Kɛzi Yɛboa Bɛdabɛ Mɔɔ Bɛhyia Moalɛ La
FRANÇOIS le asafo nu kpanyinli wɔ maanle bie mɔɔ ɛlɛnyia anyuhɔlɛ la anu. Ɔka kɛ: “Basabasayɛlɛ rale ma bie mɔɔ bɛdole la abo, ɔmanle Gyihova Alasevolɛ bie mɔ vi bɛ sua nu nriandile. Ɛnee bɛnnyia aleɛ nee ayile, yemɔti ekyi ne mɔɔ ɛnee wɔ ɛkɛ la bolɛ yɛle se kpalɛ. Bɛtotole bange nu na ɛnee milahyinli mɔɔ bɛfa bɛye ezukoa la kɔsɔɔti ɛnyɛ gyima.”
Ndɛndɛ ne ala, mediema mɔɔ yɛ gyima wɔ maanle ne anu Bɛtɛle ɛkɛ la vale ninyɛne hɔmanle Alasevolɛ mɔɔ ɛnee ɛboa bɛ nloa wɔ Belemgbunlililɛ Asalo ne mɔ mɔɔ wɔ maanle ne anu la kɔsɔɔti. Atuadelɛma duale ndenle ne, noko kɛmɔ bɛze kɛ Alasevolɛ ne mɔ ɛnle afoa biala la ati, ɛnee bɛmaa asafo kale ne mɔ pɛ nu.
François ka kɛ: “Mekɛ mɔɔ yɛlua adenle nu yɛlɛkɔ Belemgbunlililɛ Asalo ko anu la, bɛdole etu wɔ yɛ kale ne anu. Noko akee, etu bolɛ ne zenle yɛ avinli. Mɔɔ yɛnwunle kɛ sogyanli bie lɛ ɛtu ɔlɛba yɛ nwo ɛkɛ la, yɛhakyile kale ne anye ndɛndɛ yɛziale yɛhɔle ɔfese ɛkɛ. Yɛyɛle Gyihova mo kɛ bɛangu yɛ la. Aleɛ hyenle la, mediema 130 ne mɔɔ ɛnee bɛwɔ Belemgbunlililɛ Asalo ɛkɛ la holale hɔle ɛleka mɔɔ banebɔlɛ wɔ la. Bie mɔ rale ɔfese ɛkɛ ne manle yɛboale bɛ sunsum nee nwonane nu hɔkpulale kɛ konle ne abo pɛle la.”
François ka kɛ: “Mediema dɔɔnwo mɔɔ bɛwɔ maanle ne anu la hɛlɛle ngɛlata lale yɛ ase.” Bɛhanle kɛ, “moalɛ mɔɔ bɛ mediema mɔɔ bɛwɔ ɛleka ngakyile ɛva ɛboa bɛ la ɛmaa bɛ anwodozo mɔɔ bɛlɛ ye wɔ Gyihova anu la ɛyɛ kpole.”
Saa esiane si na yɛ diema bie hyia moalɛ a, yɛnva yɛ nloa mgbane yɛnga yɛngile ye kɛ “ɛ nwo ɛyɛ wɔ wuluwulu na di aleɛ maa ɛ ko ɛyi.” (Gye. 2:15, 16) Emomu, yɛbɔ mɔdenle yɛboa bɛ wɔ nwonane afoa nu ninyɛne nu. Wɔ ɛvoya ne mɔɔ lumua la anu noko, mekɛ mɔɔ ɛdoavolɛma ne dele kɛ ɛhɔne bie bara la, bɛbɔle “kpɔkɛ kɛ bɛkeha bɛ sa aze na mɔɔ bɛkɛnyia ye la bɛava bɛahɔboa mediema mɔɔ wɔ Dwudiya la.”—Gyi. 11:28-30.
Kɛ Gyihova azonvolɛ la, yɛkulo kɛ yɛboa bɛdabɛ mɔɔ bɛhyia nwonane afoa nu ninyɛne la. Noko akee, menli hyia sunsum nu ninyɛne noko. (Mat. 5:3) Amaa menli anwu bɛ ngyianlɛ ɛhye na bɛali nwolɛ gyima la, Gyisɛse zoanle ye ɛdoavolɛma kɛ bɛmaa menli ɛrayɛ ye ɛdoavolɛma. (Mat. 28:19, 20) Yɛ nuhua ko biala fa ye mekɛ, ye anwosesebɛ nee ye ezukoa yɛ gyima ɛhye. Kɛ ahyehyɛdeɛ la, yɛfa ndoboa mɔɔ mediema ye la bie yɛtɔ ninyɛne yɛboa menli mɔɔ hyia moalɛ la, noko ndoboa mɔɔ yɛye la bodane titile a le kɛ yɛfa yɛaboa Belemgbunlililɛ gyima ne na yɛadɛlɛ edwɛkpa ɛhanlɛ gyima ne anu. Yemɔti, yɛdua ɛhye ɛyɛlɛ zo yɛkile kɛ yɛkulo Nyamenle nee yɛ gɔnwo mɔ.—Mat. 22:37-39.
Ɔwɔ kɛ bɛdabɛ mɔɔ bɛye ndoboa bɛboa Gyihova Alasevolɛ ewiade amuala gyima ne la nyia anwodozo kɛ bɛbava bɛ ndoboa ne bɛali gyima wɔ adenle kpalɛ zo. Asoo ɛbahola wɔaboa ɛ mediema mɔɔ bɛhyia moalɛ la? Asoo ɛlɛ ɛhulolɛ kɛ ɛbaboa ɛdoavolɛyɛlɛ gyima ne? “Saa ɛyɛ na ɔkɛyɛ boɛ a, yɛ menli mɔɔ ɔwɔ kɛ ɛyɛ bɛ boɛ la boɛ.”—Mrɛ. 3:27.