI BƐNLEA”

Baebolo ne mɔɔ Capito, Cellarius, Campanus nee awie mɔ zukoale ye kpalɛ la manle bɛnwunle nɔhalɛ ne bɛvile adalɛ ne anwo. Menli mɔɔ kpondɛle nɔhalɛ ne la edwɛkɛ ne amuala nee mɔɔ Baebolo ne ka la ɛnle ko ɛdeɛ, noko menli ɛhye mɔ mɔɔ ɛndu bɛ nwo la nleɛnleanle Ngɛlɛlera ne anu na bɛ nye liele nɔhalɛ mɔɔ bɛzukoale la anwo.

Ɛzoanvolɛ Pɔɔlo dule ɔ gɔnwo mɔ Keleseɛnema folɛ kɛ: “Bɛzɔ ninyɛne kɔsɔɔti bɛnlea, bɛva mɔɔ le kpalɛ la bɛzie.” (1 Tɛsalonaekama 5:21) Amaa wɔanyia moalɛ wɔava wɔakpondɛ nɔhalɛ ne la, Gyihova Alasevolɛ ɛyɛ buluku bie mɔɔ ɔ ti ne fɛta la, Duzu A Baebolo ne Kilehile Amgba A?