Kamɛle Boka Ne Azo Sɔnea Bie

Mbusua bulu belemgbunlililɛ ne arelemgbunli dɔɔnwo yɛle ɛtane, noko Ehabe tɛla bɛ muala. Ɔgyale raalɛ atisesebɛ bie mɔɔ sonle Beeyale la. Bɛfɛlɛ ye Gyɛzɛbɛle. Ehabe nee Gyɛzɛbɛle maanle menli dɔɔnwo zonlenle Beeyale na bɛhunle Gyihova ngapezoma ne mɔ. Duzu a Gyihova yɛle a? Ɔzoanle ngapezonli Yilaegya ɔmaanle ɔhɔhanle nrɛlaleɛ bie ɔhilele Ehabe.

Yilaegya zele Ehabe kɛ ye ninyɛndane ne mɔ ati, ezule ɛnrɛdɔ Yizilayɛ. Menli ne annyia aleɛ too ɛvolɛ mɔɔ bo nsa, yemɔti ɛhɔne hunle bɛ. Nzinlii Gyihova zoanle Yilaegya wɔ Ehabe ɛkɛ. Belemgbunli ne zele Yilaegya kɛ: ‘Ɛle gyegyeravolɛ! Ɛhye mɔ amuala vi wɔ.’ Yilaegya buale kɛ: ‘Tɛ medame a memmaa ezule ɛndɔ a. Beeyale mɔɔ ɛsonle ye la ati ɔ. Yɛbayɛ sɔnea bie. Maa menli ne nee Beeyale ngapezoma ne ɛyia wɔ Kamɛle Boka ne azo.’

Menli ne hɔyiale boka ne azo. Yilaegya hanle kɛ: ‘Bɛzi mɔɔ bɛbayɛ la anwo kpɔkɛ. Saa Gyihova a le nɔhalɛ Nyamenle ne a, bɛdoa ye. Na saa Beeyale noko a, bɛdoa ye. Akee ɔhanle kɛ Beeyale ngapezoma 450 ne ɛziezie afɔlebɔdeɛ na bɛvɛlɛ bɛ nyamenle ne, na medame noko mebaziezie afɔlebɔdeɛ na meavɛlɛ Gyihova. Nyamenle ne mɔɔ bamaa senle aradɔ nu la a le nɔhalɛ Nyamenle ne a.’ Menli ne liele dole nu.

Beeyale ngapezoma ne zieziele bɛ afɔlebɔdeɛ ne. Bɛvɛlɛle bɛ nyamenle ne alehyenlɛ ne amuala kɛ: ‘O Beeyale bua yɛ!’ Noko Beeyale ambua bɛ, ɔti Yilaegya golole bɛ nwo. Ɔhanle kɛ: ‘Bɛdea nuhua kpalɛ bɛvɛlɛ ye. Bie a ɛnee yelafe na ɔwɔ kɛ awie tunwue ye.’ Maanle nu muanle noko ɛnee Beeyale ngapezoma ne tɛfɛlɛ ye. Noko awie ambua bɛ.

Yilaegya zieziele ye afɔlebɔdeɛ ne wɔ afɔlemokyea bie azo na ɔzale nzule ɔguale zo. Akee ɔzɛlɛle Gyihova kɛ: ‘O Gyihova, mesɛlɛ wɔ maa menli ne ɛnwu kɛ wɔmɔ a ɛle nɔhalɛ Nyamenle ne a.’ Ɛkɛ ne ala Gyihova maanle senle vi anwuma rayelale afɔlebɔdeɛ ne. Menli ne deanle nuhua kɛ: ‘Gyihova a le nɔhalɛ Nyamenle ne a!’ Yilaegya hanle kɛ: ‘Bɛhye Beeyale ngapezoma ne mɔ amuala!’ Kenle ko zɔhane, bɛhunle Beeyale ngapezoma 450 ne.

Mɔɔ amungu ekyi bie vindele nyevile nu lɔ la, Yilaegya zele Ehabe kɛ: ‘Anwoma ɛlɛba aradu. Fo wɔ ehwili ne na kɔ sua nu.’ Maanle nu munlanle, anwoma dule na ezule kpole bie dɔle. Ehabe hanle ye ehwili ne ndɛndɛ kɛ mɔɔ ɔbahola la. Gyihova sunsum ne boale Yilaegya maanle ɔnriandile ɔhɔzenle ehwili ne anwo! Noko asoo Yilaegya ngyegyelɛ ne rale awieleɛ ɔ? Maa yɛnlea.