BƆ ADAWUBƆLƐ BO
ƐZUKOALƐDEƐ 6
Nyia Akɛnrazilɛ
Ngyinlazo: ‘Yɛ Nyamenle ne maanle yɛnyianle akɛnrazilɛ kɛ yɛha edwɛkpa ne yɛhile bɛ.’ —1 Tɛs. 2:2.
Mɔɔ Gyisɛse Yɛle La
1. Nea VIDIO ne, anzɛɛ kenga Luku 19:1-7. Akee suzu kpuya ɛhye mɔ anwo:
Duzu ati a ɔbayɛ kɛ ɛnee menli bie mɔ ɛngulo Zakeɛse edwɛkɛ a?
Duzu a maanle Gyisɛse hanle edwɛkpa ne bie hilele ye a?
Duzu A Yɛsukoa Yɛfi Gyisɛse Ɛkɛ A?
2. Yɛhyia akɛnrazilɛ amaa yɛaha edwɛkɛ ne yɛahile awie biala.
Sukoa Gyisɛse
3. Fa ɛ nwo to Gyihova anwo zo. Nyamenle sunsum ne maanle Gyisɛse nyianle anwosesebɛ ɔvale ɔlile daselɛ, na ɔbahola yeaboa ɛdawɔ noko. (Mat. 10:19, 20; Luku 4:18) Sɛlɛ Gyihova kɛ ɔmaa ɛnyia akɛnrazilɛ ɛva ɛli menli mɔɔ ɛsulo bɛ la daselɛ.—Gyi. 4:29.
4. Mmabua menli ndɛne. Kɛzi menli bie de, ezukoa anzɛɛ gyinlabelɛ mɔɔ bɛlɛ, bɛ ɛbɛlabɔlɛ anzɛɛ asɔne mɔɔ bɛkɔ la ati, bie a yɛnrɛhulo kɛ yɛ nee bɛ badendɛ. Noko kakye kɛ:
Gyihova nee Gyisɛse a ze mɔɔ wɔ awie ahonle nu a; yɛmɛ yɛnze.
Awie biala ɛnle ɛkɛ mɔɔ Gyihova se ye anwunvɔne a ɔnyɛ boɛ a.
5. Nyia akɛnrazilɛ noko tendɛ ɛbulɛ nu na nea boɛ. (Mat. 10:16) Mmasu kpolera. Saa awie ɛngulo kɛ ɔtie edwɛkɛ ne anzɛɛ ɛnwu kɛ ɔbahola yeayɛ esiane yeamaa wɔ a, fi ɛbulɛ nu pɛ edwɛkɛ ne azo.—Mrɛ. 17:14.