Gyihova Maanle Yilaegya Anwosesebɛ

Gyɛzɛbɛle dele mɔɔ dole Beeyale ngapezoma ne la, na ɔvale ɛya kpole. Ɔdole Yilaegya nrɛlaleɛ kɛ: ‘Ɔkadwu ɛhyema la, ɛnee mehu wɔ kɛ mɔɔ wɔhu Beeyale ngapezoma ne la.’ Yilaegya ahonle dule kpalɛ yemɔti ɔnriandile ɔhɔle ɛsɛlɛ ne azo. Ɔyɛle asɔne kɛ: ‘Gyihova, yeyɛ boɛ. Maa menwu.’ Ɛvɛlɛ ngome maanle Yilaegya lale baka bie abo.

Anwumabɔvolɛ bie dunwuele ye na ɔhanle ɔhilele ye kɛ: ‘Dwazo na di debie.’ Yilaegya nwunle paano mɔɔ la bolɛ wuluwulu bie azo la nee nzule mɔɔ wɔ buakɛ nu la. Ɔlile debie, ɔnlonle nzule ne bie na ɔziale ɔhɔlale. Anwumabɔvolɛ ne dunwuele ye bieko na ɔhanle ɔhilele ye kɛ: ‘Di debie na wɔahola adenle ne pɛ.’ Yemɔti Yilaegya lile aleɛ ne bie bokale nwo. Akee ɔdiale alehyenlɛ nee aledwolɛ kenle 40 ɔhɔle Hɔlɛbe Boka ne azo. Yilaegya hɔveale bolɛ bie anu wɔ ɛkɛ na ɔlale. Noko Gyihova nee ye dendɛle. Ɔhanle kɛ: ‘Yilaegya, duzu a ɛlɛyɛ ye wɔ ɛke a?’ Yilaegya buale kɛ: ‘Yizilayɛma anli ɛwɔkɛ mɔɔ bɛbɔle wɔ la azo. Bɛzɛkye wɔ afɔlemokyea ne mɔ yɛɛ bɛhu wɔ ngapezoma ne mɔ. Kɛkala bɛkpondɛ kɛ bɛku me.’

Gyihova hanle hilele ye kɛ: ‘Kɔgyinla boka ne azo.’ Mɔɔ limoa la, anwoma kpole bie dule. Yemɔ anzi azɛlɛ kpusule na senle zɔle. Akee ɛnelɛ bie mɔɔ wɔ aze la dendɛle bɛtɛɛ hilele Yilaegya. Ɔvi bolɛ bɔne ne anu ɔvindele na ɔvale ye tɛladeɛ aguzo ne ɔhedale ɔ nyunlu. Gyihova bizale ye deɛmɔti yenriandi la. Yilaegya buale kɛ: ‘Yeha me ngomekye.’ Noko Gyihova hanle kɛ: ‘Ɔtɛkale ɛ ngome. Yizilayɛma 7,000 wɔ ɛkɛ mɔɔ bɛtɛsonle me a. Kpa Yilaehya kɛ ngapezonli maa ɔli ɛ gyakɛ anu.’ Ɛkɛ ne ala Yilaegya hɔyɛle mɔɔ Gyihova hanle hilele ye la. Saa ɛyɛ mɔɔ Gyihova kulo kɛ ɛyɛ la a, ɛnea a ɔnrɛboa wɔ ɔ? Ɔbaboa wɔ! Maa yɛnlea mɔɔ zile wɔ mekɛ mɔɔ ɛnee ezule ɛndɔ na azɛlɛ nwo ɛwe la.