Nwane A Ɔwɔ Kɛ Kilehile Ngakula Nyamenle Anwo Debie A?

“Ɛdoavolɛ ɛnle kpole ɛndɛla ye kilehilevolɛ, yɛɛ ɛdoavolɛ biala di munli wɔ ye ndetelɛ nu a, ɔyɛ kɛ ye kilehilevolɛ ne ala la.”—LUKU 6:40.

AWOVOLƐ bie mɔ te nganeɛ kɛ bɛnfɛta kɛ bɛbahilehile bɛ mra Nyamenle anwo debie. Bɛsuzu kɛ bɛnze nwoma anzɛɛ bɛnze ɛzonlenlɛ nwo edwɛkɛ dɔɔnwo mɔɔ bamaa bɛahilehile kpalɛ a. Ɔlua ɛhye ati, bɛgyakyi gyima titile ɛhye bɛmaa bɛ mbusuafoɔ anzɛɛ ɛzonlenlɛ nu adekilevoma.

Noko, nwane a fɛta kɛ ɔkilehile ngakula ɛzonlenlɛ nwo nɔhalɛ nee ɛbɛlabɔlɛ nwo ngyinlazo a? Bɛmaa yɛzuzu mɔɔ Baebolo ne ka ye wɔ edwɛkɛ ɛhye anwo la anwo na yɛva yɛdo mɔɔ neɛnleanuma ɛha la anwo.

Selɛ Gyima A Le Duzu?

Mɔɔ Baebolo ne kilehile: “Selɛma, bɛmmaka bɛ mra ɛya; bɛtete bɛ na bɛhilehile bɛ, kɛmɔ Awulae kpondɛ la.”—Ɛfɛsɛsema 6:4.

Mɔɔ neɛnleanuma ɛnwu ye: Saa selɛma nyia diedi kpundii wɔ ɛzonlenlɛ nu a kɛzi nwolɛ bahola ara bɛ nvasoɛ ɛ? Edwɛkɛ Fathers’ Religious Involvement and Early Childhood Behavior mɔɔ bɛhɛlɛle ye 2009 ne anu la hanle kɛ: “Bɛ nwo mɔɔ bɛfa bɛwula ɛzonlenlɛ nu la kola boa mrenya maa bɛyɛ selɛma kpalɛ. Ɛzonlenlɛ maa menli nyia asetɛnla nwo ngyinlazo yɛɛ ngilehilelɛ nee adehilelɛ mɔɔ bɛgyinla zo bɛbɔ ɛbɛla la.”

Baebolo ne si kɛzi selɛ gyima wɔ ngakula ɛtetelɛ nu anwo hyia la azo fane dɔɔnwo. (Mrɛlɛbulɛ 4:1; Kɔlɔsaema 3:21; Hibuluma 12:9) Asoo nvasoɛ wɔ folɛ ɛhye azo ɛnɛ? Wɔ ɛvolɛ 2009 ne anu, Florida University ne hɛlɛle edwɛkɛ bie ɔvale ɔhilehilele tumi mɔɔ selɛma lɛ ye wɔ bɛ mra nwo zo la anu. Neɛnleanuma ne ranwunle kɛ ngakula mɔɔ bɛ nwo edwɛkɛ hyianle bɛ ze mɔ kpalɛ wɔ bɛ ɛtetelɛ nu la se anwunvɔne na bɛdi bɛ nwo eni. Nuhua mrenya ɛnyɛ basabasa, yɛɛ nuhua mraalɛ adwenle nu la ɛkɛ. Ɔda ali kɛ, nvasoɛ tɛbɔ Baebolo folɛdulɛ ne azo.

Kɛzi Ninli Gyima Nwo Hyia Ɛ?

Mɔɔ Baebolo ne kilehile: “Mmakpo ɛ nli folɛdulɛ.”—Mrɛlɛbulɛ 1:8.

Mɔɔ neɛnleanuma ɛnwu ye: Handbook of Child Psychology buluku ne hanle ye wɔ 2006 ne anu kɛ: “Saa bɛkyehyɛ nu a, ninlima fa mekɛ mɔɔ tɛla selɛma ɛdeɛ ne ɛya ngyɛnu 65 mɔɔ kɔ ɛya ngyɛnu 80 la a nee bɛ mra di ngitanwo a, na kɛ ɔde ye wɔ maanle dɔɔnwo anu la ɛne.” Ɔlua mekɛ dɔɔnwo ɛhye mɔɔ bɛdi ye wɔ bɛ mra nwo la ati, bɛ ɛdendɛlɛ, bɛ nyɛleɛ nee bɛ subane nyia kakula nwo zo tumi kpole.

Yeanyɛ boɛ fee la, saa ninli nee selɛ bɔ nu kilehile bɛ mra Nyamenle anwo debie a, bɛmaa bɛ ahyɛlɛdeɛ nwiɔ mɔɔ sonle bolɛ. Mɔɔ lumua, ngakula ne mɔ nyia adenle nee bɛ anwuma Selɛ ne fa agɔnwolɛ, agɔnwolɛvalɛ mɔɔ nwolɛ bahola ara bɛ nvasoɛ dahuu. Mɔɔ tɔ zo nwiɔ, ngakula ne mɔ kola sukoa kɛzi kunli nee yelɛ ka bɔ nu dwu bodane mɔɔ anwo hyia la anwo la. (Kɔlɔsaema 3:18-20) Awie mɔ bahola aboa selɛ ne nee ninli ne ɛdeɛ, noko awovolɛ yɛɛ ɔle bɛ gyima kɛ bɛbahilehile bɛ mra Nyamenle anwo ninyɛne nee mɔɔ Nyamenle kpondɛ kɛ mbusua yɛ la a.

Noko, kɛzi ɔwɔ kɛ awovolɛ kilehile bɛ mra ɛ? Ndenle kpalɛ boni a ɔwɔ kɛ bɛdua zo bɛyɛ ɛhye a?