December

Gyisɛse ɛdoavolɛma ne liele Nyamenle Edwɛkɛ ne dole nu na bɛbɔle mɔdenle bɛvale bɛlile gyima wɔ bɛ ɛbɛlabɔlɛ nu. (Dwɔn 17:6) Noko ɛnee bɛnde deɛmɔti ɔwɔ kɛ bɛku Gyisɛse kɛ ɛtanevolɛ la abo. Gyisɛse nwunle kɛ tɛ kɛ bɛnlɛ ahonle kpalɛ la ati a ɛnee bɛ adwenle nu yɛ bɛ kesee a, emomu, kɛmɔ ɛnee bɛtɛwiele ninyɛne bo te kpalɛ la ati ɔ. (Luku 9:​44, 45; Dwɔn 20:9) Ɔti ɔhilehilele bɛ ɔmaanle bɛzuzule Ngɛlɛlera ne anwo. Nea kɛzi ɔyɛle ɛhye wɔ mekɛ mɔɔ ɔyele ɔ nwo ɔhilele ɛdoavolɛma nwiɔ ne wɔ Ɛmeeyɛse adenle nu la. Gyisɛse anga sonla holɛ mɔɔ ɔle la angile mrenyia ne mɔ ɛkɛ ne ala. Emomu, ɔbizale bɛ kpuya. Duzu ati ɔ? Bie a ɛnee ɔkulo kɛ bɛka mɔɔ wɔ bɛ adwenle nu nee bɛ ahonle nu la, na bɛhanle noko. Bɛhanle bɛhilele ye kɛ ɛnee bɛ nye la kɛ Gyisɛse balie Yizilayɛ avi Wulomuma nzisi ne abo. (Luku 24:​18-27)Gyisɛse vale Ngɛlɛlera ne boale bɛ ɔmaanle bɛdele mɔɔ ɛzi la abo. Kenle ko zɔhane ala nɔsolɛ nu, Gyisɛse yiale ɛdoavolɛma mɔɔ ɛha la na ɔhilehilele mɔɔ ngapezo ne mɔ abo kile la anu ɔhilele bɛ.—Luku 24:​33-48. w24.10 14 ¶9-10

Gyisɛse zukoale mɔɔ ɔbayɛ nee mɔɔ ɔbaha la vile ye anwuma Selɛ ne ɛkɛ. Gyihova ahyehyɛdeɛ ne gyinla Nyamenle Edwɛkɛ ne azo kilehile yɛ ɛbɛlabɔlɛ kpalɛ nwo debie na ɔmaa yɛ adehilelɛ ɔfa ɔdi Gyisɛse neazo ne anzi. (2 Tim. 3:​16, 17) Ɔta ɔkakye yɛ kɛ yɛgenga Nyamenle Edwɛkɛ ne na yɛva yɛli gyima. Saa yɛdua yɛ mbuluku ne mɔ nee ninyɛne gyɛne zo yɛsukoa Baebolo ne a, yɛnyia zolɛ nvasoɛ kpole kpalɛ. Kɛ neazo la, yɛkola yɛfa mɔɔ Baebolo ne kilehile la yɛtoto adehilelɛ mɔɔ yɛnyia yɛfi ahyehyɛdeɛ ne ɛkɛ la anwo. Saa yɛnwu kɛ adehilelɛ mɔɔ yɛnyia la gyi Ngɛlɛlera ne azo a, ɔmaa anwodozo mɔɔ yɛlɛ wɔ Gyihova ahyehyɛdeɛ ne anu la yɛ kpole. (Wlo. 12:2) Gyisɛse bɔle “Nyamenle Belemgbunlililɛ ne anwo edwɛkpa ne nolo.” (Luku 4:​43, 44) Eza Gyisɛse hanle hilele ye ɛdoavolɛma ne kɛ bɛbɔ Belemgbunlililɛ ne nolo. (Luku 9:​1, 2; 10:​8, 9) Ɛnɛ, bɛdabɛ mɔɔ bɛwɔ Gyihova ahyehyɛdeɛ ne anu la amuala bɔ Belemgbunlililɛ ne anwo edwɛkpa ne nolo ɔnva nwo ɛleka mɔɔ bɛde la. w24.04 9 ¶5-7

Kɔ zo nyia adehilelɛ mɔɔ vi Gyihova ahyehyɛdeɛ ne ɛkɛ la anu anwodozo. Wɔ tete Yizilayɛ, Gyihova luale Mosisi nee Dwɔhyua anwo zo ɔvale adehilelɛ ɔmaanle Ye menli ne. (Dwɔh. 1:17) Mɔɔ Yizilayɛma bule mrenyia ɛhye mɔ kɛ bɛgyi Gyihova Nyamenle agyakɛ anu la, bɛnyianle nyilalɛ. Yemɔ anzi ɛvolɛ ɛya dɔɔnwo, wɔ mekɛ mɔɔ bɛlimoale bɛhyehyɛle Kilisiene asafo ne la, ɛzoanvolɛma 12 ne vale adehilelɛ maanle bɛ. (Gyi. 8:​14, 15) Nzinlii mgbanyima gyɛne mɔɔ bɛwɔ Gyɛlusalɛm la rabokale ɛzoanvolɛma ekpunli zɔhane anwo. Mɔɔ bɛlile adehilelɛ mɔɔ mrenyia nɔhavoma ɛhye mɔ vale maanle bɛ la azo la, “asafo ne mɔ anwo hɔle zo yɛle se wɔ diedi ne anu na bɛ dodo ne hɔle ɔ nyunlu alehyenlɛ biala.” (Gyi. 16:​4, 5) Ɛnɛ noko, saa yɛdi adehilelɛ mɔɔ Gyihova ahyehyɛdeɛ ne fa maa yɛ la azo a, yɛnyia nyilalɛ. w24.07 10 ¶10

Ɛnee Gyihova kulo Belemgbunli Devidi edwɛkɛ kpole kpalɛ. Ɔhanle ye wɔ Devidi anwo bɔbɔ kɛ ɔle “nrenyia mɔɔ la me ahonle nwo” a. Noko Devidi yɛle ɛtane mgbole, bie a le agyalɛzɛkyelɛ yɛɛ sonla ɛhunlɛ. Kɛ mɔɔ ɛnee Mosisi Mɛla ne kile la, ɛnee ɔwɔ kɛ bɛku Devidi. (Lɛv. 20:10; Nɔm. 35:31) Noko Gyihova vile atiakunlukɛnlɛma nu vale ɔ nwo liele edwɛkɛ ne anu. Ɔzoanle ye ngapezonli Neetan wɔ belemgbunli ne anwo ɛkɛ ɔnva nwo kɛ ɛnee Devidi ɛtɛyɛle debie biala mɔɔ kile kɛ yenlu ɔ nwo la. Neetan luale ndonwo zo boale Devidi maanle ɔdele ɔ bo kɛ yeyɛ ɛtane kpole. Kɛmɔ ɔnwunle kɛzi yeyɛ ɛtane kpole yetia Gyihova la ati, ɔnlunle ɔ nwo. (2 Sa. 12:​1-14) Ɔvile ye ahonle nu ɔhɛlɛle edwɛne bie mɔɔ kile kɛ ɔnlunle ɔ nwo amgba la. (Edw. 51, ɔtidwɛkɛ) Edwɛne zɔhane ɛkyekye ɛtanevolɛma dɔɔnwo arɛle na yeha bɛ yemaa bɛnlu bɛ nwo. Asoo ɔnyɛ yɛ fɛ kɛ Gyihova lale ɛlɔlɛ ali na ɔboale ye sonvolɛ Devidi ɔmaanle ɔnlunle ɔ nwo ɔ? w24.08 10 ¶9

Menli dɔɔnwo die to nu kɛ ngakula ɛtetelɛ le gyima ɛsesebɛ kpalɛ. Saa ɛle awovolɛ mɔɔ ɛlɛ ɛ ra ekyi a, yɛkanvo wɔ kɛ ɛlɛyɛ gyima ɛsesebɛ wɔaboa ye wɔamaa yeanyia diedi kpole la. (Dit. 6:​6, 7) Saa kakula ne ɛlɛnyi a, bie a ɔbabiza wɔ kpuya dɔɔnwo mɔɔ fale yɛ diedi ne anwo la, bie a le ɛbɛlabɔlɛ nwo ngyinlazo mɔɔ wɔ Baebolo ne anu la. Bie a mɔlebɛbo ne, kakula ne kpuya ne mɔ bagyegye wɔ. Bie a ɛbabu ye kɛ kɛmɔ ɔnlie Nyamenle nee Baebolo ne ɔnli kpalɛ la ati a ɔlɛbiza kpuya zɔhane mɔ a. Noko nɔhalɛ ne a le kɛ, saa ngakula ɛlɛnyi a, ɔwɔ kɛ bɛbiza kpuya ngakyile amaa bɛamia bɛdabɛ mumua ne bɛ diedi ne anu. (1 Kɔl. 13:11) Ɔti ɔnle kɛ ɛmaa wɔ ahonle tu. Saa ɛ ra ne biza wɔ yɛ diedi ne anwo kpuya biala a, bu ye kɛ ɔle nwolɛ adenle mɔɔ ɛbalua zo wɔaboa ye wɔamaa yeazuzu ninyɛne nwo yeahɔ moa a. w24.12 14 ¶1-2

Ɛnee ɔhyia kɛ Hibulu Kilisienema ne nyia diedi kpole amaa bɛahola bɛagyinla anwongyelelɛ mɔɔ ɔnrɛhyɛ na yeara Dwudiya la anloa. (Hib. 10:​37, 38) Gyisɛse bɔle ye ɛdoavolɛma ne kɔkɔ kɛ, saa bɛnwu kɛ sogyama ɛbɔ Gyɛlusalɛm ɛyia a, ɔwɔ kɛ bɛnriandi bɛfi ɛkɛ bɛkɔ awoka ne mɔ azo. Ɛnee ye folɛdulɛ ne fale Kilisienema ne amuala anwo, saa bɛde suakpole ne azo o, saa bɛde ye namule nu o. (Luku 21:​20-24) Wɔ mekɛ zɔhane, saa sogyama kɔteta sua bie a, ɛnee menli ta nriandi kɔ suakpole le kɛ Gyɛlusalɛm mɔɔ bɛlie nwolɛ bane la azo amaa bɛanyia anwobanebɔlɛ. Wɔannea a awie babu awoka ne mɔ azo mɔɔ bɛnriandi bɛahɔ la kɛ nrɛlɛbɛ biala ɛnle nu ɔti ɛnee bɛhyia diedi kpole. Ɛnee eza ɔhyia kɛ Hibulu Kilisienema ne nyia anwodozo wɔ menli mɔɔ ɛnee Gyisɛse ɛlɛdua bɛ nwo zo ahile asafo ne adenle la anu. Ɔbayɛ kɛ mediema mɔɔ li asafo ne anyunlu la vale kɛzi bɛbali Gyisɛse mɛla ne azo la anwo adehilelɛ fɔɔnwo maanle asafo ne mɔ kɔsɔɔti wɔ mekɛ kpalɛ nu nee adenle kpalɛ zo.—Hib. 13:17. w24.09 10 ¶9-10

Mɔɔ Gyisɛse wɔ azɛlɛ ye azo la, ɔyɛle gyima mɔɔ ɔ Ze vale maanle ye kɛ ɔyɛ la pɛpɛɛpɛ. (Dwɔn 17:4) Noko Gyisɛse annyia adwenle kɛ ɔ ngomekye a ɔbahola yeayɛ debie mɔɔ Gyihova kulo la a. Ɔtetele awie mɔ amaa bɛdabɛ noko bɛayɛ gyima ne bie. Gyisɛse vale Gyihova mboane ne mɔɔ bɛsonle bolɛ la ɛnleanlɛ yɛɛ edwɛkɛhanlɛ nee ngilehilelɛ gyima ne mɔɔ bɛdi ɔ nyunlu la wulale ye ɛdoavolɛma ne asa. Gyisɛse dule ye ɛdoavolɛma ne folɛ mɔɔ ɛnee bɛhyia nwo la, noko ɔyɛle ye wɔ ɛlɔlɛ nu. Bɛ nuhua bie mɔ adwenle nu ta yɛ bɛ kesee, ɔti ɔdule bɛ folɛ wɔ nwolɛ. (Luku 24:​25-27; Dwɔn 20:27) Ɔmaanle bɛnwunle kɛ mboanenleanlɛ gyima ne hyia kpalɛ tɛla bɛ nwonane afoa nu gyima ɛdeɛ ne. (Dwɔn 21:15) Ɔhakyele bɛ kɛ bɛmmamaa nwolɛ adenle mɔɔ awie mɔ bahola anyia la gyegye bɛ somaa. (Dwɔn 21:​20-22) Yɛɛ ɔdenrɛle bɛ wɔ Belemgbunlililɛ ne anwo adwenle bie mɔ mɔɔ ɛnfɛta mɔɔ ɛnee bɛlɛ la anwo na ɔboale bɛ ɔmaanle bɛvale bɛ adwenle bɛziele edwɛkpa ne mɔɔ bɛbɔ ye nolo la azo.—Gyi. 1:​6-8. w24.10 15-16 ¶13-14

Tieyɛ maa yɛnyia ngoane. Le kɛ Yizilayɛma mɔɔ ɛnee wɔ Ɛwɔkɛ Azɛlɛ ne ɛweɛne zo la, ɔka ekyii yɛdayɛ noko yɛkɔ ewiade fofolɛ ne mɔɔ Nyamenle ɛva ɛbɔ yɛ ɛwɔkɛ la anu, na ɔnrɛhyɛ yɛbanwu kɛ azɛlɛ ne amuala ɛyɛ paladaese. (Aye. 35:1; Luku 23:43) Abɔnsam nee sunsum ɛtane ne mɔ bavi ɛkɛ. (Yek. 20:​2, 3) Adalɛ ɛzonlenlɛ ɛnrɛhwe menli ɛnrɛvi Gyihova anwo bieko. (Yek. 17:16) Alesama arane ɛnrɛsisi menli mɔɔ bɛnea bɛ nwo la bieko. (Yek. 19:​19, 20) Atuadelɛma ɛnrɛdɛnla paladaese ɛkɛ ne bie. (Edw. 37:​10, 11) Awie biala bali Gyihova tenlene ngyinlazo ne mɔ azo, na yemɔ bamaa koyɛlɛ nee anzodwolɛ ara. Ɔti awie biala bahulo ɔ gɔnwo na yealie ye yeali. (Aye. 11:9) Anyelazo kɛnlɛma boni ɛne! Mɔɔ tɛla biala la, saa yɛtie Gyihova a, yɛbahɔ zo yɛadɛnla paladaese azɛlɛ zo, tɛ ɛvolɛ ɛya dɔɔnwo o, emomu dahuu.—Dwɔn 3:16. w24.11 9 ¶7

Ngapezo ne mɔɔ wɔ ɛnɛ tɛkese ne anu la wɔ yɛ mekɛ ye azo adɛla mekɛ biala. Bɛyɛ Belemgbunlililɛ ne anwo edwɛkpa ne anwo ninyɛne nee mbuluku wɔ aneɛ mɔɔ bo 1,000 la anu, yɛɛ ewiade ye anu menli dɔɔnwo ɛlɛdua jw.org wɛbsaete ne azo azukoa nwolɛ debie. Noko eza Gyisɛse hanle hilele ye ɛdoavolɛma ne kɛ, “bɛnrɛwie . . . azua kɔsɔɔti azo kɔ,” anzɛɛ bɛnrɛhola bɛnrɛha edwɛkɛ ne bɛnrɛhile awie biala kolaa na yeara. (Mat. 10:23; 25:​31-33) Gyisɛse edwɛkɛ ne bara nu wɔ yɛ mekɛ ye azo noko. Ɛnɛ, menli mgbe dɔɔnwo de ɛleka mɔɔ bɛmmaa yɛ adenle fee bɛmmaa yɛnyɛ yɛ edwɛkɛhanlɛ gyima ne wɔ ɛkɛ la. Eza mitini ko biala, bɛwo ngakula ɛya dɔɔnwo. Yɛyɛ biala mɔɔ yɛbahola la kɛ yɛbaha edwɛkpa ne yɛahile “maanle nee mbusua nee aneɛ nee menli kɔsɔɔti.” (Yek. 14:6) Noko nɔhalɛ ne a le kɛ, yɛnrɛhola yɛnrɛha edwɛkpa ne yɛnrɛhile sonla ko biala mɔɔ de azɛlɛ ye azo la kolaa na awieleɛ ne ara. w24.05 10 ¶6-7

Gyisɛse vale ye edwɛkɛ kyekyele awie mɔ arɛle na ɔmaanle bɛ anwosesebɛ. Yeandendɛ ɛya zo yeangile ye ɛdoavolɛma ne. (Luku 8:​47, 48) Ɛhye le neazo kɛnlɛma kpalɛ maa kunlima! Gyisɛse dule kunlima folɛ kɛ bɛhɔ zo bɛli nɔhalɛ bɛmaa bɛ ye mɔ. Ɔhwenle adwenle ɔhɔle ɔ Ze edwɛkɛ mɔɔ ɔhanle kɛ ɔwɔ kɛ kunli ‘beta ɔ ye anwo’ la azo. (Mat. 19:​4-6) Giliki yɛkpɔkɛ ne mɔɔ bɛhile ɔ bo wɔ edwɛkɛ zɔhane anu kɛ “beta” la abo kile kɛ “ɛfa glue wɔazɔ debie.” Ɔti ɔwɔ kɛ ɛhulolɛ mɔɔ wɔ kunli nee yelɛ avinli la yɛ kyengye kɛ asɛɛ bɛva glue bɛzɔ bɛ mu nwiɔ bɛbɔ nu la. Saa bɛ nuhua ko yɛ debie mɔɔ gyegye ɔ gɔnwo la a, bɛ mu nwiɔ a bɛbanwu nwolɛ amaneɛ ne a. Kunli biala mɔɔ banyia ɛhulolɛ kpole zɛhae amaa ɔ ye la bakpo nlanwonvoninli biala. Ɔbaye ɔ nye yeavi “ninyɛne mgbane mgbane ɛnleanlɛ nwo” ndɛndɛ. (Edw. 119:37) Ɔti ɔ nee ɔ nye yɛ ngyekyeleɛ kɛ ɔnrɛva ɔ nye ɔnrɛnlea raalɛ biala wɔ ɛhulolɛ adenle zo kyesɛ ɔ ye angome.—Dwobu 31:1. w25.01 10 ¶12-13

Ɔnla aze kɛ ɛbade kɛzi alesama fa ɛtane kyɛ la abo kpalɛ. Kɛzi Gyihova fa alesama mɔɔ yɛnli munli la ɛtane kyɛ yɛ la le ngakyile fi kɛzi yɛfa ɛtane yɛkyɛ yɛ nwo ngoko la anwo. Awie biala ɛnrɛhola ɛnrɛva ɛtane ɛnrɛhyɛ kɛ Gyihova la ɛlɛ. Edwɛndolɛnli ne hanle ye wɔ Gyihova anwo kɛ: “Wɔ ɛkɛ ne a nɔhalɛ ɛtanefakyɛ wɔ a, amaa menli azulo wɔ.” (Edw. 130:4) Amgba, Gyihova ɛtanefakyɛ ne le “nɔhalɛ ɛtanefakyɛ.” Ɔdaye a ɔle awie mɔɔ ɔwɔ kɛ ɔkile yɛ mɔɔ ɛtanefakyɛ abo kile bɔkɔɔ la a. Ɔdwu mekɛ ne bie a Baebolo kɛlɛvoma fa Hibulu edwɛkɛkpɔkɛ bie di gyima kile kɛzi Gyihova fa ɛtane kyɛ la anu, noko bɛnva bɛnli gyima bɛngile kɛzi alesama fa ɛtane kyɛ la anu ɛlɛ. Saa Gyihova fa awie ɛtane kyɛ ye a, ɔkyikyi ahenle zɔhane ɛtane ne bɔkɔɔ. Ɔ nee ahenle agɔnwolɛvalɛ ne mɔɔ zɛkyele la eza yɛ kpalɛ bieko kɛ ye dɛba ne la. Gyihova fa ɛtane kyɛ bɔkɔɔ yɛɛ ɔyɛ ye zɔ fane dɔɔnwo. w25.02 8 ¶1-3

Saa bɛandie yɛ edwɛkɛ ne a, yemɔ ɛngile kɛ yɛandwu yɛ bodane nwo. Duzu ati ɔ? Ɔluakɛ yɛyɛ mɔɔ Gyihova nee ɔ Ra ne kulo kɛ yɛyɛ la—yɛli menli daselɛ. (Gyi. 10:42) Saa yɛannyia awie yɛ nee ye andendɛ anzɛɛ bɛandie yɛ edwɛkɛ ne bɔbɔ a, yɛbahola yɛamaa yɛ nye alie ɔluakɛ yɛze kɛ yɛlɛyɛ mɔɔ sɔ yɛ anwuma Selɛ ne anye la. (Mrɛ. 27:11) Eza saa nolobɔlɛnli gyɛne nyia awie mɔɔ ɔ nye die nɔhalɛ ne anwo la wɔ azɛlɛsinli ne anu a, yɛ nye bahola alie. Ɛzinzalɛ Arane ne ɛva yɛ gyima ne ɛtoto kakula bie mɔɔ ɛminli mɔɔ yɛlɛkpondɛ ye la anwo. Menli dɔɔnwo a ɛlɛkpondɛ ye a, bie mɔ ɛva fema zo yɛɛ bie noko ɛva bɛne zo. Saa bɛnwu kakula ne a, tɛ ahenle mɔɔ nwunle ye la angome a anye die a, emomu awie biala anye die. Zɔhane ala a awie biala mɔɔ wɔ asafo ne anu la boa maa yɛyɛ menli Gyisɛse ɛdoavolɛma a. Yɛ muala a yɛlɛyɛ gyima wɔ azɛlɛsinli ne anu a, ɔti saa awie bɔ ɔ bo kɛ ɔba debiezukoalɛ a, yɛ muala yɛ nye die. w24.04 18 ¶13-14

Yɛ nye la ninyɛne mɔɔ yɛ anyelielɛ mɔɔ ɔbasisi kenle bie la ade. Kɛmɔ Gyihova ɛlɛyila yɛ la ati, yɛ nye la kɛ yɛbanwu kɛ menli dɔɔnwo kpalɛ ɛra nɔhalɛ ne anu kolaa na anwongyelelɛ kpole ne abɔ ɔ bo. Eza ɔyɛ yɛ anyelielɛ kɛ, wɔ anwongyelelɛ kpole ne anu, bie a yɛbanwu kɛ menli dɔɔnwo ɛlɛfi ɛtane ewiade ne mɔɔ ɛlɛsɛkye la anu na bɛaraboka yɛ nwo bɛamaa yɛaye Gyihova ayɛlɛ! Noko yɛlɛ gyima yɛyɛ. Yɛnyia nwolɛ adenle kɛ yɛbayɛ nolobɔlɛ gyima bie mɔɔ bɛnrɛyɛ ye bieko ɛlɛ la bie—Nyamenle Belemgbunlililɛ ne anwo edwɛkpa ne mɔɔ yɛbɔ ye nolo wɔ ewiade amuala la. Mekɛ ko ne ala, ɔwɔ kɛ yɛkɔ zo yɛbɔ menli kɔkɔ wɔ mɔɔ ɔbazi la anwo. Ɔhyia kɛ menli nwu kɛ ɛtane ewiade ɛhye awieleɛ ne ɛlɛbikye ndɛndɛ. Ɛlɔlɛ mɔɔ yɛlɛ yɛmaa nɔhalɛ ne, ɛlɔlɛ mɔɔ yɛlɛ yɛmaa menli yɛɛ mɔɔ tɛla biala la, ɛlɔlɛ mɔɔ yɛlɛ yɛmaa Gyihova Nyamenle nee ye duma ne la ati, yɛbahɔ zo yɛava anwowosolɛ nee mɔdenlebɔlɛ yɛaha edwɛkɛ ne anyebolo zo kɔkpula kɛ Gyihova baha kɛ, “Yeyɛ boɛ!” w24.05 19 ¶14-16

Nɔe ne mɔɔ aleɛ kye a bɛbahu Gyisɛse la, ɔhilehilele Pita nee ɛzoanvolɛma mɔɔ ɛha la mɛlɛbɛnwoaze nwo debie mɔɔ hyia la. Ɔyɛle debie mɔɔ sonvolɛ a ta yɛ la, na ɛhye zinle ye ɛzoanvolɛma ne anwo kpole. Gyisɛse yele ye tɛladeɛ aguzo ne, ɔvale tohulu ɔpɛle ɔ bo, ɔvale nzule ɔguale kyɛnze ne anu na ɔbɔle ɔ bo kɛ ɔwowo bɛ gyakɛ anwo. (Dwɔn 13:​4, 5) Bie a ɔliele mekɛ ekyii na yeahola yeawowo ɛzoanvolɛma 12 ne, mɔɔ Dwudase mɔɔ ɔbaye ye yeamaa la boka nwo la agyakɛ anwo yeawie. Noko Gyisɛse bɛlɛle ɔ nwo aze ɔyɛle gyima ne ɔwiele. Akee Gyisɛse zile abotane hilehilele nu hilele bɛ kɛ: “Bɛte mɔɔ meyɛ memaa bɛ la abo ɔ? Bɛfɛlɛ me ‘Kilehilevolɛ’ nee ‘Awulae,’ na ɔle ye adenle zo, ɔluakɛ mele zɔhane. Yemɔti saa medame mɔɔ mele Awulae nee Kilehilevolɛ la mewowo bɛ gyakɛ anwo a, ɛnee ɔwɔ kɛ bɛdabɛ noko bɛwowo bɛ gɔnwo mɔ agyakɛ anwo.”—Dwɔn 13:​12-14. w25.03 10 ¶9-11

Ewiade ne maa ɔyɛ se kɛ yɛbahɔ zo yɛabeta Gyihova. Menli dɔɔnwo ɛnlie ɛndo nu kɛ Nyamenle wɔ ɛkɛ. Yɛta yɛnwu ye kɛ ɔzɔho kɛ menli mɔɔ bɛnyɛ mɔɔ Gyihova kulo bɔbɔ la di boɛ. Saa yɛnwu ninyɛne zɛhae mɔ a, ɔbahola yeazɔ yɛ diedi yeanlea. Bie a yɛdie yɛto nu kɛ Nyamenle wɔ ɛkɛ ɛdeɛ, noko yɛngola yɛnnwu ye saa ɔbaboa yɛ o. Edwɛne 73 kɛlɛvolɛ ne noko dele nganeɛ zɛhae bie wɔ mekɛ bie anu. Ɔnwunle kɛ menli mɔɔ ɛbɔ ye ɛyia la ɛnli Nyamenle mɛla ne mɔ azo noko ninyɛne kɔ boɛ maa bɛ. Ɛhye ati ɛnee ɔngola ɔnnwu ye kɛ saa ɔle kpalɛ kɛ ɔbazonle Nyamenle a. (Edw. 73:​11-13) Duzu a akee boale edwɛndolɛnli ne ɔmaanle ɔhakyile ye adwenle a? Ɔdwenledwenlenle mɔɔ bado menli mɔɔ bɛmaa bɛ rɛle fi Gyihova la anwo. (Edw. 73:​18, 19, 27) Eza ɔzuzule nvasoɛ mɔɔ awie sonle Gyihova a ɔnyia la anwo. Yɛdayɛ noko yɛbahola yɛadwenledwenle kɛzi Gyihova ɛyila yɛ la anwo. w24.06 25 ¶16-17

Wɔ tete ne, menli bie mɔ nee bɛ mediema ehyiavolɛma anli ye boɛ na bɛmaanle bɛduale mpaefoa kpole wɔ ezukoa mɔɔ bɛvale bɛbɔle bɛ bosea la anwo. Eza ndɛnebuavolɛma bie mɔ liele belaebo na bɛbuale bɛdabɛ mɔɔ edwɛkɛ ɛnle bɛ nwo la mgbɔvodɛne. Gyihova kyi nyɛleɛ ɛhye mɔ. (Yiz. 22:12) Ɔle kpalɛ kɛ yɛbazuzu adwenle mɔɔ yɛlɛ wɔ ezukoa nwo la anwo. Biza ɛ nwo kɛ: ‘Asoo dahuu medwenle ezukoa nee ninyɛne mɔɔ melɛ ezukoa a mebadɔ la anwo ɔ? Saa mebiza bosea a asoo ɔkyɛ na meadua ɔluakɛ melɛ adwenle kɛ ahenle mɔɔ vale ezukoa ne maanle me la ɛngyia nwo ɔ? Asoo melɛ ezukoa a ɔmaa mete nganeɛ kɛ me nwo hyia noko ɔmaa ɔyɛ se kɛ mebayɛ nyele ɔ? Saa me mediema mrenyia nee mraalɛ bie mɔ lɛ ezukoa dɔɔnwo a, asoo mebua bɛ ndɛne kɛ bɛkulo anwonyia ɔ? Asoo mefa bɛdabɛ mɔɔ bɛle sukoavolɛma la ala agɔnwolɛ na megyakyi ehyiavolɛma ɔ?’ Saa yɛanyɛ ezukoa nwo anyebolo a, yɛbahola yɛabɔ yɛ nee Gyihova agɔnwolɛvalɛ ne anwo bane. Saa yɛyɛ ye zɔ, Gyihova ɛnrɛgyakyi yɛ ɛlɛ! w24.06 12-13 ¶17-18

Amaa yɛabɔ yɛ nwo bane yɛavi sɔnea nwo la, ɔwɔ kɛ yɛnyia ɛhulolɛ kɛ yɛbayɛ mɔɔ le kpalɛ la. Saa ‘yɛkyi mɔɔ le ɛtane la na yɛkulo mɔɔ le kpalɛ la’ a, ɔbamaa yɛamia kpɔkɛ mɔɔ yɛbɔ kɛ yɛyɛ mɔɔ le kpalɛ la anu. (Emɔso 5:15) Saa yɛnyia ɛhulolɛ kɛ yɛyɛ mɔɔ le kpalɛ la a, ɔbaboa yɛ yeamaa yɛahɔ zo yɛagyinla kpundii wɔ mekɛ mɔɔ yɛbayia tɛnlabelɛ mɔɔ bazɔ yɛ anlea la. Saa yɛfa yɛ nwo yɛwula sunsum nu ninyɛne nu kpalɛ a, yɛbahola yɛayɛ ye zɔ. Saa yɛwɔ debiezukoalɛ bo anzɛɛ daselɛlilɛ nu a, bɛmaa yɛnyia ɛhulolɛ kɛ yɛbayɛ mɔɔ sɔ Gyihova anye la. (Mat. 28:​19, 20; Hib. 10:​24, 25) Saa yɛkenga Nyamenle Edwɛkɛ ne, yɛsukoa na yɛdwenledwenle nwolɛ a, ɔmaa yɛnyia ninyɛne mɔɔ le kpalɛ la anwo ɛhulolɛ kpole na yɛkyi mɔɔ le ɛtane la bɔkɔɔ. (Dwɔh. 1:8; Edw. 1:​2, 3; 119:97) Kakye kɛ Gyisɛse hanle hilele ye ɛdoavolɛma ne kɛ: “Bɛyɛ asɔne dahuu, amaa bɛangɔ sɔnea nu.” (Mat. 26:41) Ɔti yɛmaa adenle yɛmaa Gyihova boa yɛ na ɔmaa yɛmia kpɔkɛ mɔɔ yɛbɔ kɛ yɛbayɛ mɔɔ sɔ ɔ nye la anu.—Gye. 4:8. w24.07 17-18 ¶14-16

Ɔwɔ kɛ bɛdabɛ mɔɔ bɛtete awie mɔ la sukoa kɛzi Gyihova fa ye nrɛlɛbɛ ne boa awie mɔ la. Kakye kɛ Gyihova ɛnva ye nrɛlɛbɛ ne ɛnvea menli. Zɔhane ala a yɛfi yɛ ɛhulolɛ nu yɛfa mɔɔ yɛze nee anwubielɛ mɔɔ yɛlɛ la yɛboa menli mɔɔ bɔ zo mɔɔ bɛlɛsukoa la a. Ɔnle kɛ yɛnyia adwenle kɛ saa yɛkile ahenle mɔɔ yɛlɛtete ye la debie biala mɔɔ yɛze la a, ɔbaralie yɛ gyimalilɛ ne yeayɛ. Anzɛɛ ɔnle kɛ yɛnyia adwenle ɛhye bie: ‘Tɛ awie biala a hilele me a! Maa ɔdaye mumua ne ɔzukoa.’ Ɔnle kɛ yɛnwu subane zɛhae wɔ Gyihova menli nwo. Emomu, yɛ nye die kɛ yɛbahile bɛdabɛ mɔɔ yɛlɛtete bɛ la ninyɛne mɔɔ yɛze la na eza yɛava “yɛ nwo noko yɛamaa bɛ.” (1 Tɛs. 2:8) Yɛ nye la kɛ ‘bɛdabɛ noko bɛbafɛta bɔkɔɔ kɛ bɛkɛhilehile awie mɔ.’ (2 Tim. 2:​1, 2) Saa ɔba ye zɛhae a, yɛ nee bɛdabɛ mɔɔ yɛtete bɛ la amuala bahɔ zo ayɛ nyele na yɛ nye alie dahuu. w24.09 29 ¶12-13

Saa ɛte nganeɛ kɛ ɛnrɛhola ɛnrɛyɛ debie titili bie ɛnrɛboa asafo ne a, mmamaa ɛ sa nu to. Ye biala anu, ɛlɛ subane bie mɔ mɔɔ ɛbahola wɔava wɔaboa asafo ne a. Saa ɛfa asɔneyɛlɛ ɛsuzu Pɔɔlo edwɛkɛ ne mɔɔ wɔ 1 Kɔlentema 12:​12-30 la anwo a, bie a ɔbaboa wɔ. Pɔɔlo edwɛkɛ ne maa ɔda ali wienyi kɛ, ɛdawɔ nee Gyihova azonvolɛ gyɛne biala lɛ gyima mɔɔ nwolɛ hyia na ɔsonle bolɛ mɔɔ ɔwɔ kɛ bɛyɛ wɔ asafo ne anu a. Yɛ biala mɔɔ ɛbahola la sonle Gyihova na boa ɛ mediema. Nyia anwodozo kɛ saa asafo nu mgbanyima ne mɔ ɛlɛmaa wɔ gyimalilɛ biala a, bɛbalimoa bɛazuzu ninyɛne mɔɔ ɛbɔ mɔdenle wɔ nu la anwo. (Wlo. 12:​4-8) Ɔwɔ kɛ Kilisienema kɔsɔɔti bikye Gyihova, bɛnyia anyelielɛ mɔɔ wɔ ɛmaanlɛ nu la bie na bɛyɛ neazo kpalɛ wɔ bɛ ɛbɛlabɔlɛ nu. w24.11 17 ¶12-13

Hana yiale ngyegyelɛ ngakyile mɔɔ maanle ɔlile alɔbɔlɛ na ɔzunle a. Ye ngyegyelɛ ne mɔ ko a le kɛ ɛnee ɔ hu gya mraalɛ nwiɔ, bɛfɛlɛ ɔ hola ne Pɛnena na ɛnee ɔngulo Hana edwɛkɛ fee. Mɔɔ yɛ alɔbɔlɛ kpalɛ bɔbɔ la a le kɛ ɛnee Hana ɛtɛwole noko ɛnee ɔ hola Pɛnena ɛwo mralɛ dɔɔnwo. (1 Sa. 1:​1, 2) Ɛnee Pɛnena fa ɔ mra ne mɔ pɛ Hana anye zo. Ɛnee nyanelilɛ ngome maa Hana su “too mɔɔ ɔnli debie a,” na ɛnee ɔdi “nyane kpalɛ.” (1 Sa. 1:​6, 7, 10) Duzu a Hana yɛle amaa ɔ rɛle akyekye a? Debie ko mɔɔ boale ye la a le kɛ ɔhɔle ɛdanlɛsua ne anu, ɛleka mɔɔ bɛyia bɛsonle Gyihova nɔhalɛ nu la. Mɔɔ ɔdwule ɛkɛ ne la, ɔzɛlɛle Gyihova kɛ: ‘Nea nyane mɔɔ wɔ sonvolɛ ɛlɛdi la na kakye me.’ (1 Sa. 1:11) Gyihova nwunle ye amaneɛnwunlɛ ne, ɔdele ye ɛzunlɛ ne na nzinlii ɔmaanle ɔwole.—1 Sa. 1:​19, 20; 2:21. w24.12 21 ¶5-7

Eza ɛkpɔnedeɛ ne maa yɛnwu ye kɛ Gyisɛse lɛ ɛlɔlɛ kpole kpalɛ maa alesama, titili ye ɛdoavolɛma. (Dwɔn 13:1) Kɛ neazo la, ɛnee Gyisɛse ze kɛ ye azɛlɛ ye azo ɛzonlenlɛ gyima ne foa bie wɔ ɛkɛ mɔɔ ɔbayɛ se kpalɛ a, titili ewule mɔɔ ɔbawu nyane nyane nu la. Noko, Gyisɛse angyinla ngyegyelɛ ɛhye mɔ anloa ala kɛ asɛɛ ɔle ye gyima mɔɔ ɔwɔ kɛ ɔyɛ la ati ɔ, emomu, ɛlɔlɛ kpole mɔɔ ɛnee ɔlɛ ɔmaa yɛ la ati ɔ. Ɛhye ati, Gyisɛse vale ye ahonle muala wulale edwɛkɛhanlɛ nee ngilehilelɛ gyima ne anu yɛɛ ɔboale awie mɔ. Wɔ nɔe ne bɔbɔ mɔɔ aleɛ kye a Gyisɛse bawu la, ɔwowole ye ɛzoanvolɛ ne mɔ agyakɛ anwo yɛɛ ɔhanle edwɛkɛ dɔɔnwo mɔɔ maanle bɛ anwosesebɛ na ɔkyekyele bɛ rɛle la ɔhilele bɛ. (Dwɔn 13:​12-15) Mɔɔ ɛnee Gyisɛse henda baka ne azo la, ɔvale mekɛ ekyii ɔmaanle ɛtanevolɛ bie mɔɔ ɛnee ɔlɛwu la nyianle anyelazo na eza ɔyɛle ngyehyɛleɛ ɔmaanle awie nleanle ye mame. (Luku 23:​42, 43; Dwɔn 19:​26, 27) Ɛhye ati, tɛ ewule mɔɔ Gyisɛse wule la angomekye a kile kɛ ɔkulo menli a, emomu kɛzi ɔ nee bɛ lile la noko kile kɛ ɔkulo bɛ kpalɛ. w25.01 23 ¶11

Baebolo ne fa ndonwo bie di gyima maa yɛte fanwodi mɔɔ nɔhalɛ ɛtanefakyɛ maa yɛnyia la abo. Kɛmɔ yɛnli munli na yɛtɔ sinli la ati, ɔka kɛ ‘yɛle ngɛkɛlɛ yɛmaa ɛtane.’ Noko ɔlua Gyihova ɛtanefakyɛ ne ati, yɛle kɛ ngɛkɛlɛ mɔɔ ‘bɛlie yɛ bɛvi yɛ ɛtane nu.’ (Wlo. 6:​17, 18; Yek. 1:5) Ɛhɛe, Gyihova ɛtanefakyɛ ne maa yɛ nye die kɛ ngɛkɛlɛ mɔɔ bɛnyia fanwodi la. Kɛmɔ Gyihova ɛva ɔ Ra ne ɛbɔ ɛkpɔnelɛ afɔle la ati, yeyɛ yɛ ayile wɔ sɛkɛlɛneɛ adenle zo. (1 Pita 2:24) Ɛkpɔnedeɛ ne maa agɔnwolɛvalɛ mɔɔ yɛ nee Gyihova lɛ mɔɔ ɛtane maanle ɔzɛkyele la yɛ boɛ bieko. Kɛ mɔɔ bɛyɛ awie mɔɔ ɛnyia ewule ɛzulolɛ bie la ayile a ɔ nye die kpole la, zɔhane ala a saa bɛyɛ yɛ ayile wɔ sunsum nu na yɛnyia Gyihova anyunlu ɛlolɛ bieko ɔlua ye ɛtanefakyɛ ne ati a, yɛ nye die kpole a. w25.02 11 ¶16-17

Wɔ talɛnte nwo ndonwo ne anu, Gyisɛse hanle ngɛkɛlɛ nwiɔ mɔɔ bɛlile nɔhalɛ bɛmaanle bɛ menle ne yɛɛ akɛlɛ ko mɔɔ anli nɔhalɛ la anwo edwɛkɛ. (Mat. 25:​14-30) Ngɛkɛlɛ nɔhavoma nwiɔ ne gyi ɛkɛ ne maa Kilisienema mɔɔ bɛkpokpa bɛ mɔɔ bɛdi nɔhalɛ la. Bɛ Menle Gyisɛse ɛvɛlɛ bɛ kɛ ‘bɛnyia bɛ menle anyelielɛ ne bie.’ Bɛnyia bɛ anwuma ahatualɛ ne, ewudwazo mɔɔ limoa. (Mat. 25:​21, 23; Yek. 20:5b) Noko akɛlɛ mgbovonle ne neazo ɛtane ne le kɔkɔbɔlɛ maa bɛdabɛ mɔɔ bɛkpokpa bɛ la. Wɔ adenle boni azo? Ɔwɔ kɛ bɛkile kɛ bɛ nye bolo gyima ɛsesebɛ ɛyɛlɛ nwo. Kɛ mɔɔ ɛnee ɔde wɔ mbɛlɛra ne mɔ anwo ndonwo ne anu la, zɔhane ala a wɔ talɛnte nwo ndonwo ne anu, tɛ mɔɔ ɛnee Gyisɛse ɛlɛkile la a le kɛ menli mɔɔ bɛkpokpa bɛ la bayɛ mgbovonle kenle bie. Emomu ɛnee ɔlɛkilehile mɔɔ saa bɛangɔ zo bɛanyɛ gyima ɛsesebɛ a ɔbado bɛ la anu. Bɛnrɛmaa “bɛ ɛvɛlɛlɛ nee bɛ ɛkpalɛ ne [ɛnrɛli] munli,” na bɛnrɛmaa bɛ adenle kɛ bɛhɔ anwuma Belemgbunlililɛ ne anu. w24.09 22 ¶10; 23 ¶12-13

Yɛ muala yɛkulo kɛ yɛkola yɛnea yɛ nwo nee yɛ abusua ne. (Nol. 7:12; 1 Tim. 5:8) Saa yɛlɛsi kpɔkɛ kɛ yɛbayɛ gyima bie a, ɔle kpalɛ kɛ yɛbazuzu ezukoa dodo mɔɔ yɛbanyia la anwo. Noko saa yemɔ angome a le debie mɔɔ awie dwenle nwo a, bie a ɔbahile kɛ ɔlua mɔɔ ɛnyelɛ nwu ye la ala anu. Saa yɛlua diedi nu a, eza yɛbazuzu kɛzi gyima ne bahola aha yɛ nee Gyihova agɔnwolɛvalɛ ne la anwo. Yɛbahola yɛabiza yɛ nwo kɛ: ‘Gyima ɛhye bamaa meava me nwo meawula nyɛleɛ mɔɔ Gyihova kyi la anu ɔ?’ (Mrɛ. 6:​16-19) ‘Ɔnrɛmaa menrɛhola menrɛhɔ debiezukoalɛ dahuu yɛɛ ɔbamaa meavi me abusua ne anwo mekɛ tendenle ɔ?’ Saa yɛbua kpuya ɛhye mɔ kɛ ɛhɛe a, ɔbayɛ kpalɛ kɛ yɛnrɛyɛ gyima ne, saa bɔbɔ ɔyɛ se kɛ yɛbanyia fofolɛ a. Kɛmɔ yɛlua diedi nu la ati, yɛsisi kpɔkɛ mɔɔ kile kɛ yɛlɛ anwodozo kɛ Gyihova bava mɔɔ yɛhyia nwo la amaa yɛ la.—Mat. 6:33; Hib. 13:5. w25.03 21 ¶5-6

Ɔwɔ kɛ dahuu yɛbɔ mɔdenle kɛ yɛbanwu yɛ mediema kɛ mɔɔ Gyihova nwu bɛ la. Saa yɛfa yɛ adwenle yɛsie bɛ subane mgbalɛ ne mɔ azo na yɛanva yɛanzie bɛ sinlidɔlɛ ne mɔ mɔɔ awieleɛ bɔkɔɔ ne ɔbavi ɛkɛ la azo a, yɛbahola yɛayɛ ye zɔ. Yɛbahola yɛaziezie akɛsakɛsa biala mɔɔ wɔ yɛ avinli la wɔ ɛlɔlɛ nu. Ɛhye bamaa menli mɔɔ bɛkulo kɛ bɛ nee bɛ di wɔ zɛhae adenle ne azo la anye alie nwo kɛ bɛbaraboka sunsum nu paladaese ne anwo. Bɛmaa yɛ nye ɛlie paladaese ne mɔɔ Gyihova ɛyɛ ɛmaa yɛ la anwo dahuu. Ɔwɔ kɛ awie biala mɔɔ kulo kɛ ye ahonle tɔ ye azule nu, ɔ kunlu dwo ɔ nwo, ɔsie ɔ nwo dii na ɔnyia banebɔlɛ la ba sunsum nu paladaese ne anu na ɔnle kɛ ɔfi nuhua ɛlɛ! Noko nea boɛ, ɔluakɛ Seetan ɛlɛbɔ mɔdenle kɛ ɔtwe yɛ yeavi nuhua. (1 Pita 5:8; Yek. 12:9) Ɔnle kɛ yɛmaa ye adenle yɛmaa ɔdi konim. Bɛmaa yɛbɔ mɔdenle ɛsesebɛ yɛbɔ sunsum nu paladaese ne kɛnlɛma ne, kɛzi nwolɛ te nee anzodwolɛ mɔɔ wɔ nu la anwo bane. w24.04 24-25 ¶18-19

Awovolɛ, bɛbahola bɛahilehile bɛ mra bɛamaa bɛ nye abolo Gyihova ɛzonlenlɛ nwo. Bɛlua bɛ edwɛkɛ nee bɛ neazo zo bɛhilehile bɛ mra ne mɔ kɛ sunsum nu ninyɛne—le kɛ Baebolo ɛzukoalɛ, debiezukoalɛ nee daselɛlilɛ ɛhɔlɛ—hyia tɛla debie biala mɔɔ ɛha la. Tɛ ye zɔhane a bɛ mra ne mɔ banyia adwenle kɛ kɛmɔ bɛ abusua ne le Gyihova Alasevolɛ la ati a bɛdabɛ noko bɛkɔ bie a. Ɛhye ati bie a bɛbabu nɔhalɛ ɛzonlenlɛ kɛ nwolɛ ɛngyia kpalɛ anzɛɛ bie a bɛbavi nu bɔkɔɔ. Saa awie ɛgyakyi Gyihova ɛzonlenlɛ a, asoo yemɔ kile kɛ ɔnrɛhola ɔnrɛzonle ye bieko ɔ? Kyɛkyɛ, ɔluakɛ ɔbahola yeanlu ɔ nwo na yeazia yeara nɔhalɛ ɛzonlenlɛ nu. Saa ɔbahola yeayɛ zɔ a, ɔwɔ kɛ ɔbɛlɛ ɔ nwo aze na ɔmaa asafo nu mgbanyima ne mɔ boa ye. (Gye. 5:14) Mɔdenle biala mɔɔ ɔbabɔ amaa yeayɛ Gyihova agɔnwo bieko la baboa ye kpalɛ! w24.07 24-25 ¶18-19

Kɛ ɔkɛyɛ na bɛamaa bɛ ɛdulɛ ne azɔ Gyihova anye ɛ? Mekɛ mɔɔ bɛ nye ɛlɛdie bɛ nwo kpalɛ la, ɔbamaa bɛabikye bɛ nwo kpalɛ. Duzu a bahola aboa bɛ amaa bɛanyɛ debie mɔɔ Gyihova kyi la ɛ? Bɛmmabɔ ɛbɛlatane nwo adawu, bɛ ngomekye bɛmmakɔfea ɛleka bie yɛɛ bɛmmano nza dɔɔnwo. (Ɛfɛ. 5:3) Ninyɛne ɛhye mɔ bahola amaa bɛ nganeɛdelɛ ne azɔ kɛ senle na ɔnrɛmaa bɛnrɛhola bɛ nwo sɔ. Duzu ati a bɛnda bɛmbɔ nu bɛnzuzu ninyɛne mɔɔ bɛbahola bɛayɛ amaa bɛ ɛdulɛ ne azɔ Gyihova anye la anwo a? (Mrɛ. 22:3) Mekɛ mɔɔ bɛ ɛdulɛ ne ɛlɛnyia anyuhɔlɛ la, bɛbahola bɛala ɛhulolɛ nwo nyɛleɛ bie mɔ ali bɛahile bɛ nwo. Noko saa ɔmaa bɛ nla nwo nganeɛdelɛ yɛ kpole a, bie a ɔnrɛmaa bɛnrɛhola bɛnrɛzi kpɔkɛ kpalɛ. (Sɔl. 1:2; 2:6) Eza bɛbahola bɛala ɛhulolɛ ali bɛamaa yeabo zo na yeamaa bɛabɔ ɛbɛla mɔɔ ɛnzɔ Gyihova anye la. (Mrɛ. 6:27) Ɔti wɔ bɛ ɛdulɛ ne mɔlebɛbo, bɛgyinla Baebolo ngyinlazo zo bɛzuzu ɛhulolɛ nwo nyɛleɛ mɔɔ bɛbala ye ali bɛahile bɛ nwo nee mɔɔ bɛnrɛyɛ la anwo.—1 Tɛs. 4:​3-7. w24.05 29 ¶10-11

Yɛkulo kɛ yɛyɛ menli mɔɔ awie mɔ kola fa bɛ nye to yɛ nwo zo, titili wɔ ngyegyelɛ mekɛ nu. (Mrɛ. 17:17) Kɛ ɔkɛyɛ na yɛayɛ menli mɔɔ bɛkola bɛfa bɛ nwo bɛto yɛ nwo zo ɛ? Yɛbahola yɛabɔ mɔdenle kɛ yɛbala subane kpalɛ ali dahuu, bie a le kɛ yɛbali yɛ ɛwɔkɛ zo na yɛayɛ biala mɔɔ yɛbahola la yɛali yɛ mekɛ zo. Mgbanyima mɔɔ bɛkola bɛfa bɛ nwo bɛto bɛ nwo zo la boa asafo ne kpalɛ. Adenle boni azo? Saa nolobɔlɛma ze kɛ bɛbahola bɛavɛlɛ asafo nu mgbanyima, titili daselɛlilɛ ekpunli zo neavolɛma wɔ mekɛ biala mɔɔ bɛhyia moalɛ la a, ɔmaa bɛ adwenleadwenle zo te. Eza saa nolobɔlɛma ze kɛ mgbanyima ne mɔ lɛ ɛhulolɛ kɛ bɛbaboa bɛ a, ɔmaa bɛte nganeɛ kɛ bɛdwenle bɛ nwo. Yɛɛ saa mgbanyima ne mɔ ammaa bɛ folɛdulɛ angyinla bɛdabɛ mumua ne bɛ nzuzulɛ zo, emomu bɛmaa ɔgyinla Baebolo ne nee ninyɛne ngakyile mɔɔ akɛlɛ nɔhavo ne ɛyɛ la azo a, ɔmaa bɛ mediema diedima die bɛ di. Eza mediema lɛ asafo nu kpanyinli mɔɔ kola fa fealeranu edwɛkɛ sie na ɔdi ye ɛwɔkɛ zo la anu anwodozo. w24.06 30 ¶14-15

Ɛnɛ, yɛnrɛhola yɛnrɛmaa yɛ nye ɛnrɛla kɛ Gyihova baye yɛ ngyegyelɛ ne mɔ amuala avi ɛkɛ, noko yɛlɛ anwodozo kɛ ɔbaboa yɛ. (Edw. 41:3) Gyihova dua ye sunsum nwuanzanwuanza ne azo maa yɛnyia anwosesebɛ, nrɛlɛbɛ nee anzodwolɛ yɛgyinla ɔ nloa. (Mrɛ. 18:14; Fel. 4:13) Eza ɔdua anyelazo edwɛkɛ mɔɔ wɔ Baebolo ne anu mɔɔ se ɔbaye anwodolɛ kɔsɔɔti yeavi ɛkɛ ne la azo ɔkyekye yɛ rɛle. (Aye. 33:24) Gyihova ɛmaa bɛhɛlɛ edwɛkɛ fɛlɛko mɔɔ ɔbamaa yɛ rɛle akyekye wɔ mekɛ mɔɔ yɛwɔ tɛnlabelɛ mɔɔ anu yɛ se la anu la bɛdo ɛkɛ bɛmaa yɛ. (Wlo. 15:4) Mɔɔ bɛhanle bɛhilele adiema raalɛ bie mɔɔ wɔ West Africa la kɛ yenyia kansa la, ɛnee dahuu ɔsu. Ɔhanle kɛ: “Ngɛlɛlera ko mɔɔ ɛnee ɔkyekye me rɛle kpalɛ la a le Ayezaya 26:3. . . . Ngɛlɛlera ɛhye bɔ yɛ ɛwɔkɛ kɛ Gyihova bahola amaa yɛazie yɛ nwo dii na yeaboa yɛ yeamaa yɛagyinla sɔnea biala anloa.” Ɛze ngɛlɛlera bie mɔɔ ɔkyekye ɛ rɛle wɔ mekɛ mɔɔ ɛlɛyia tɛnlabelɛ mɔɔ anu yɛ se kpalɛ, bie bɔbɔ a ɛnee ɔzɔho kɛ wɔ anyelazo ɛwie la ɔ? w24.12 24 ¶17-18

Mgbanyima ne mɔ noko bɔ mɔdenle da fakyɛ subane ali kile bɛdabɛ mɔɔ bɛminli la. Bɛkulo kɛ mboane ɛhye mɔ mɔɔ bɛminli la “sia ba sua nu.” (Luku 15:​22-24, 32) Saa ɛtanevolɛ ko sia ba a, anyelielɛ ba anwuma yɛɛ azɛlɛ ye azo noko! (Luku 15:7) Yɛnwu kɛ Gyihova ɛnsosɔ bɛdabɛ mɔɔ bɛyɛ ɛtane mɔɔ bɛnnu bɛ nwo la zo. Noko ɔngakyi ɔ nzi ɔnzi ɛtanevolɛma. Ɔkulo kɛ bɛsia bɛba. Gyihova ka kɛzi ɔbu ɛtanevolɛma mɔɔ bɛtɛnunle bɛ nwo la anwo edwɛkɛ wɔ Hozia 14:4 kɛ: “Mebayɛ bɛ ayile wɔ nɔhalɛ mɔɔ bɛanli la anwo. Mebavi me ahonle nu meahulo bɛ, ɔluakɛ me ɛya ne ɛvi ɔ nwo zo.” Ɔwɔ kɛ ɛhye maa asafo nu mgbanyima anwosesebɛ kpole maa bɛkpondɛ sɛkɛlɛneɛ biala mɔɔ kile kɛ ɛtanevolɛ bie ɛnlu ɔ nwo la. Yɛɛ ɔwɔ kɛ ɔmaa bɛdabɛ mɔɔ bɛgyakyi Gyihova ɛzonlenlɛ la anwosesebɛ kpole ɔmaa bɛsia bɛba ye ɛkɛ ne ndɛndɛ. w24.08 28 ¶8-9

Nɔhalɛ ne a le kɛ tɛ dahuu a awie mɔ bɛahile mɔɔ yɛyɛ la anwo anyezɔlɛ a. Ɔdwu mekɛ ne bie a, yɛbava yɛ mekɛ, yɛ anwosesebɛ anzɛɛ yɛ ninyɛne yɛaboa awie mɔ, noko yemɔ anzi ɔyɛ a ɛnee ɔzɔho kɛ ahenle mɔɔ yɛyɛle deɛ ne yɛmaanle ye la annwu mɔɔ yɛyɛle la. Saa ɔba ye zɔ a, kɛ ɔkɛyɛ na yɛammaa yeanzɛkye yɛ anyelielɛ anzɛɛ yɛanva nwolɛ ɛya ɛ? Kakye kɛ saa yɛyɛ debie yɛmaa awie mɔ a, tɛ mɔɔ bɛbayɛ wɔ nwolɛ la a bamaa yɛ ye alie a. (Gyi. 20:35) Saa bɔbɔ awie mɔ ɛngile mɔɔ yɛyɛ la anwo anyezɔlɛ a, yɛbahola yɛakpa kɛ yɛbava anyelielɛ yɛahyɛ debie. Wɔ adenle boni azo? Maa ɔdɛnla wɔ adwenle nu kɛ ɛlɛsukoa Gyihova. Ɔfa ninyɛne mgbalɛ ɔmaa awie mɔ saa bɔbɔ bɛkile nwolɛ anyezɔlɛ anzɛɛ bɛangile nwolɛ anyezɔlɛ a. (Mat. 5:​43-48) Gyihova ɛbɔ ɛwɔkɛ kɛ saa yɛdayɛ noko yɛkyɛ debie mɔɔ ‘yɛmmaa yɛ nye ɛnla kɛ yɛbanyia debie wɔ ɔ nzi a, yɛ ahatualɛ bayɛ kpole.’ (Luku 6:35) “Debie” zɔhane bie bahola ayɛ anyezɔlɛ. Saa bɛkile nwolɛ anyezɔlɛ o, saa bɛangile nwolɛ anyezɔlɛ o, Gyihova bamaa yɛ ahatualɛ wɔ ninyɛne mgbalɛ mɔɔ yɛyɛle yɛboale awie mɔ la anwo, kɛ yɛle menli mɔɔ ‘yɛte yɛ nyunlu yɛkyɛ debie.’—Mrɛ. 19:17; 2 Kɔl. 9:7. w24.09 29 ¶14-16