EDWƐKƐ TITILE | ADALƐ MƆƆ MAA BƐDWENLE KƐ NYAMENLE ƐNLƐ ƐLƆLƐ LA
Adalɛ Mɔɔ Bɛbɔ Kɛ Nyamenle Ati Yɛ Se
MƆƆ MENLI DƆƆNWO DIE DI LA “Menli mɔɔ kɛyɛ ɛtane la wu ala a bɛ ɛkɛla kɔ hell, na bɛtwe bɛ nzo wɔ ɛkɛ wɔ ‘senle mɔɔ ɛnnu ɛlɛ la anu.’” (Catechism of the Catholic Church) Asɔne mgbanyima bie mɔ ka kɛ hell le ɛleka mɔɔ awie kɔ a ɛnee yehwe ɔ nwo yevi Nyamenle anwo kolaa.
BAEBOLO NE ANU NƆHALƐ NE “Awie [ɛkɛla] biala mɔɔ kɛyɛ ɛtane la, bawu.” (Yizikeɛle 18:4) Mɔwuamra “ɛnze ɛhwee.” (Nolobɔvo ne 9:5) Saa ɛkɛla ne wu na ɔnze ɛhwee a, kɛzi ɔbanwu amaneɛ wɔ “senle mɔɔ ɛnnu ɛlɛ” la anu anzɛɛ ɔbali nyane kɛ yehwe ɔ nwo yevi Nyamenle anwo dahuu ɛ?
Wɔ Baebolo ne anu, Hibulu nee Giliki edwɛkɛ agbɔkɛ mɔɔ bɛhile ɔ bo “hell” la gyi ɛkɛ maa ɛbolɔ. Kɛ neazo la, mekɛ mɔɔ Dwobu ɛlɛnwu amaneɛ la ɔzɛlɛle kɛ: “Me kunlu a anrɛɛ wɔva me wɔvea ɛbolɔ [“wɔ hell,” Douay-Rheims Version].” (Dwobu 14:13, Holy Bible—Easy-to-Read Version) Ɛnee Dwobu kulo kɛ ɔdie ɔ menle wɔ ɛbolɔ, na tɛ amaneɛnwunlɛ ɛleka bie anzɛɛ ɛleka mɔɔ bama yeahwe ɔ nwo yeavi Nyamenle anwo la.
DEƐMƆTI ƆHYIA LA Atisesebɛyɛlɛ ɛmmaa yɛmbikye Nyamenle; ɔmaa yɛtwe yɛ nwo yɛfi ɔ nwo. Rocío, mɔɔ wɔ Mexico la ka kɛ, “Me ngakula nu yɛɛ bɛhilehilele me hellsenle nwo debie a. Me ahonle dule yemɔti ɛnee mesuzu kɛ Nyamenle ɛnlɛ subane kpalɛ biala. Ɛnee medwenle kɛ ɔkulo ɛyavalɛ yɛɛ ɔnde sonla edwɛkɛ bo.”
Nyamenle ndɛnebualɛ nwo edwɛkɛ mɔɔ Baebolo ne ka ye wienyi nee gyinlabelɛ mɔɔ mɔwuamra wɔ nu la manle Rocío hakyile kɛzi ɔbu Nyamenle la. Ɔka kɛ, “Me nwo dɔle me—kɛ bɛye adesoa bie wɔ me ti zo la. Menliele menlile kɛ Nyamenle kulo kɛ yɛnyia debie kpalɛ, ɔkulo yɛ, yɛɛ mebahola meanyia ɔ nwo ɛhulolɛ. Ɔle kɛ selɛ mɔɔ sɔ ɔ mra sa na ɔkpondɛ kɛ bɛnyia debie kpalɛ la.”—Ayezaya 41:13.
Menli bɔ mɔdenle yɛ debie kpalɛ ɔluakɛ bɛsulo hellsenle la ati, noko Nyamenle ɛngulo kɛ ɛsonle ye kɛmɔ ɛsulo ye la ati. Emomu, Gyisɛse hanle kɛ: ‘Ɔwɔ kɛ ɛkulo Gyihova wɔ Nyamenle ne.’ (Maake 12:29, 30) Bieko, saa yɛnwu kɛ Nyamenle ɛnyɛ ninyɛne mɔɔ ɛngile pɛlepɛlelilɛ la ɛnɛ a, ɔmaa yɛdie yɛdi kɛ kenlebie ɔbabua ndɛne fɔɔnwo. Kɛmɔ Dwobu agɔnwo Ɛlaehu yɛle la, yɛbahola yɛava anwodozo yɛaha kɛ: “Ɔle bɛkyi kɛ Nyamenle kɛyɛ amumuyɛ, anzɛɛ Tumivolɛ ne kɛyɛ ɛtane.”—Dwobu 34:10.