Asoo Ɔwɔ Kɛ Ngakula Sukoa Nyamenle Anwo Debie?

“Ɛzonlenlɛ mɔɔ maa yɛkpɔ yɛ nwo la ala a yɛlɛ a, yɛnlɛ mɔɔ maa yɛkulo yɛ nwo la.”—JONATHAN SWIFT, NRELENZANLI KƐLƐVOLƐ.

SWIFT hanle zɔhane edwɛkɛ ne wɔ ɛvoya 18 ne anu, noko ɛnɛ, menli dɔɔnwo nee ye bayɛ adwenle. Nɔhalɛ nu, bie mɔ lɛ adwenle kɛ awovolɛ ɛnlɛ adenle ɛngilehile bɛ mra Nyamenle anwo debie. Bɛte nganeɛ kɛ ngakula mɔɔ bɛkɛtete bɛ wɔ nyamenlezonlenlɛ nu la ati ɛmbɔ boɛ.

Kɛzi ɛdwenle nwo ɛ? Edwɛkɛ mɔɔ doɔdoa zo la anu boni a ndelebɛbo wɔ nu a?

● Ɔnle kɛ bɛmaa awovolɛ adenle bɛkilehile bɛ mra Nyamenle anwo debie.

● Ɔwɔ kɛ awovolɛ kendɛ maa bɛ mra yɛ mgbanyinli kolaa na bɛ nee bɛ azuzu ɛzonlenlɛ nu edwɛkɛ nwo.

● Ɔwɔ kɛ awovolɛ fa diedi mɔɔ bɛlɛ ye wɔ Nyamenle anu la kilehile bɛ mra. Noko saa ngakula ne mɔ ɛlɛnyi a, ɔwɔ kɛ awovolɛ boa bɛ maa bɛsuzu edwɛkɛ ne anwo.

● Ɔwɔ kɛ ngakula die bɛ awovolɛ diedi mɔɔ bɛlɛ ye Nyamenle anu la di mɔɔ bɛmbiza nwolɛ kpuyia a.

Asoo Ɛzonlenlɛ Sɛkye Ngakula?

Ɛrɛladane kpalɛ biala ɛnrɛzɛkye kakula. Noko asoo nɔhalɛ wɔ edwɛkɛ mɔɔ bɛdabɛ mɔɔ bɛsi ngakula adenle wɔ Nyamenle anwo debiezukoalɛ nwo ka la anu? Badwu ɛnɛ, neɛnleanuma ɛva ɛvolɛ dɔɔnwo ɛzukoa tumi mɔɔ awovolɛ ɛzonlenlɛ nu diedi lɛ ye wɔ ngakula nwo zo la anwo debie. Duzu a ɛvi nu ɛra a?

Neɛnleanuma ɛnwu kɛ ɛzonlenlɛ ɛnzɛkye ngakula, emomu, ɔkola ɔboa bɛ wɔ mekɛ mɔɔ bɛlɛnyi la. Wɔ ɛvolɛ 2008 ne anu, edwɛkɛ mɔɔ vindele adwelie kɛlata Social Science Researcha ne anu la hanle kɛ: “Yela ali kɛ ɛzonlenlɛ ɛmaa awovolɛ nee bɛ mra avinli ngitanwolilɛ nu ɛmia.” Amaneɛbɔlɛ ɛhye eza hanle kɛ: “Ɔzɔho kɛ ɛzonlenlɛ nee sunsum nu gyinlabelɛ a le ninyɛne titile wɔ ngakula dɔɔnwo asetɛnla nu a, na nwolɛ hyia maa abusua nu ngitanwolilɛ.” Yɛ kɛzi ɛhye nee edwɛkɛ mɔɔ Gyisɛse Kelaese hanle la yia la nzonlɛ: “Anyelielɛ a le bɛdabɛ mɔɔ bɛze bɛ sunsum nu ngyianlɛ la.”—Mateyu 5:3, NW.

Na adwenle mɔɔ menli lɛ kɛ ɔwɔ kɛ ngakula yɛ mgbanyinli kolaa na bɛahilehile bɛ Nyamenle nee ɛzonlenlɛ nwo ninyɛne la noko ɛ? Adwenle zɛhae bɔ nɔhalɛ edwɛkɛ ɛhye gua: Kakula adwenle le kɛ bokiti mɔɔ debie ɛnle nu na ɔwɔ kɛ bɛfa debie bɛgua nu la. Awovolɛ bahola ava debie agua zɔhane “bokiti” ne anu wɔ sua nu, yemɔ a le kɛ, bɛbava ɛbɛlabɔlɛ nwo ngyinlazo nee diedi mɔɔ bɛte nganeɛ kɛ ɔfɛta la bɛahilehile bɛ mra anzɛɛ bɛbamaa alie nwo amra ahilehile bɛ.

Nɔhalɛ Boni A Wɔ Edwɛkɛ Ɛhye Anu A?

Tetedwɛkɛ kile kɛ ɛzonlenlɛ kola maa menli nyia bɛ gɔnwo mɔ anwo adwenle ɛtane anzɛɛ kpɔ bɛ. Yemɔti, kɛzi awovolɛ bahola ahoati mɔɔ Jonathan Swift hanle la ɛ? Kɛ ɔkɛyɛ na bɛahola bɛahilehile bɛ mra bamaa bɛahulo awie mɔ ɛ?

Yɛbanwu nɔhalɛ ne wɔ kpuyia nsa ɛhye mɔ anwo mualɛ mɔɔ yɛbakpondɛ la anu: (1) Duzu a ɔwɔ kɛ ngakula sukoa a? (2) Nwane a ɔwɔ kɛ kilehile bɛ a? (3) Ndenle kpalɛ boni a ɔwɔ kɛ bɛdua zo bɛkilehile bɛ a?

[Ɔ bo ɛkɛ ne edwɛkɛ]