Nɔhalɛ Ne Bamaa Bɛanyia Bɛ Ti

Kenle ko bie, ɛnee Gyisɛse ɛlɛka ɔ Ze, Gyihova anwo edwɛkɛ wɔ Gyɛlusalɛm, na ɔlɛkpa adalɛ ɛzonlenlɛ mgbanyima mɔɔ wɔ ye mekɛ zo la anwo ɛdanlɛ. (Dwɔn 8:12-30) Mɔɔ ɔhanle ye wɔ zɔhane mekɛ ne la maa yɛnwu kɛzi bɛneɛnlea Nyamenle anwo diedi mɔɔ ɛlie duma anu ɛnɛ la. Gyisɛse hanle kɛ: “Saa bɛkɔ zolɛ bɛdi me ngilehilelɛ zo a, ɛnee bɛle me ɛdoavolɛma amgba; bɛbanwu nɔhalɛ ne, na nɔhalɛ ne bamaa bɛanyia bɛ ti.”—Dwɔn 8:31, 32.

“Bɛkɔ zolɛ bɛdi me ngilehilelɛ zo a.” Wɔ ɛke, Gyisɛse ɛmaa yɛnwu debie mɔɔ yɛbagyinla zo yɛanwu kɛ ɛzonlenlɛ bie kilehile “nɔhalɛ ne” a. Saa ɛte Nyamenle anwo edwɛkɛ bie a, biza ɛ nwo kɛ, ‘Asoo ɛhye nee Gyisɛse edwɛkɛ ne yɛɛ mɔɔ ɛha wɔ Ngɛlɛlera Nwuanzanwuanza ne anu la le ko?’ Sukoa menli mɔɔ diele ɛzoanvolɛ Pɔɔlo “na dahuu bɛnleɛnleanle Nyamenle Edwɛkɛ ne anu kpalɛ kɛ saa mɔɔ Pɔɔlo ɛlɛka la le nɔhalɛ” la.—Gyima ne 17:11.

Marco, Rosa yɛɛ Raymonde, mɔɔ yɛlumuale yɛhanle bɛ nwo edwɛkɛ nee Gyihova Alasevolɛ zukoale Baebolo ne na bɛnleɛnleanle bɛ diedi ne anu boɛ. Duzu a bɛnwunle ye a?

Marco: “Yɛ Baebolo kilehilevolɛ ne vale Ngɛlɛlera ne buale kpuyia biala mɔɔ me nee me ye lɛ la. Gyihova anwo ɛlɔlɛ mɔɔ yɛlɛ la bɔle ɔ bo yɛle kpole, na yɛbikyele yɛ nwo kpalɛ kɛ kunli nee yelɛ la!”

Rosa: “Alumua ne, ɛnee mesuzu kɛ Baebolo ne le sonla adwenle ala mɔɔ bɛbɔ mɔdenle bɛfa bɛkilehile kɛ Nyamenle wɔ ɛkɛ a. Noko akee, ngyikyi ngyikyi, Baebolo ne buale me kpuyia ne mɔ. Kɛkala, akee menwu kɛ Gyihova wɔ ɛkɛ. Ɔle Awie mɔɔ mebahola mealie ye meali.”

Raymonde: “Menzɛlɛle Nyamenle kɛ ɔboa ɔmaa menzukoa ɔ nwo debie. Yeangyɛ, me nee me hu bɔle ɔ bo kɛ yɛsukoa Baebolo ne. Awieleɛ ne, yɛnwunle Gyihova anwo nɔhalɛ ne! Yɛ nye liele kpole kɛ yɛnwunle Nyamenle holɛ ko mɔɔ ɔde la.”

Baebolo ne ɛmmaa yɛnnwu Nyamenle anwo adalɛ ala; ɔka ye subane ngɛnlɛma ne anwo edwɛkɛ. Ɔle ye Edwɛkɛ mɔɔ vi sunsum nu, na ɔboa ɔmaa yɛnwu “ninyɛne mɔɔ Nyamenle ɛva ɛlo yɛ la amuala.” (1 Kɔlentema 2:12) Duzu ati a ɛnnea kɛzi Baebolo ne bua Nyamenle, ye bodane ne nee yɛ kenlebie anwo kpuyia mɔɔ hyia la ɛ? Kenga kpuyia ɛhye mɔ bie mualɛ wɔ “Bible Teachings > Bible Questions Answered” wɔ www.jw.org. Ɛbahola noko wɔazɛlɛ kɛ bɛ nee wɔ ɛzukoa Baebolo ne wɔ Intanɛte Address ɛleka ne anzɛɛ wɔaha wɔahile Gyihova Dasevolɛ bie. Yɛlɛ anwodozo kɛ ɛyɛ zɔ a, ɛbanwu kɛ ɔnyɛ se kɛ ɛbahulo Nyamenle wɔadɛla kɛzi ɛnee ɛdwenle la.