BAEBOLO KPUYA MƆƆ BƐBUA
Yɛbahola yɛanwu Nyamenle anwo nɔhalɛ ne ɔ?
Duzu ati a nyamenle kpondɛ kɛ yɛnwu nɔhalɛ ne a? kenga Dwɔn 17:3
Nyamenle nee alesama di ngitanwo. Yelua ye sunsum nwuanzanwuanza ne, anzɛɛ ye gyimayɛlɛ tumi ne azo yeva ye edwɛkɛ ne yewula Baebolo kɛlɛvoma adwenle nu. (2 Pita 1:20, 21) Yɛbahola yɛalua Baebolo ne ɛgengalɛ zo yɛanwu Nyamenle anwo nɔhalɛ ne.—Kenga Dwɔn 17:17; 2 Temɔte 3:16.
Nyamenle dua Baebolo ne azo ɔmaa yɛnwu ɔ nwo edwɛkɛ dɔɔnwo. Ɔmaa yɛnwu deɛmɔti ɔbɔle sonla la, mɔɔ ɔbayɛ yeamaa alesama nee kɛzi ɔkulo kɛ yɛbɔ yɛ ɛbɛla la. (Gyima ne 17:24-27) Gyihova Nyamenle kulo kɛ yɛnwu ɔ nwo nɔhalɛ ne.—Kenga 1 Temɔte 2:3, 4.
Duzu ati a Nyamenle fɛlɛ menli mɔɔ kulo nɔhalɛ ne la ɛ?
Gyihova a le nɔhalɛ Nyamenle ne a, na ɔzoanle ɔ Ra, Gyisɛse kɛ ɔrahilehile alesama nɔhalɛ ne. Ɛhye ati, bɛdabɛ mɔɔ bɛkulo nɔhalɛ ne la tie Gyisɛse. (Dwɔn 18:37) Nyamenle kulo kɛ menli ɛhye mɔ yɛ ye azonvolɛ.—Kenga Dwɔn 4:23, 24.
Seetan Abɔnsam ɛmmaa menli dɔɔnwo ɛnnwu Nyamenle ɔlua adalɛ edwɛkɛ mɔɔ ɔka ɔfale Nyamenle anwo la. (2 Kɔlentema 4:3, 4) Menli mɔɔ ɛngulo kpalɛyɛlɛ la tie adalɛ ngilehilelɛ ɛhye. (Wulomuma 1:25) Noko ahonlekpalɛma mgbe dɔɔnwo dua Baebolo ne azo nwu Nyamenle anwo nɔhalɛ ne.—Kenga Gyima ne 17:11.